ماكاروندى سۇيسىنە جەمەيتىن ادام كەمدە-كەم بولار.  دۇكەن سورەلەرىندەگى سان ءتۇرلى سامساعان ءونىم قيالىڭدى شارىقتاتىپ، اس ۇيدەگى  جاننىڭ ارقيلى ءدامدى اس دايىنداۋىن جەڭىلدەتكەندەي.   ماكارون وتانداستارىمىزدىڭ قالاۋلى  اس-اۋقاتتارىنىڭ ءبىرى ەكەندىگى ايدان انىق. ءوزىڭ سۇيسىنەتىن  اسىڭنىڭ پايدالى بولىپ شىعۋى ءتىپتى تاماشا ەمەس پە؟!

ەكىباستۇزدىق كازناۋيەۆتەر وتباسى وتكەن جىلدىڭ باسىندا وڭىرلىك كاسىپكەرلەر پالاتاسىنىڭ ەكىباستۇز قالاسىنداعى فيليالىنىڭ قىزمەتىنە جۇگىنەدى. ولار  مۇندا بايىتىلعان ماكارون ءونىمىن ءوندىرۋ جونىندەگى بيزنەس-يدەياسىمەن ءبولىستى.  ءسويتىپ، ولار پالاتادا «بيزنەس-كەڭەسشى» كۋرسى بويىنشا وقىتۋدان ءوتتى، ال كاسىپكەرلەر ءۇشىن مەملەكەتتىك گرانتتارعا كونكۋرس جاريالانعان كەزدە 2012-2020  جىلدارى  مونوقالالار  دامىتۋ باعدارلاماسىنا قاتىسۋعا  ءوتىنىم بەرىپ، باعىن سىناماقشى بولدى.

جاڭاشىل جوبا بويىنشا  بيزنەس-جوسپار ازىرلەگەن ولار مەملەكەتتەن  3 ميلليون تەڭگە كولەمىندە گرانت ۇتىپ الدى.

بيزنەس-حانىم جۇلدىز كازناۋيەۆا بىلاي دەيدى: «مەن ۇزاق ۋاقىت بويى اياق كيىمدى جەكەلەي ساتۋمەن شۇعىلداندىم. الايدا قازىر ساتۋ ونشا كوپ پايدا اكەلمەيتىنى بارشامىزعا ايان، ونىڭ ۇستىنە باسەكەلەستىك تە كۇشتى.  سول كەزدە مەن كاسىپتى اۋىستىرۋ جايلى ويلانا باستادىم. سونىمەن قاتار ۇلىمنىڭ دەنساۋلىعى دا سىر بەرە باستادى، دارىگەرلەر گليۋتەنسىز ديەتا تاعايىندادى.  قۇرامىندا كلەيكوۆينا جوق نان سالىپ، ارنايى پەشتە ءپىسىردىم، رەسەي نەمەسە قازاقستاننىڭ ءىرى قالالارىنان   ينتەرنەت ارقىلى ماكارون ونىمدەرىنە تاپسىرىس بەرە باستادىم،  ويتكەنى ءبىزدىڭ دۇكەندەرىمىزدە مۇنداي ونىمدەر جوق بولاتىن»،– دەپ سىر ءبولىستى كاسىپكەر.

كۇندەلىكتى تىرشىلىكتە  بايىتىلعان ماكارون ونىمدەرىن پايدالانا وتىرىپ، ولاردىڭ قۇرامىنا زەر سالدى،  سويتسە كادىمگى جانە گليۋتەنسىز ماكاروندارمەن قاتار ەمدىك جانە الدىن الۋ قاسيەتتەرى بار ماكارون ونىمدەرى دە بولادى ەكەن. 

بۇگىنگى تاڭدا كوپ ادامداردىڭ  سالاۋاتتى ءومىر سالتىن ۇستانىپ، پايدالى اس ىشۋگە ۇمتىلۋى دا كوكەيكەستى ماسەلە بولىپ شىقتى. البەتتە، ءار ءتۇرلى اۋرۋمەن اۋىراتىن جاندار دا كوپ. بىراق پايدالى ونىمدەر وتە از. بۇل ولقىلىق تا بيزنەس-يدەيانى جۇزەگە اسىرۋعا تۇرتكى بولدى.

