وسى جۇرت كورە المايدى، بىرەۋدىڭ قۋانىشىن بولە المايدى، قىزعانىشتان قىتىعى كەلىپ، نە «ولە» المايدى... جەتىسايدىڭ جەتى اكىمى قىزمەت بابىن پايدالانىپ، جەگەن ەكەن، «ويباي، جەتى جالماۋىز جەپ كەتتى!» دەپ باسىلىم بىتكەن جارىسا جازدى، ال مەنىڭ كورشىم: «پاراقورلاردى دا قۇرمەتتەۋ كەرەك!» دەپ كەتتى.

دۇرىس ايتادى. جەي بەرسىن! اۋىز بولعان سوڭ جەيمىز عوي. وندا تۇرعان نە بار؟ نەمەنە، قارنىڭ اشىپ، اش وزەگىڭ تالىپ، ءىشىڭ قۇرىلداپ، اسقازانىڭ شۇرىلداپ، جەلكەڭ ۇزىلگەنشە جۇرە بەرۋىڭ كەرەك پە؟ جەتى اكىم جەتىسكەننەن جەدى دەيسىز بە؟ قارىندارى اش... اش بولعان سوڭ، «وبەدتە» مەملەكەت ەسەبىنەن 100 ميلليون تەڭگەنى جەپ قويعان. ويپىرماي، ءجۇدا وزدەرىڭىز اقشاعا قىزىقپايتىنداي؟ الدارىڭىزدا اقشا جاتسا، الباستىعا اينالىپ كەتەرسىزدەر؟ نەگىزى بار عوي، سىزدەر جەگەن ادامدى كورە المايسىزدار! قىزعانشاقسىزدار!

نەمەنە، سول اكىمدەر ءسىزدىڭ ۇيگە كەلىپ، جالماۋىزداي جاپىرىپ، ەتىڭىزدى جەپ كەتتى مە؟ كورەر ەدىم، اش بولساڭىزدار! افريكادا اش بالالار تىريىپ، باستارى قازانداي بولىپ، بۇراتىلىپ، ولەيىن دەپ جاتىر! نە، سوندا ءبىزدىڭ اكىمدەر اشتان ءولسىن دەيسىزدەر مە؟ كوشەدە قابىرعالارى ىرسيىپ، «نان... ءبىر ءۇزىم نان!» – دەپ ىڭىرسىپ جاتقاندارىن قالايسىزدار ما؟ جەسىن! اس بولسىن!

وتكەندە شىمكەنتتە ءبىر توپ قۇقىق قورعاۋشىلار كولىك جۇرگىزۋشىلەردەن ەمتيحان الاردا جەگەن ەكەن، تاعى دا كورە الماي، شۋلاپ كەتتىڭىزدەر! ولاردىڭ ون شاقتىسى بىردەن ۇستالعاندا ۋرالاپ شىقتىڭىزدار! اش ادامدارعا كۇلگەندى سىزدەردەن كوردىم! وسى سىزدەر ەشتەڭە جەمەيسىزدەر مە؟ اۋا جۇتىپ جۇرسىزدەر-ءا؟ «ويباي، ءبىزدىڭ ەلدى جەمقورلار جايلاپ العان، مينيسترلەرگە دەيىن جەيدى!» – دەپ قوياسىزدار. وبشىم تۇسىنبەيمىن سىزدەردى، سوندا نەمەنە، ءبىزدىڭ ەلدىڭ ادامدارى ەشتەڭە جەمەستەن، تەك كوكوكولا ىشە بەرەدى دەپ ويلايسىزدار ما؟

پرەمەر- ءمينيسترىمىزدى سوتتاپ تىندىڭىزدار. ومىرىندە ءبىرىنشى رەت تويىپ جەگەن ەكەن. سوندا پرەمەر- مينيستر كابينەتىندە اش-جالاڭاش، قارنى قابىسىپ، كىندىگى قۋىعىنا جابىسىپ، ولەتىن وگىزدەي ولىمسىرەپ وتىرۋى كەرەك ەكەن عوي؟ سول كەرەك پە سىزدەرگە؟

قۇداي باستارىڭىزعا بەرمەسىن، الەمدە اش ادامدار ءبىر ءۇزىم نانعا قولى جەتپەي، باقيلىق بولىپ جاتىر! ونداي پاكتىلەر مەندە تولىپ جاتىر! اش بولساڭىز، تاۋىقتىڭ تارىسىن تارتىپ جەيسىز، «كامازدى» جۇگىمەن ارتىپ جەيسىز! اش ادامدارعا قامقورلىق جاساپ، «جەگەنىڭىز ءدامدى بولسىن، ءومىرىڭىز ءماندى بولسىن!» دەپ ءتاتتى تىلەك ايتۋدىڭ ورنىنا سىرتىنان وسەكتەيمىز، بولماسا تۇرمەگە توعىتىپ، وتەكتەيمىز.

الماتىدا «قورعاس» حالىقارالىق شەكارالىق ىنتىماقتاستىق ورتالىعىنىڭ پرەزيدەنتى ۆاسيلي ني ءبىر ميلليون دوللار جەپ ەدى، قىزعانىپ شىعا كەلدىڭىزدەر! اش قوي ول دا!

اش ادامعا ارىستانداي تاپ بەرگەندى قويساڭىزدارشى! قايتا بىرىگىپ جەڭىزدەر! كىم نە جەمەي جاتىر؟ جەگەندەردى ءبىرىنشى كورگەندەي تاڭداناسىزدار كەلىپ! ادام بولعان سوڭ جەيمىز دە! مال بولساق ەكەن... سيىر، بۇقا ەمەس شىعارمىز، جايىلىپ جۇرگەن؟ ال، ايتقىش ەكەنسىزدەر، ەشكىلەردىڭ جەمەيتىنى جوق، نەگە سولاردى كۇندەمەيسىزدەر؟ سوسىن «اناۋ اناعان پارا بەردى، ءوز تىرلىگىن تىندىرۋ ءۇشىن بارا بەردى!» دەيسىزدەر. ءاي، بىرەۋ ء«ما» دەپ بەرىپ تۇرسا، ات تەرلەتىپ الدىڭا كەلىپ تۇرسا، نەگە الماسقا؟ ۇيات قوي! مەنسىنبەگەن سياقتى... الماساڭ ەرتەڭ قارعايدى. نەمەسە ساعان بەرەتىن اقشاسىن جوعالتىپ السا شە؟ ۇرىلار ۇرلاپ كەتسە شە؟ وبشىم، ادام ەمەسسىزدەر، تىم قىزعانشاقسىزدار، كورە المايسىزدار! مەن دە اشپىن... بىردەڭە جەگىم كەلەدى!

مۇحتار شەرىم

Abai.kz