بۇل تۋرالى ءوڭىر باسشىسى ەلباسى تاراپىنان بەرىلگەن بىرقاتار تاپسىرمالاردىڭ ورىندالۋ جايى قارالعان ماجىلىستە ايتتى.

«وڭتۇستىكتىڭ تاماق ونەركاسىبىن دامىتۋداعى الەۋەتى ارتىپ كەلەدى. بۇگىندە سايرام، ماقتارال، سارىاعاش اۋداندارى وندىرگەن ونىمدەرىن ەكسپورتتاپ كەلەدى. وسى باعىتتاعى جۇمىستاردى جانداندىرۋ ماقساتىندا ەكسپورتتالاتىن ونىمدەردىڭ تىزبەسىن جاساپ، بىرىڭعاي «وڭتۇستىك ەكسپورت» باعدارلاماسىن دايىنداۋدى تاپسىرامىن»،-دەدى ايماق باسشىسى.

سونداي-اق، وبلىس اكىمى تازا ءونىم ەكسپورتتاۋ ءۇشىن، ءوڭىردىڭ ءوز برەندىن قالىپتاستىرۋ قاجەتتىگىن اتاپ ءوتتى.

ماجىلىستە ايماق باسشىسى اۋدان، قالا اكىمدەرىنە ءوز ءونىمىن ەكسپورتتاۋعا قاۋقارلى ءاربىر تاۋاروندىرۋشىگە بارىنشا قولداۋ كورسەتۋ قاجەتتىگىن ايتىپ، اۋداندا وندىرىلەتىن ونىمدەردىڭ تىزبەسىن جاساۋدى نىقتاپ ايتتى.

ايتا كەتەيىك، ەلباسى 2016 جىلدىڭ 1 قاڭتارىنان «5 ينستيتۋتتىق رەفورمانى جۇزەگە اسىرۋ بويىنشا 100 ناقتى قادام» – ۇلت جوسپارىن ورىنداۋدىڭ پراكتيكالىق كەزەڭى باستالاتىنىن حابارلاعان بولاتىن.

«مەملەكەتتى، ەكونوميكا مەن قوعامدى دامىتۋ ءۇشىن قاعيداتتى جاڭا قۇقىقتىق ورتا قالىپتاستىراتىن 59 زاڭ كۇشىنە ەندى.

بىزگە تاريحىمىزداعى بۇرىن-سوڭدى بولماعان اۋقىمداعى ۇلتتىق زاڭناماعا وزگەرىستەردى باعامداۋ ماڭىزدى. ونىڭ ۇستىنە، ولار ءبىزدىڭ قازاقستاندىق ارمانىمىز – ءححى عاسىردا كوشباسشى وتىز ۇلتتىڭ ءبىرى بولۋعا قول جەتكىزۋىمىزگە جول اشادى.

ءار ۇرپاقتىڭ ءوز ارمانى بار، ولاردا تەك جەكە جانە وتباسىلىق يگىلىكتەرگە عانا ۇمتىلىس كورىنىس تاپپايدى.

ولاردا قاشاندا تۋعان جەرگە دەگەن سۇيىسپەنشىلىك سەزىمى، ءوز حالقى مەن وتانىنىڭ باقىتى تۋرالى اڭسار ايقىن كورىنەدى»،-دەگەن بولاتىن.

Abai.kz