2016 جىلدىڭ شىلدە ايىنان باستاپ قازاقستانداعى اۋىلشارۋاشىلىق ماقساتتاعى جەر تەلىمدەرى جاپپاي ساتىلاتىنىن مالىمدەپ، بۇكىل قازاقستان جۇرتشىلىعىن دۇبىرلەتكەن ۇلتتىق ەكونوميكا مينيسترلىگىنىڭ ەكس-ءمينيسترى ەربولات دوساەۆتىڭ تاسى تاعى دا ورگە دومالايتىن سىڭايى بار.

اتا-بابامىز بىلەكتىڭ كۇشىمەن، نايزانىڭ ۇشىمەن قورعاعان اتامەكەنىمىزدىڭ 1 ميلليون جەتى ءجۇز مىڭ  گەكتارىن، جالپى كولەمى ليتۆا مەن لاتۆيا مەملەكەتتەرىنىڭ جەرىندەي اۋماقتى ساتىپ، ەل ەكونوميكاسىن قارىق قىلماق بولعان شەنەۋنىك ەندى  «قازاقستاننىڭ تۇرعىن ءۇي قۇرىلىس جيناق بانكى» اق ديرەكتورلار كەڭەسىنىڭ توراعاسى بولىپ سايلاندى. مينيسترلىك لاۋازىمىنان بوساي سالا، دوساەۆ بوس جۇرمەي «بايتەرەك» ۇلتتىق باسقارۋشى حولدينگى» اق باسقارما توراعاسى بولىپ قىزمەت ەتە باستاعان بولاتىن.

ارينە، ەربولات دوساەۆتىڭ قىزمەتىنىڭ اۋىسقانىنا نارازىلىعىمىز جوق. دەسە دە، ءبىزدىڭ بيلىك كەشە عانا جەر ماسەلەسىندە بار كىنانى ەكس-ءمينيستردىڭ باسىنا ءۇيىپ-توگىپ، وزدەرى سۇتتەن – اق، سۋدان – تازا بولا قالىپ ەدى. ەندى مىنە، «جەر جايىنداعى مەملەكەتتىڭ ۇستانىمىن حالىققا دۇرىس تۇسىندىرە الماعان» شەندىگە «قازاقستاننىڭ تۇرعىن ءۇي قۇرىلىس جيناق بانكىنىڭ» تىزگىنىن ۇستاتا سالىپ وتىر.

دەمەك، جەر داۋىنا باستى «كىنالى» ەربولات دوساەۆ بولماعانى عوي. اۋىلشارۋاشىلىعى مينيسترلىگىنىڭ ەكس-توراعاسى اسىلجان مامىتبەكوۆ تە قازىر "استانا" بانكىنىڭ تاۋەلسىز ديرەكتورى بولىپ الدى. دەمەك، ول دا جەر داۋىنا "كىنالى" ەمەس.

وندا كىم؟ ەكس-مينيسترگە ەلباسىنىڭ الدىندا باسىن سالبىراتىپ تۇرىپ كەشىرىم سۇراتىپ، ارتىنشا جارىلقاپ جاتقان قاي دوكەي؟

ءسىز نە دەيسىز؟

ءشارىپحان قايسار

Abai.kz