ۇكىمەتتىڭ ءۇش جىلعا ارنالعان  بيۋدجەتتىك جوسپارىن تالقىلاۋ بارىسىندا ءماجىلىس دەپۋتاتى مۇحتار تىنىكەەۆ ەلىمىزدەگى ەڭ تومەنگى جالاقى مولشەرىنە كوڭىلى تولمايتىنىن ايتىپ، قر قارجى ءمينيسترى باقىت سۇلتانوۆقا شۇيلىكتى. 

«قازاقستانداعى ەڭ تومەن ايلىق جالاقى مولشەرى 24 مىڭ 459 تەڭگەنى قۇرايدى ەكەن. 24 مىڭ تەڭگە دەگەن نە؟ راس، ەلىمىزدەگى زەينەتاقىنىڭ ەڭ ازى 28 مىڭ تەڭگە. دۇرىس، ءبىز اتا-انالارىمىزعا، جالعىزباستى قارتتارعا تولەپ وتىرعان اقشا بۇل. ال 24 مىڭ تەڭگە دەگەن نەگە جەتەدى؟ سىزدەر وسى، تومەنگى جالاقى كورسەتكىشىن تۇزگەندە نەنى ويلاپ، نەگە سۇيەنىپ جاسايسىزدار؟! ءتىپتى جول ەرەجەسىن بۇزعان ادامعا كەسىلگەن ايىپپۇل مولشەرىنىڭ ءوزى 20 مىڭ تەڭگەدەن  اسىپ جىعىلادى. سوندا ول قالعان 4 مىڭ تەڭگەنى قاي جاعىنا جەتكىزەدى؟!»،-دەپتى دەپۋتات تىنىكەەۆ.

حوش، دەپۋتاتتىڭ دەگەنى داۋسىز، دۇرىس. بۇل ەلىمىزدەگى ەكونوميكالىق ءام ساياسي داعدارىس دەندەپ، ازىق-تۇلىك، الەۋمەتتىك تولەمدەر اقىسى ادىم-ادىمداپ اسپانداپ بارا جاتقان قىىلتاياڭكەزەڭدە قازاقستاندىقتاردىڭ الەۋمەتتىك جاعىنان از قامتىلعان توبىنا كورسەتكەن قولداۋ، جاعدايىنا الاڭداۋشىلىق ءبىلدىرۋ ەكەنى راس. تىنىكەەۆتىڭ كوپ الدىندا كوسىلىپ ايتقاندارى الگى 24 مىڭدى تالعاجاۋ ەتىپ وتىرعان وتباسىلاردىڭ ماسەلەسىن شەشىپ بەرمەسە دە، كوڭىلدەرىن كۇپتى قىلىپ قويعانى دا راس.

باق-تاعى دەرەكتەرىنە قاراساڭىز، دەپۋتات تىنىكەەۆ قر پارلامەنتىندەگى ەڭ بەلسەندى دەپۋتاتتاردىڭ ءبىرى. ول سپورتتاعى لەگيونەرلەردىڭ تىم جوعارعى جالاقى الاتىنىن ايتىپ، قر مادەنيەت جانە سپورت ءمينيسترىن سىباپ تاستاعان. ءتىپتى، ءبىر كەزدەرى ءوزىنىڭ ارىپتەسى، دەپۋتات گۇلجان قاراعۇسوۆاعا عاشىق ەكەنىن دە جاسىرماعان. بىلتىر، قىستىڭ كۇنى قىراۋدا، قار قۇرساۋىندا قالىپ قويعانى ءۇشىن، مينيستر بوجكو مەن قاسىموۆتى جاۋاپقا تارتۋدى دا ۇسىنعان وسى تىنىكەەۆ ەدى. راس وتىرىگى قۇدايعا عانا ايان، قر ۇكىمەتىندە تىنىكەەۆ تيىسپەگەن مينيستر جوق-اۋ.

دەسە دە، جوعارىدا جالاقىسى جۇعىنسىز، الەۋمەتتىك از قامتىلعان توپتىڭ جاعدايىنا الاڭداپ وتىرعان تىنىكەەۆتىڭ تابىسى تالايدى جولدا قالدىراتىنى دا جاسىرىن ەمەس. ءبىر سوزبەن ايتساق، بۋرجۋاز دەپۋتاتتىڭ بار بايلىعىن «radiotochka.kz» پورتالى ەسەپتەپ شىعىپتى.

سويتسەك، 2002 جىلدان بەرى ءماجىلىستىڭ II, III, IV, V ي VI شاقىرىلىمىندا وتىرعان مۇحتار  باكىرۇلى ەلباسىنىڭ قولىنان ءۇش بىردەي العىس حات العان ەكەن.

