بۇگىنگى تاڭدا كەنتاۋ قالاسى يندۋستريالدى ايماعىندا تاعى ءبىر جوبانىڭ ىرگەتاسى قالانۋدا. جەكە كاسىپكەر ەرمەك اۋەزوۆ «وتتەكتى وڭدەپ شىعارۋدى ۇيىمداستىرۋ» جوباسى بويىنشا جاڭا تسەحتىڭ قۇرىلىسىن باستادى. بۇل تۋرالى "اباي-اقپارات" وڭتۇستىك قازاقستان وبلىسى اكىمىنىڭ ءباسپاسوز قىزمەتىنە سىلتەمە جاساي وتىرىپ حابارلايدى.

قۇنى 45 ميلليون تەڭگە بولاتىن جوبا اياسىندا ءوندىرىس ورنىندا جىلىنا 25500 دانا وتتەك باللونىن تولتىرۋ كوزدەلۋدە. جاڭا تسەحقا بولىنگەن جەر تەلىمى 0,25 گەكتار. قاراجات ماسەلەسى ەكىنشى دەڭگەيلى بانك - «سبەربانك» اكتسيونەرلىك قوعامى ارقىلى شەشىلۋدە. 
2017 جىلى پايدالانۋعا بەرىلەتىن تسەح تولىق قۋاتتىلىققا شىعىپ، ىسكە قوسىلعاندا 10 ادام جۇمىسپەن قامتىلاتىن بولادى. بۇگىندە اۋماعى 25 گەكتاردى قۇرايتىن كەنتاۋ قالاسىنىڭ يندۋستريالدى ايماعىندا بۇدان بولەك 4 جوبا بار. ونىڭ ەكەۋى ترانسفورماتورعا قاجەتتى قۇرىلعىلاردى شىعارۋمەن جانە اسفالت-بەتون قوسپاسىن وندىرۋمەن اينالىسسا، قالعان ەكى جوبانىڭ قۇرىلىسى جۇرگىزىلىپ جاتىر. ولار ىسكە قوسىلعاندا كەنتاۋدا ترانسفورماتور بولشەكتەرىن شىعارۋ جانە بەنتونيت ۇنتاعىن ءوندىرۋ زاۋىتتارى ىسكە قوسىلاتىن بولادى.

ايتا كەتەيىك، مەملەكەت باسشىسى 2016 جىلدىڭ 1 قاڭتارىنان «5 ينستيتۋتتىق رەفورمانى جۇزەگە اسىرۋ بويىنشا 100 ناقتى قادام» – ۇلت جوسپارىن ورىنداۋدىڭ پراكتيكالىق كەزەڭى باستالعانىن حابارلاعان ەدى. 

"مەملەكەتتى، ەكونوميكا مەن قوعامدى دامىتۋ ءۇشىن قاعيداتتى جاڭا قۇقىقتىق ورتا قالىپتاستىراتىن 59 زاڭ كۇشىنە ەندى. بىزگە تاريحىمىزداعى بۇرىن-سوڭدى بولماعان اۋقىمداعى ۇلتتىق زاڭناماعا وزگەرىستەردى باعامداۋ ماڭىزدى. ونىڭ ۇستىنە، ولار ءبىزدىڭ قازاقستاندىق ارمانىمىز – ءححى عاسىردا كوشباسشى وتىز ۇلتتىڭ ءبىرى بولۋعا قول جەتكىزۋىمىزگە جول اشادى",-دەدى مەملەكەت باسشىسى.

Abai.kz