كەشە (18 شىلدە كۇنى تۇندە) قر ىشكى ىستەر ءمينيسترى قالمۇحامبەت قاسىموۆ مىرزا الماتىعا ارنايى كەلىپ، شۇعىل بريفينگ وتكىزدى.  «Abai.kz» پورتالىنىڭ كونتەنت-رەكداكتورى مينيستر مىرزامەن كەزدەسىپ، بريفينگكە قاتىستى.

الماتى قالالىق ءىىد عيماراتىنىڭ جينالىس زالىندا، تۇنگى ساعات 22:30 شاماسىندا باستالعان بريفينگتە مينيستر مىرزا   الماتىداعى تەراكتىنى جاساعان جالعىز ادام ەكەنىن ايتتى. مينيسترمەن جەدەل تۇردە وتكەن سۇحباتىمىز تومەندەگىدەي بولدى.

-قازىر اتىستى ۇيىمداستىرعان قىلمىسكەرلەر تۋرالى ناقتى دەرەكتەر جوق. تەك ءبىر عانا ازاماتتىڭ ۇستالعاندىعى ايتىلۋدا. نەگە؟

- اتىس جاساعان ازامات بىرەۋ عانا جانە وعان كومەكتەستى دەگەن كۇدىكپەن تاعى ءبىر ازامات انىقتالدى. قازىر قىلمىسكەر قۇرىقتالدى. ول قىزىلوردا وبلىسىنىڭ تۋماسى، 26 جاستاعى رۋسلان  كۇلەكباەۆ دەگەن ازامات. بۇرىن ەكى مارتە قىلمىستى بولعان. بارلىعى 2 جىل 11 اي جازاسىن وتەپ شىققان.

-شەتىن وقيعا قالانىڭ بىرنەشە نۇكتەسىندە بولدى عوي. ال وسىعان دەيىن باق-تا تاراعان اقپاراتتاردا قىلمىسكەرلەر ءبىر نەشەۋ بولدى ەمەس پە؟!

-جوق. ايتىپ وتىرمىن عوي، قىلمىستى جاساعان  جالعىز ادام. ول جانە بار كىناسىن تولىق مويىندادى. كۇدىكتى بۇل ارەكەتتى قاساقانا، ىشكى ىستەر قىزمەتكەرلەرىنە كەگى بولعاندىقتان جاساعاندىعىن ايتتى. سونداي-اق، ەكى شابۋىلدىڭ اراسىندا 24 مينۋت ايىرماشىلىق بار. ال بۇل ايىرماشىلىق - قىلىمىس ءبىر مەزەتتە جاسالدى دەگەن اقپاراتتى تەرىسكە شىعارادى. اۋەلى المالى اۋداندىڭ باسقارماسىنا شابۋىل جاساعان سوڭ، ونداعى كۇزەتتەگى پوليتسەيدى ءولتىرىپ، ونىڭ قارۋىن العان. سوسىن كوشەدەگى كولىكتى توقتاتىپ، ۇقك-عا بارعان.

-اتىستى جاسادى دەگەن ازاماتتىڭ بۇرىن قىلمىستى بولعانىن ايتتىڭىز...

-ءيا، سولاي. ول از ۋاقىتتىڭ ىشىندە جازاسىن وتەپ شىققان. جەكە ىسىندە ونىڭ جەكە باسىنا قاتىستى بار مالىمەت تىركەلگەن. قاڭتار ايىندا قىلمىسكەر الماتى قالاسىنا كەلەدى. بىرنەشە اي جالدامالى پاتەرلەردە تۇرعان. بوستاندىققا شىققان سوڭ دا، قىلمىسكەر زاڭعا قايشى ارەكەتتەر جاساعان، قارۋ ساتىپ العان.

-سوندا اتىس كەزىندە جاراقات العانداردىڭ ناقتى سانى قانشا ادام؟ نەشەۋى پوليتسيا قىزمەتكەرى؟ بەيبىت تۇرعىندار بار ما؟

- جالپى اتىس كەزىندە 6 ادام جاراقات العان. ولار پوليتسيا قىزمەتكەرلەرى. تاعى ءۇش ادام - قالا تۇرعىنى.

-ال قانشا ادام قازا تاپتى؟

-اتىس كەزىندە 5 ادام قازا تاپقان. ولاردىڭ ۇشەۋى پوليتسيا قىزمەتكەرى، ءبىر ادام ۇقك شەكارا قىزمەتكەرى جانە ءبىر قالا تۇرعىنى بار.

-وسىعان دەيىن باق پەن الەۋمەتتىك جەلىلەردە قازا تاپقانداردىڭ سانى ءسىز كورسەتكەن دەرەكتەردەن ەداۋىر كوپ ەكەندىگى ايتىلدى عوي...

-قازا تاپقانداردىڭ سانى 5 ادام.