رەسمي تۇردە تىنىكەەۆ ەشبىر كومپانياعا ۇلەسكەر بولماعان. تەك رەسپۋبليكالىق «دايدو دجۋكۋ كۋدو فەدەراتسياسى» قوعامدىق بىرلەستىگىنىڭ ون مۇشەسىنىڭ ءبىرى عانا. دەسە دە دەپۋتات مۇشە بولعان بىرلەستىكتىڭ مەملەكەتتەن العان ايرىقشا جەڭىلدىگى بولسا كەرەك، ءالى كۇنگە دەيىن ءبىر تيىن سالىق بيۋدجەتكە بولىنبەپتى.

-   دەپۋتاتتىڭ قىزى  امينا مۇحتارقىزى (1991 ج.)  «Gold Media ADS», جشس ديرەكتورى ءام نەگىزىن قالاۋشى ەكەن. (2011 جىلى 7 ماۋسىمدا تىركەلگەن. زاڭدى مەكەن-جايى: الماتى ق. نۇرماقوۆ كوشەسى 81). سالىقتىق تولەمى – 0 تەڭگە.

-  باۋىرى ەرتاي تىنىكەەۆ  «ينۆاليدى-چەرنوبىلتسى كاراگاندى» قوعامدىق بىرلەستىگىنىڭ باسشىلىق قۇرامىندا ەكەن.

-   ءبىر قارىنداسى سالتانات تىنىكەەۆا قاراعاندى وبلىستىق مەملەكەتتىك كىرىس دەپارتامەنتىندە قىزمەت ىستەيدى.

-    ەكىنشى قارىنداسى ديانا تىنىكەەۆا (1990 ج.)  قاراعاندى قالاسىندا «پاليترا» يزو-ستۋدياسىنىڭ قوجايىنى.

- ءىنىسى باۋىرجان تىنىكەەۆ «قاراعاندىترانستەلەكوم» اق-نىڭ قاراعاندى قالاسىنداعى فيليالىنىڭ ديرەكتورى.

تىنىكەەۆتىڭ وتباسىنىڭ جيعان-تەرگەنى تۋرالى اشىق دەرەككوزدەرىندە جاريالانعان مالىمەتتەر وسىمەن شەكتەلگەن.

راس، اۋەلدە ايتقانىمىزداي دەپۋتات مۇحتار باكىرۇلىنىڭ باسىندا ەشبىر كومپانيا نەمەسە فيرما تىركەلمەگەنىمەن، ونىڭ جالاقىعا جارىماي جۇرمەگەنى انىق.  سونداي-اق، دەپۋتات تىنىكەەۆ قازاقستاندىق بوكسشى گەننادي گولوۆكيننىڭ شەتەلدەگى جەكپە-جەكتەرىنە ارنايى بارىپ، تاماشالايتىنى تاعى بار. 

پارلامەنت قابىرعاسىنان پىكىر ءبىلدىرىپ، پروبلەما كوتەرگەنى بولماسا، مىنە مىناۋ دەپ كورسەتەردەي تىنىكەەۆتىڭ حالىقتىق تۇعىردان تىندىرعانى شامالى. ەسەسىنە، ەل-ەلدى ارالاپ، الەۋمەتتىك جەلىدە ء«اۋ» دەپ قوياتىنى بار. سويتە تۇرا، مۇحتار تىنىكەەۆتىڭ قايىرىمدىلىق شارالارىنا قاتىسقانى، وتكىزگەنى نەمەسە ۇيىمداستىرعانى تۋرالى دەرەك ايتىلمايدى. مۇمكىن، قايىرىمدىلىق جاساپ جۇرگەن بولۋى كەرەك. ارينە، دەپۋتات تىنىكەەۆتى سوگە جامانداۋ ويىمىزدا جوق.  تەك دەرەكتەرگە شولۋ جاساپ، كوردىك.

ءسويتىپ،  پارلامەنتەگى دەپۋتاتتىڭ پليۋراليستىك پوزيتسيادان پىكىر ءبىلدىرۋى ەكىۇشتى ويعا جەتەلەيتىنى انىق. تىنىكەەۆتىڭ تىكسىنىپ تۇرىپ، مينيستر سۇلتانوۆقا شۇيلىگۋى دەپۋتاتتىڭ شىن مانىندەگى جاناشىرلىعى ما؟ الدە، بۇل  كوپتەن كورىنبەي جۇرگەن دەپۋتاتتىڭ ۇپاي جيناۋ ءتاسىلى مە؟ سونىمەن تىنىكەەۆتىڭ تەپسىنىپ سويلەگەنىنەن، مينيستر سۇلتانوۆتىڭ «تسيفرى» وزگەرە مە؟ ادىلدىگىن ۋاقىت كورسەتەر.

نۇرگەلدى ابدىعانيۇلى

Abai.kz