تاجىكستان جوعارعى سوتىنىڭ توراعاسى شەرمۋحاممادي شوحيون 18 شىلدەدە دۋشانبە قالاسىندا ءباسپاسوز ءماسليحاتىن وتكىزىپ، قورعانىس ءمينيسترىنىڭ بۇرىنعى ورىنباسارى ابدۋحاليم نازارزودانىڭ (حودجي حاليم) بۇلىگىنە قاتىستى قىلمىستىق ءىستى قاراۋ اياقتالعانىن مالىمدەدى.

ول «نازارزودا بۇلىگى بيلىكتىڭ ارەكەتسىزدىگىنەن بولدى» دەپ مالىمدەدى.

2015 جىلى 4 قىركۇيەك كۇنى تاڭەرتەڭ ۆاحدات قالاسىنىڭ ىشكى ىستەر بولىمىنە جانە دۋشانبە اۋەجايى ماڭىنداعى ميليتسيا كەزەكشىلىك پۋنكتىنە شابۋىل جاسالدى. بيلىك بۇنى نازارزودانىڭ ادامدارى ۇيىمداستىرعان دەپ ەسەپتەيدى. سول كەزدە نازارزودا تاجىكستان قورعانىس ءمينيسترىنىڭ ورىنباسارى قىزمەتىن اتقاراتىن.

قىلمىستىق توپقا قارسى وپەراتسيا راميت شاتقالىندا 12 كۇنگە سوزىلدى. سونىڭ سالدارىنان 14 پوليتسيا قىزمەتكەرى قازا بولىپ، قىلمىستىق توپتىڭ شامامەن 30 مۇشەسى ءولتىرىلدى. وسى وقيعادان سوڭ 200-گە جۋىق ادام قاماۋعا الىندى جانە تاجىكستان سوتى سولاردىڭ باسىم بولىگىنە جازا بەلگىلەدى. سوت پروتسەستەرى جابىق ءوتتى، ءتىپتى مەملەكەتتىك باق سوت شەشىمدەرى تۋرالى حابار تاراتقان جوق.