بۇل تۋرالى ءوڭىر باسشىسى ب.اتامقۇلوۆ وبلىستىق دەپۋتتارمەن وتكەن ەسەپتى كەزدەسۋدە مالىمدەدى.

وندا وبلىس اكىمى وڭىردە ءى جارتىجىلدىقتىڭ قورىتىندىسىمەن اۋىل شارۋاشىلىعىنىڭ ءونىم كولەمى 123 ملرد. تەڭگەنى قۇراپ، 2 پايىزعا ارتقانىن ايتتى. ال ەگىس كولەمى وتكەن جىلدان 13 مىڭ گەكتارعا ارتىپ، 788 مىڭ گەكتاردى قۇراعان.

ەسەپتى كەزدەسۋدە ءمالىم بولعانداي اگرارلى ايماقتىڭ شارۋالارى وسى جىلى داندىك جۇگەرىدەن 108,4 مىڭ توننا، كوكونىستەن 811 مىڭ توننا، باقشادان 1 252 مىڭ توننا، كارتوپتان 195 مىڭ توننا، ماساقتى داقىلداردان 470 مىڭ توننا ءونىم جيناعان. سونداي-اق، وبلىستا العاش رەت بيدايدىڭ ورتاشا ونىمدىلىگى 22 تسەنتنەردى قۇراپ، رەكوردتىق ءونىم الىنىپ وتىر.

جيىندا ايماق باسشىسى تامشىلاتىپ سۋعارۋ ءادىسى قوسىمشا التى مىڭعا جۋىق گەكتارعا ەندىرىلىپ، جالپى كولەمى 49,7 مىڭ گەكتارعا، ال جىلىجايلار قوسىمشا 72 گەكتارعا سالىنىپ، جالپى 1 098 گەكتارعا جەتكەنىن ايتتى. ايتا كەتەيىك، جالپى ەلىمىز بويىنشا جىلىجايلاردىڭ 87% وڭتۇستىك ۇلەسىندە. وسى جىلىجايلاردان 80 مىڭ توننا كوكونىس ونىمدەرى جينالدى.

دەرەككوزى: وقو اكىمىنىڭ ءباسپاسوز قىزمەتى

Abai.kz