راديو سۆوبوداعا بەرگەن تۇسىنىكتەمەسىندە گوستەۆ ورىن العان اپاتتى جاسىرۋ ءۇشىن مەتروپوليتەن باسشىسى دميتري پەگوۆ قاراماعىنداعىلارعا ءباسپاسوز وكىلدەرىمەن سويلەسۋگە تىيىم سالىپ جاتىر دەيدى. ول سونىمەن بىرگە مەتروداعى اقاۋدىڭ بار ەكەنىن جانە جەراستى جولدارىن جوندەۋگە قارجىنى قىسقارتۋعا قارسى شىققان كاسىپوداق وكىلدەرىن جۇمىستان شىعارۋعا ارەكەت ەتىپ جاتقانىن دا ايتادى.

ونىڭ سوزىنشە، ماسكەۋلىك مەتروداعى اپاتتىڭ كوبى تەحنيكالاردىڭ ەسكىرگەنىنەن بولادى. ۆاگون، ەسكالاتوردىڭ دەنى سسرو داۋىرىندە سالىنعان. تاعى ءبىر سەبەپ – "قوسالقى بولشەكتەر مەن قۇرال-جابدىقتار تابۋ وتە قيىن".

"بىزدە 12 شاقىرىم رەلستىڭ تەك ەكەۋىن عانا وزگەرتتى. الپىس مىڭداي تەمىر جول شپالدارىنىڭ تەك 800-دەيىن عانا جاڭارتتى. مۇنداعى جاعداي وتە ناشار. مۇنىڭ ءبارى مەتروپوليتەنگە جۇمسالاتىن شىعىندى ازايتۋ ءۇشىن جاساپ وتىر", – دەپ مالىمدەيدى تاۋەلسىز كساىپوداق وكىلى. ول مەترو باسشىلىعىنىڭ ارەكەتتەرى ادام ولىمىنە اكەلۋى مۇمكىن دەپ ەسكەرتەدى.

تاۋەلسىز كاسىپوداق باسشىلىعى مەترو جۇمىسشىلارى مەملەكەتتىك دۋما دەپۋتاتتارىنا، ماسكەۋ مەرىنە، باسپروكۋراتۋرا مەن كولىك مينيسترلىگىنە حات جازعان. الايدا گوستەۆتىڭ سوزىنشە، مەكەمە وكىلدەرىنەن تەك فورمالدى جاۋاپ كەلگەن.

اباي-اقپارات