جاقىندا بىرىككەن ۇلتتار ۇيىمىنىڭ قارۋسىزداندىرۋ كونفەرەنتسياسىندا ءسوز سويلەگەن قازاقستانىڭ جەنەۆاداعى تۇراقتى وكىلى جانار ايتجانوۆا حانىم قازاقستاننىڭ قاۋىپسىزدىك سالاسىندا تاجىربيەسى تۋرالى پىكىرىن ورتاعا سالىپتى.  بۇل تۋرالى «BAQ.kz» پورتالى حابارلادى.

ءسويتىپ، قازاقستان 2017-18 جىلدار ارالىعىندا بۇۇ-نىڭ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە، بەيبىتشىلىك پەن قاۋىپسىزدىكتى قولداۋعا باعىتتالعان بىرقاتار ءىس-شارالاردى جۇزەگە اسىراتىنىن ايتتى.

سونىمەن قاتار، ايتجانوۆا حانىمنىڭ ايتۋىنشا، 2016 جىلدىڭ قاراشاسىندا ەلوردادا وتەتىن «I استانا بەيبىتشىلىك ءسامميتى» (ابس) كەزىندە كونفرەنتسيا قاتىسۋشىلارىنا تۇڭعىش رەت «يادرولىق قارۋسىزداندىرۋ جانە قاۋىپسىزدىك سالاسىنا قوسقان ۇلەسى ءۇشىن» «حالىقارالىق نازارباەۆ سىيلىعى» تابىستالاتىنىن حابارلادى.

ەستەرىڭىزگە سالا كەتەيىك،  بيىل 29-تامىز كۇنى استانادا وتكەن  «يادرولىق قارۋسىز الەم قۇرۋ» اتتى حالىقارالىق كونفەرەنتسيانىڭ پلەنارلىق ءماجىلىسىن قورىتىندىلاعان پرەزيدەنت نۇرسۇلتان نازارباەۆ يادرولىق قارۋسىزداندىرۋ سالاسىنداعى ارنايى سىيلىقتى تاعايىنداۋ كەرەكتىگىن ايتقان بولاتىن. الايدا ول كەزدە ناقتى قانداي سىيلىق بولاتىنى رەسمي بەكىتىلمەگەن ەدى.

 «ول يادرولىق قارۋسىز بەيبىتشىلىك ءۇشىن سىيلىق بولاتىن شىعار. بالكىم، يادرولىق قارۋسىزداندىرۋ ءۇشىن بەرىلەدى. ءبىز ونداي پرەميانى تاعايىنداۋدى ءوز قولىمىزعا الامىز. يادرولىق قارۋسىزداندىرۋ دەپ العان دۇرىس شىعار. سەبەبى بەيبىتشىلىك ءۇشىن ءبىر ەمەس، بىرنەشە سىيلىق بار سياقتى. ءبىز ويلاستىرىپ، ول سىيلىقتى تاعايىنداۋ تۋرالى شەشىمدى قابىلدايتىن بولامىز. قاراشا ايىندا استانا قالاسىندا بەيبىتشىلىك ءسامميتى وتەدى. سول جەردە سىيلىقتى تاعايىنداپ، العاشقى لاۋرەاتىن اتاۋعا بولادى دەپ ويلايمىن»,-دەگەن بولاتىن مەملەكەت باسشىسى ن.نازارباەۆ.

Abai.kz