-قازىر اتالعان وقيعا بويىنشا قىلمىستىق ءىس قوزعالدى ما؟

-قازىر اتالعان ءىس بويىنشا قىلمىستىق ءىس قوزعالدى. سونىڭ ىشىندە ء«بىر نەمەسە بىرنەشە ادامدى ءولتىرۋ»، «تەرروريزم»، «مەملەكەتتىك نىساندارعا شابۋىل» جانە «مەملەكەتتىك قىزمەتكەرگە شابۋىل جاساۋ» سەكىلدى باپتار بويىنشا  ۇقك مەن پروكۋراتۋرا ءىس قوزعادى. الدىن الا تەرگەۋ امالدارى بارىسىندا انىقتالعانداي، كۇدىكتى كۇلەكباەۆ 17-نەن 18-نە قاراعان ءتۇنى ازاماتشا سىدىقوۆانى قالاداعى قوناق ۇيدە ازاپتاپ ولتىرگەن. سىدىقوۆا وزبەكستان ازاماتى ەكەن، الماتى قالاسىندا زاڭعا قايشى كەلەتىن ينتيمدىك قىزمەت كورسەتۋمەن اينالىسىپ كەلگەن. بۇل قىلمىسى ءۇشىن جاۋاپقا تارتىلاتىنىن بىلگەن سوڭ، كۇلەكباەۆ قارۋ كەزەنىپ، بوتەن كولىكتى ۇرلاپ كەتكەن. جاساعان قىلمىسى ءۇشىن ءوزىنىڭ اۋىر جازالاناتىنىن بىلگەن رۋسلان كۇلەكباەۆ پوليتسياعا شابۋىل جاساۋدى جوسپارلايدى. جانە سولاي جاسايدى دا.

-اتالعان وقيعا بويىنشا ءىس سىزدەردىڭ قاراۋلارىڭىزدا عوي؟

-قۇقىق قورعاۋ ورگانىنا شابۋىل جاسالۋىنا بايلانىستى بۇل ءىستى ۇقك ءوز باقىلاۋىنا الدى جانە ونىڭ قالالىق اكىمشىلىككە ەش قاتىسى جوق.

-قازىر كۇلەكباەۆ قاماۋدا ما؟

-اتىس كەزىندە جاراقات الۋىنا بايلانىستى قازىر ول اۋرۋحانادا جاتىر.

سونىمەن،  ىشكى ىستەر ءمينيسترى قالمۇحامبەت قاسىموۆ مىرزا الماتىعا تۇندە كەلىپ، باق وكىلدەرىنە قىلمىستى جاساعان ادامنىڭ جالعىز ەكەندىگىن ايتتى. اسىعىس كەلگەن مينيستر، جينالىس زالىنان دا اسىعىس شىعىپ كەتتى.

وسىعان دەيىن الماتى قالالىق شۇعىل جەدەل كومەك كورسەتۋ اۋرۋحاناسىنا 8 ادامنىڭ كەلىپ تۇسكەندىگىن ءوز كوزىمىزبەن كورەگەن ەدىك.

اتالعان اۋرۋحاناعا الماتى قالاسى اكىمىنىڭ بۇرىنعى ورىنباسارى زاۋرەش امانجولوۆا دا كەلگەنىن كورىپ، سوزگە تارتقان بولاتىنبىز.

زاۋرەش امانجولوۆا، ءماجىلىس دەپۋتاتى:

-قازىر مۇندا جاعداي تۇسىنىكسىز. كەشىرىڭىزدەرشى، مەن دارىگەر ەمەسپىن عوي. قازىر 5 بىردەي وپەراتسيا زالىندا وتا جاسالىپ جاتىر. دارىگەرلەر بوساعان سوڭ، سىزدەرگە شىعىپ مالىمدەمە جاسايدى. مەنىڭ بىلەتىنىم سول عانا، وپەراتسيا زالدارىنىڭ بارلىعى بوس ەمەس. مەنىڭ ءوزىم قازىر باۋىرىمنان ايرىلىپ تۇرمىن...

تۇسكى ساعات 12:30-دان 16:30-عا دەيىن سوزىلعان وتادان سوڭ حيرۋرگتار ءباسپاسوز وكىلدەرىمەن سۇحباتتاسۋعا ۋاقىت تاپپادى. وتا جاساعان حيرۋرگ دارىگەردىڭ ءبىرى بىزگە، «كوبىسىنەن ايىرىلىپ قالدىق. بىزگە كەش جەتكىزدى. وتە كوپ قان جوعالتقان»،-دەدى (دارىگەردىڭ اتى-ءجونى، ءوزىنىڭ ءوتىنىشى بويىنشا جاسىرىلدى).

ال اتالعان اۋرۋحانانىڭ باس دارىگەرى دەپ تانىستىرعان الماس بولاتۇلى بىزبەن تەلەفون ارقىلى سويلەسۋگە مۇمكىندىگى بارىن ەسكەرتىپ، «قازىر وپەراتسيالار اياقتالدى. جاعداي قالىپتى. مەن سىزدەرگە ۇقك مەن ءىىم كەلىسپەستەن ەشتەڭە ايتا المايمىن . سەبەبى، ناقتى اقپاراتتار مەندە جوق»،-دەدى.

ال كەشكى ساعات 21:00 شاماسىندا قالادا قاۋىپتىڭ "قىزىل دەڭگەيى" الىنىپ تاستالدى.

الداعى ۋاقىتتا قاسىموۆ مىرزا وتكىزگەن بريفينگتىڭ بەينە نۇسقاسىن سايتىمىزدا جاريالايتىن بولامىز.

نۇرگەلدى ابدىعانيۇلى

Abai.kz