رەسەيدىڭ مەملەكەتتىك دۋماسىنىڭ وتانداستارمەن ەكونوميكالىق دوستاستىق جانە بايلانىس كوميتەتىنىڭ توراعاسى لەونيد سلۋتسكي تمد ەلدەرىنىڭ ىشىندە تاجىكستان ەاەو-عا كىرۋ ءۇشىن ۇلكەن ارەكەتتەر جاساپ جاتىر دەپ مالىمدەدى. سلۋتسكي تاجىكستان ەكونوميكاسىنىڭ قازىرگى جاعدايى وداقپەن ينتەگراتسيالاۋعا تولىق دايىن ەمەس ەكەنىن ايتىپ، بىراق ۇيىمعا مۇشە بولىپ ەنگەننەن كەيىن ەكونوميكاسىنىڭ وسۋىنە جاڭا يمپۋلس الادى ءارى ەڭبەك ميگراتسياسىنا بايلانىستى جەڭىلدىكتەر قاراستىرىلادى دەدى.

تاجىكستاننىڭ ستراتەگيالىق زەرتتەۋلەر ورتالىعىنىڭ ديرەكتور ورىنباسارى سايفۋللو سافاروۆ وزودي راديوسىنا (ازاتتىقتىڭ تاجىك قىزمەتى) قازىرگى جاعدايدا تاجىكستان ەۋرازيالىق ەكونوميكالىق وداققا كىرۋگە اسىقپايدى دەيدى. ونىڭ ايتۋىنشا، ەگەر رەسەي تاجىكستان وداققا قوسىلعان العاشقى جىلدارى كەتكەن شىعىننىڭ ورنىن تولتىراتىن بولسا، وندا ەشقانداي پروبلەما بولمايدى. اتاپ ايتقاندا، ەلدىڭ بيۋدجەتىنە كەدەن سالىعىنان جينالاتىن اقشانىڭ ورنىن تولتىرۋ كەرەك. ۇيىمعا كىرگەن جاعدايدا، كەدەن قىزمەتىنەن اقشا تۇسپەيدى.

​بيىلعى جىلى كەدەن سالىعى بويىنشا بيۋدجەتكە تۇسەتىن اقشانىڭ كولەمى 684 ميلليون 670 مىڭ سومونيدى قۇراعان. ساراپشىلار پىكىرىنشە، تاجىكستان وداققا مۇشە بولعان جاعدايدا، اتالعان قارجىنىڭ نەگىزگى بولىگى بيۋدجەتكە تۇسپەيدى. ەكىنشى جاعىنان تاجىكستاندا رەسەيلىك ءىرى كومپانيالار شاعىن تاجىك كومپانيالارىنىڭ ورنىن باسادى، باسەكەلەستىك جويىلادى. بۇل قازىر قازاقستان مەن قىرعىزستاندا بايقالىپ وتىر دەپ اتاپ وتەدى ساراپشىلار.

ءۇش جىل بۇرىن تاجىكستاننىڭ ساۋدا جانە ەكونوميكالىق دامۋ مينيسترلىگىندە ەلدىڭ وداققا كىرۋدىڭ پايدالى جانە زيان تۇستارىن زەرتتەيتىن جۇمىس كوميسسياسى قۇرىلعان بولاتىن.

اباي-اقپارات