نۇرسۇلتان نازارباەۆ ي.كاريموۆ جەرلەنگەن ورىنعا گۇل شوعىن قويدى دەپ حابارلايدى akorda.kz سايتى.

مەملەكەت باسشىسى جينالعاندارعا ارناعان سوزىندە يسلام كاريموۆپەن ەكەۋىن ۇزاق جىلدار بويى بەرىك دوستىق، شىنايى تۇسىنىستىك، ءوزارا تىلەۋلەستىك بايلانىستىرىپ كەلگەنىن  ايتتى.

– وزبەكستاندىقتاردىڭ كەلەر ۇرپاعى، كەلەسى بۋىنى يسلام كاريموۆتى ءاردايىم ەستە ساقتايدى دەپ سەنەمىن.  ونىڭ ارتتا قالعان مول مۇراسىن، مەملەكەتتىك قىزمەتىنىڭ ناتيجەلەرىن ۇرپاق زەرتتەپ-زەردەلەپ، اتقارعان ىستەرىن وزبەك حالقىنىڭ تاريحىنا التىن ارىپتەرمەن جازادى. ول بۇكىل الەمگە تانىمال كوشباسشى بولدى، ەل ەكونوميكاسىنىڭ قالىپتاسۋى مەن دامۋى، حالىقتىڭ ءال-اۋقاتىنىڭ ارتۋى ونىڭ ەسىمىمەن بايلانىستى. ءبىز ۇلى ادامنان ايىرىلدىق، – دەدى قازاقستان پرەزيدەنتى.

سونداي-اق، نۇرسۇلتان نازارباەۆ باۋىرلاس ەلدەر اراسىنداعى تاريحي جانە ستراتەگيالىق بايلانىستى نىعايتۋ جولىندا وزبەكستاننىڭ تۇڭعىش پرەزيدەنتى باعا جەتپەس ءرول اتقارعانىنا توقتالدى.

– قازاق پەن وزبەك حالقى ءاردايىم ءبىر-بىرىمەن ەتەنە جاقىن بولدى. يسلام ابدۋگانيۇلى ەكەۋمىز 1998 جىلى قوجا احمەت ياساۋي كەسەنەسى باسىندا ماڭگىلىك دوستىق تۋرالى كەلىسىمگە قول قويدىق، ءبىزدىڭ قارىم-قاتىناسىمىز ۇنەمى سول كەلىسىمگە نەگىزدەلدى. قازاقستان ارقاشان وزبەك حالقىمەن قاناتتاسىپ، قاتار كەلەدى جانە سولاي بولا بەرەدى. ءبىز سىزدەرمەن بارلىق قۋانىشتى بىرگە ءبولىسىپ، قيىن كەزدەردە بىرگە قايعىرامىز، – دەدى مەملەكەت باسشىسى.

سونداي-اق، نۇرسۇلتان نازارباەۆ ي.كاريموۆتىڭ وتباسىمەن كەزدەسىپ، قازاقستان حالقىنىڭ جانە جەكە ءوزىنىڭ اتىنان شىن نيەتىمەن كوڭىل ايتتى.

اباي-اقپارات