ء«جۇز جىلدىق جالعىزدىقتان» بۇرىن «اق كەمەنى» وقىپ شىققانبىز.
جەتى جاستاعى جەتىم بالانىڭ ەرەسەكتەردىڭ قاتىگەزدىگىنەن جالىعىپ، اكەسىن ىزدەپ، ىستىقكولدىڭ سۋىنا قويىپ كەتۋى... اڭىز بويىنشا، ەنەسايدان قىز بەن بالانى اسىراپ، ىستىقكولگە اكەلىپ، باققان بۇعىنى كەيىن ءمۇيىزى ءۇشىن قىرىپ-جويۋدى ايتساڭىزشى. جىلاعاندا ۋاتا الماي قويعان بالاعا بەسىك سىيلاۋى. قىرعىز سول بەسىككە تەربەلىپ وسەدى، اڭىز بويىنشا. ايتپاقشى، بولوتبەك شامشەۆ تۇسىرگەن «اق كەمە» ءفيلمىنىڭ سوڭعى ەپيوزدتارىندا بۇعىنىڭ ءمۇيىزىن شاۋىپ جاتقاندا بەسىكتى بالتالاپ جاتقان كادرمەن ءساتتى ۇيلەستىرىپ بەرەدى. ياعني، ءوزىڭدى اسىراعان اناڭا قول كوتەرمەڭدەر، جاتقان بەسىگىڭدى وتىن قىلماڭدار دەگەندى ايتماتوۆ انىق مەڭزەپ تۇر.
ارىستانبەك مينيستر دە وسى پالساپالىق ويدى باۋىرلاس ەلدى ەكى رەت شايقاعان رەۆوليۋتسيامەن انالوگيا رەتىندە بايلانىستىرعانى بەلگىلى. مۇمكىن، ويىن وقىرمان دا، كورشى حالىق تا «شىڭعىس ايتماتوۆ انە، قانداي اقىلدى بولعان، ال سەندەر سونى ۇقپادىڭدار» دەپ ءتۇسىنىپ قالاتىنداي قارابايىر بەرگەن شىعار، ءساتسىز سالىستىرۋ دا بولعان شىعار، بىراق قالاي دەگەنمەن «اق كەمەنىڭ» ايتار ويى بۇگىن قاي ۇلت، قاي مەملەكەتكە بولسىن، ارتىق ەتپەيدى.
بۇل ويدىڭ ءتۇبىرىن جاقسىلىقتى ۇمىتۋ، جاقسىلىققا شۇكىر ەتپەۋ، اسىرەقىزىل الاكوزدەنۋ مەن تىنىشتىقتى شايقاۋ، بەيبىت ۇيلەسىمدى بۇزۋ دەپ ىزدەسەڭىزدەر دە، پاتشا كوڭىلدەرىڭىز ءبىلسىن.
ىشتەرىڭىز سەزەدى، ءمينيستردىڭ سوزىندە كورشى اعايىندى كەمسىتۋ دەگەن استارلى وي بولمادى. كورشىنى كەمسىتۋ ارقىلى باسقانى جوعارى قويۋ دا ماقساتى بولماعان سەكىلدى. بىراق، قايتەسىز، ول باۋىرلاستىڭ تاعدىرىنا كەلگەندە ساياساتكەردىڭ سۋىق اقىلى، قاساڭ سوزىمەن ەمەس، شىن جانى اشىعان باۋىردىڭ ءسوزى اۋزىنان شىققانداي كورىندى. ماسكەۋدىڭ قوعامدىق اجەتحانالارىن جۋىپ جۇرگەن جاپ-جاس قىزداردىڭ تاعدىرىنا جانى اشىعاندا، ساياساتتىڭ تابى سىڭبەگەن ونەر ادامىنىڭ پوزيتسياسىمەن، بىلايشا ايتقاندا، ەموتسيامەن سويلەگەندەي.
سوسىن رەسەيدە 600 مىڭداي قىرعىزدىڭ جانباعىس پەن كۇنكورىس ءۇشىن جۇرگەنى، ولاردىڭ قىرعىز ەكونوميكاسىنىڭ ءىجو-ءنىڭ 32 پايىزىنا دەيىن تولتىراتىن اقشا جىبەرىپ وتىرعانىن دا بىلەمىز. ياعني، ارىستانبەك جالعان سويلەگەن جوق. قىرعىز وكىمەتى ءوز ەلىندە سول اجەتحانا جۋعا دا لايىقتى جاعداي جاساپ بەرمەگەن سوڭ، جاستار جان-جاققا تاراپ كەتتى ەمەس پە؟
ايتەۋىر، انىق بىلەتىنىم، ارىستانبەك اعايىندى ارازداستىرايىن دەپ ەمەس، قازىرگى حالىنە جانى اشىپ،  تاعدىرىنا الاڭداپ، بولاشاعىنا تىلەك ءبىلدىرۋ نيەتىندە ايتتى. ءيا، دامدەۋشى ءسوزى ارتىق كەتىپ، سوڭعى ءتۇيىنىن ءوزى قويماي، باسقالارعا بەرگەنمەن، نيەت-پىكىرى سونداي بولعان سىقىلدى.
سوسىن، بىلۋىمشە، ەشبىر ساياسي كلاننىڭ مۇشەلىگىندە جوق، ەش بالاسى شەتەلدە وقىمايتىن، ەلباسىنا ادال، جۇمىسىنا بەرىك مينيستر بولسا، وسى وسى ارىستانبەك. ايتپەسە، جوعارىداعى سويلەمنىڭ العاشقى ەكى سيپاتىنا ساي ەمەس مينيسترلەر بىزدە كوپ-اق. قوي. سولارعا سىن جەبەسىن باعىتتاساق نەتتى؟

ەرلان ءابدىرۇلى

FB-داعى پاراقشاسىنان الىندى