وبلىس اكىمى اماندىق باتالوۆ تالدىقورعان قالاسىندا سالىنىپ جاتقان جانە قايتا جاڭعىرتىلۋ ۇستىندەگى 12 نىساندى ارالادى. تالدىقورعان وبلىس ورتالىعى بولعاندىقتان ونىڭ كەسكىن-كەلبەتى، ساۋلەت-قۇرىلىستىق بەينەسى زامان تالابىنا ساي، ساپالى ءارى كورنەكتى بولۋى شارت.

دەگەنمەن بىرقاتار نىسانداردىڭ مۇنداي تالاپقا ءالى دە ساي ەمەستىگى بايقالدى.

اكىم اتباسىن تۇرعان العاشقى نىسان – اۋەجاي. مۇندا جوندەۋ جۇمىستارى بىلتىرعى جىلى باستالعان. قۇرىلىس جۇمىستارىنىڭ اياقتالۋى بيىلعى جىلدىڭ قىركۇيەك ايىنا مەجەلەنىپ وتىر. الايدا اكىمشىلىك عيماراتى مەن قوسالقى بلوكتاردا جاسالىپ جاتقان جۇمىستار ءالى باياۋ. قۇرىلىسقا قارقىن قوسۋ تۋرالى وبلىس باسشىسى قاتاڭ ەسكەرتىپ، ورىنباسارى عالىمجان ابدىرايىموۆقا بۇل ءىستى باقالاۋعا الۋدى تاپسىردى.

قالانىڭ شىعىس بولىگىندەگى سكۆەردە جۇرگىزىلىپ جاتقان ىسكە دە وبلىس اكىمى ا. باتالوۆ بىرقاتار سىن ايتتى. مامىردا قولدانىسقا بەرىلۋى ءتيىس نىسان تەك مەرزىمى جاعىنان عانا كەشەۋىلدەپ قويماي، ەندىگى كوك شالعىنعا كومكەرىلىپ تۇرۋى ءتيىس ورىن ازىرگە تاقىر كۇيدە تۇر. تەك ساۋلەتتىك كومپوزيتسيا مەن بىرنەشە جارىق باعانالارى عانا ورناتىلعان. الداعى ۋاقىتتا سكۆەر اتاۋىن «كوكتەم» دەپ اۋىستىرىپ، ىسكە قوسۋ مەرزىمىن جىلدامداتۋ تاپسىرىلدى.

«تالدىقورعان» يندۋستريالدى ايماعى ەرەكشە نازاردا. بۇل ايماققا ينفراقۇرىلىم جۇرگىزۋ – ينۆەستور تارتۋدىڭ ەڭ ءتيىمدى جولى. سوندىقتان وسى ءىستى تىندىرىمدى ورىنداۋ باستى ماقسات بولۋعا ءتيىس. سونداي-اق، زاڭسىز قۇرىلىسقا مۇندا دا جول بەرىلمەۋى ءتيىس.

كۇنى ەرتەڭ پايدالانۋعا بەرىلەتىن قاراتال جاعالاۋى دا اكىمنىڭ نازارىنان تىس قالعان جوق. قالالىقتار مەن قالا قوناقتارىنىڭ سۇيىكتى ورىندارىنىڭ بىرىنە اينالاتىن دەمالىس اللەياسىندا تازالىق پەن ءتارتىپ ساقتالۋى قاجەت. حالىقتىڭ يگىلىگىنە جاسالعان ورىندى كۇتىپ ۇستاۋ ءاربىر ازاماتتىڭ مىندەتى ەكەنىن تۇرعىندارعا ءتۇسىندىرۋ، جەتكىزۋ دە – تىندىرىمدى ءىستى قاجەت ەتەدى. وبلىس باسشىسى جاعالاۋعا قاتىستى ءتيىستى سالا باسشىلارىنا وسىنداي تالاپ-مىندەتتەر جۇكتەدى.

تالدىقورعان قالالىق كوپ سالالى اۋرۋحانا قالالىقتار ءۇشىن ۇلكەن قۋانىش بولماق. زاماناۋي تالاپقا ساي جاڭا تەحنيكامەن جاراقتاندىرىلعان، بۇگىنگى مەديتسينانىڭ جاڭا ستاندارتتارىنا ساي اۋرۋحانانىڭ قۇرىلىس جۇمىستارى بىتكەنىمەن، قۇجاتتاندىرۋ جۇمىسى ۇزاققا سوزىلىپ وتىر. بۇل ورايدا ءتيىستى لاۋازىمدى تۇلعالارعا ەسكەرتۋلەر ايتىلدى.

وبلىس اكىمى ا. باتالوۆ وسى كۇنى جانسۇگىروۆ كوشەسىنىڭ جوندەۋ جۇمىستارى، قالانىڭ وڭتۇستىك-باتىسىنداعى كوتتەدج قالاشىعى، قالانىڭ كىرەبەرىس قاقپاسى، ەتنواۋىل، كورمە پاۆيلونى، 16 قاباتتى قوناق ءۇي قۇرىلىستارىنىڭ ءمان-جايىمەن تانىستى.

Abai.kz