كاسىپكەرلەر بيزنەسىن ورگە دومالاتىپ قانا قويماي، قوعامنىڭ رۋحاني تاربيەسىنە ۇلەس قوسۋدا. بيزنەسمەندەر وسىدان ءبىراز جىل بۇرىن جاركەنتتەگى ەسكى مەشىتكە كۇردەلى جوندەۋ جۇرگىزدى. بىراق كەلۋشىلەردىڭ قاراسى كوبەيگەندىكتەن، ورىن جەتىسپەۋشىلىگى بايقالعان. جەرگىلىكتى كاسىپكەرلەر اقىلداسا كەلە جاڭا مەشىتكە اقشا جيناۋدى ۇيعارادى. قۇرىلىس 2015 جىلى باستالدى.

قۇدايعا قۇلشىلىق ەتۋشىلەر قاسيەتتى سانايتىن جۇما كۇنى اللا ءۇيىنىڭ تۇساۋى كەسىلدى. ساۋلەتتى قۇرىلىس قاسيەتتى مەكەن عانا ەمەس، جەرگىلىكتى كورنەكتى مادەني نىسانعا دا اينالدى. ءدىلمۇرات كوزيەۆ، سەرىك اقسۋباەۆ جانە تاسقىن جاپارقۇل باستاعان كاسىپكەرلەر  قۇرىلىسقا  1 ملن دوللار  سالدى. مەشىتكە 1000 ادام سىيادى.  بۇل جەردە مەدرەسە دە پايدا بولىپ، 1,5 گا جەردە بالالار الاڭى بوي كوتەرمەك.

«جاركەنتتىكتەر جاڭا مەشىت جايلى ارماندايتىن.  قاسيەتتى ورىن ىزگىلىك نۇرىن سەبەدى دەپ سەنەمىز. مەدرەسەدە 50 بالا ءبىلىم الماقشى. مەشىتىمىز رۋحاني بايىتىپ، وتانشىلدىققا تاربيەلەسە دەيمىز»، – دەيدى  كاسىپكەر ءدىلمۇرات  كوزيەۆ. 

 ورايى كەلگەندە ايتا كەتەلىك، كوزيەۆتەر وتباسى وسىمەن ونىنشى مەشىتتىڭ سالىنۋىنا، جاڭعىرۋىنا اتسالىسىپ وتىر. مەشىتتىڭ اشىلۋ سالتاناتىنا قازاقستان مۇسىلماندارى ءدىني باسقارماسىنىڭ باسشىسى، باس ءمۇفتي ەرجان مالعاجىۇلى قاتىسىپ، كاسىپكەرلەرگە يگىلىكتى ءىسى ءۇشىن العىس ايتتى. جاڭادان اشىلعان جاركەنتتىك مەشىت الماتى وبلىسىنداعى 425-ءشى  مەشىت.

«كاسىپكەرلەرىمىز ءبىرىنشى اللانىڭ، سوسىن اۋىلداستارىنىڭ الدىنداعى پارىزىن وتەۋ ءۇشىن ءوز قاراجاتتارىن جۇمسادى. قايىرىمدىلىق تانىتا وتىرىپ، اۋىل ادامدارىنىڭ تىلەگىن ورىندادى. بۇل نىساندار ءبىلىم الۋعا، وتاندى سۇيۋگە تاربيەلەسە دەگەن باستى ماقساتىمىز بار»، – دەيدى كاسىپكەرلەرى پالاتاسى پانفيلوۆ اۋدانى فيليالىنىڭ ديرەكتورى ازامات بايعۇتتيەۆ.

سول كۇنى اۋدان كاسىپكەرلەرىنىڭ قاراجاتىنا قىرىققۇدىق، ابات اۋىلدارىندا دا جاڭا مەشىتتەر سالىنىپ، اشىلۋىن اتاپ ءوتتى.

اباي-اقپارات