«وتباسىمىز كەڭەسە كەلە ءبىزدىڭ ايماقتاعى كاسىپكەرلەر پالاتاسىنا ءوتىنىش جاساۋدى ۇيعاردى. ولار ءوز كەزەگىندە بىزگە مەملەكەتتەن گرانت ۇسىنۋ ءتارتىبىن  ءتۇسىندىردى. كاسىپكەرلەر پالاتاسىندا وقۋ كوپ كومەگىن تيگىزدى.  بۇرىن باسىمىزعا كىرىپ-شىقپاعان بيزنەس-يدەيالار جايلى اڭگىمەلەر ايتىلدى»، – دەپ ەسكە الادى ج.كازناۋيەۆا.

«سەرتيفيكات  الىپ، بايىتىلعان ماكارون شىعارۋ بويىنشا بيزنەس-جوسپار ازىرلەدىك.  2016 جىلدىڭ ناۋرىزىندا ءوندىرىستى ىسكە قوستىق، قازىر بيداي  ۇنىنان جاسالعان  ءبىرىنشى جانە جوعارى سۇرىپتى ماكارون ونىمدەرى شىعارىلۋدا.  جۋىردا  قاراقۇمىق، جۇگەرى ماكاروندارى شىعارىلماقشى، سونىمەن قاتار توپينامبۋر ۇنىنان ءونىم جاساۋ دا جوسپاردا  تۇر. توپينامبۋر قۇرامىندا  گليۋتەن  جوق،  قان ديابەتىمەن اۋىراتىن ادامداردىڭ قولدانۋىنا بولادى. 

ءبىر ايتا كەتەرلىگى، بايىتىلعان ماكاروننىڭ پايدالى قاسيەتتەرى مول-اق. كادىمگى ماكاروندا گليۋتەن بار.  گليۋتەن – ءداندى داقىلداردىڭ كوبىندە بار بەلوك.  بۇل بەلوكتى كوتەرە المايتىندارعا دارىگەر قاۋىپسىز ديەتا ساقتاۋعا كەڭەس بەرەدى،  ياعني وسى جات بەلوكتى تولىعىمەن شىعارىپ تاستاۋ. بىراق ماكاروندى سونشالىقتى جاقسى كورەتىندەر نە ىستەۋى كەرەك؟   

قوسپالارمەن دايىندالعان ماكارون ونىمدەرى  ادام ومىرىنە اسا قاجەت، تابيعي تۇردەگى  ميكروەلەمەنتتەرگە باي جانە ادام اعزاسى جاقسى سىڭىرەدى.  مىسالى، قاراقۇمىق جارماسىنان جاسالعان قوسپالار تەمىردى 5-6 ەسە، ماگنيدى 8-9 ەسە،  كاليدى 2 ەسە، ۆ توبىنداعى دارۋمەندەردى 2 ەسە، ال سۇلى جانە  بيداي  جارماسىنان جاسالعان قوسپالار قۇرامىنداعى وزەكتىڭ بولۋىن  3 ەسەگە كوبەيتەدى.

ال بۇرشاق، كۇرىش، سويا قوسقان ونىمدەر بەلوكتىڭ قۇرامىن 30-40% ۇلعايتادى. جۇگەرىمەن بايىتىلعان ۇن ونىمدەرى ولاردىڭ دامدىك قاسيەتىن ارتتىرىپ قانا قويماي،  ولارعا جاعىمدى سارى رەڭك قوسادى  جانە جاقسى قورىتۋعا اسەر ەتەدى.  

قازىرى تاڭدا قالادا جاڭا ونىمگە دەگەن سۇرانىس جاقسى، سوندىقتان ماكاروننىڭ 9 ءتۇرى  شىعارىلۋدا.  كاسىپكەرلەر ءوندىرىستى بۇدان بىلاي دا دامىتا بەرۋدى جوسپارلاپ وتىر. 

Abai.kz