قۇرمەتتى وقىرمان قاۋىم! قۇرمەتتى زاڭعار كارىمحان!

Abai.kz اقپاراتتىق پورتالىندا جاريالانعان "وقىرماندار وتارباەۆتىڭ كىتابىن ورتەدى" دەگەن ماقالا پورتالدىڭ ەلەكتروندى پوچتاسىنا adaskak.tortai@gmail.com مەكەن-جايىنان كەلگەنىن حابارلايمىز (سۋرەتتەن قاراڭىز).

بۇل بەلگىسىز حاتتىڭ ارتىندا كىمدەردىڭ تۇرعانى ازىرگە بەلگىسىز. 
سوندىقتان دا پورتالدىڭ اتىنا سىن جازىپ، وسى جايدى ۇيىمداستىرۋشى رەتىندە اتاۋعا نەگىز جوق. نەگە؟

بىرىنشىدەن، قازىر بۇل ماقالا قازاق سايتتارىنىڭ بىرنەشەسىنە جىبەرىلگەنى انىقتالدى. ەگەر پورتال ارزان سەنساتسيا جاساعىسى كەلسە، بۇل ماتەريالدى وزگە باسىلىمدارعا ۇسىنباس ەدى. 

ەكىنشىدەن، پورتالىمىزدا نەگىزىنەن ادەبيەتتىڭ اينالاسىندا جۇرگەن جىگىتتەر قىزمەت ەتەدى. ولار ەشقاشان دا مۇنداي قادامعا بارمايتىنى ايتپاسا دا تۇسىنىكتى. 

ۇشىنشىدەن، تاسادا تۇرىپ، تاس اتاتىنداي ىعاتىن ەشكىمىمىز جوق. ەگەر دە، ماعاۋيننىڭ، كەكىلباەۆتىڭ، يا وتارباەۆتىڭ شىعارماشىلىعىنا قاتىستى ايتارىمىز بولسا، ءوز اتىمىزدان-اق ايتۋعا دايىنبىز. بىزگە تىعىلماق ويناۋ ابىروي بەرمەيتىنىن جاقسى تۇسىنەمىز. 

ازىرگە وسى دا جەتكىلىكتى شىعار. ەندىگى ماسەلە "بۇل ماقالانى نەگە جاريالايسىڭدار؟" دەگەن سۇراققا كەلىپ تىرەلىپ تۇر. 

ءبىز "ادەبيەت" پورتالىنا جاريالانعان ر.وتارباەۆتىڭ سۇحباتىن سايتتىڭ جەتەكشىسى باۋىرجان قاراعىزۇلىنان ءوتىنىپ سۇراپ، كوشىرىپ باسقان بولاتىنبىز. كىتاپ ورتەۋ تۋرالى ماقالا سوعان جاۋاپ بەرگەن ەكىنشى تاراپتىڭ كوزقاراسىن بىلدىرەدى. ونى وقىرمانعا جەتكىزبەي قويۋعا ءبىزدىڭ قۇقىعىمىز جوق. 

بىرەۋلەر "سەنساتسيا ارقىلى وقىرمان تارتقىلارىڭىز كەلەدى" دەۋى دە مۇمكىن. ءبىزدىڭ پورتال وزگە سايتتار سەكىلدى "بەلدەن تومەن" تاقىرىپتارعا بارمايتىنىن ءبارىڭىز بىلەسىزدەر. سوندىقتان دا وقىرمان كوبەيتۋ ءۇشىن ونداي ارام ايلا جاسامايتىنىمىز بەسەنەدەن بەلگىلى دۇنيە. 

اۋەزوۆ، كەكىلباەۆ، ماعاۋين سەكىلدى تۇلعالارىمىزعا ايتىلعان سىن راقىمجان وتارباەۆتىڭ جەكە پىكىرى. كىتاپ ورتەگەن ازاماتتار دا جەكە تۇلعالار! سوندىقتان دا بۇل ماسەلەنى رۋارالىق دۇردارازدىققا جەتكىزۋ، ءبىر-ءبىرىمىزدى ايىپتاپ، ايماقتىق جانجال دەڭگەيىنە كوتەرۋ دۇرىس ەمەس. بۇل ءبىزدىڭ مادەنيەتىمىزدىڭ قاي دەڭگەيدە ەكەنىن انىق كورسەتەدى. 

كىتاپتى ورتەپ، تىعىلىپ قالۋ دا جاقسىلىقتىڭ نىشانى ەمەس. بۇل ءىستى ءبىز دە ايىپتايتىنىمىزدى ەسكەرتەمىز.  

ەگەر دە وسى جايدى ۇيىمداستىرعان ازامات ىستەگەن ءىسىن موينىنا السا دا، ءبىز وعان ەشتەڭە دەي المايمىز. ول دا راحىمجان وتارباەۆ سىندى ءوز ويىن بىلدىرگەن ازامات بولىپ شىعا كەلەدى. 
سوندىقتان دا ادەبي پىكىرتالاستى پايدالانىپ، ءبىر-ءبىرىمىزدى قارالاعاننان گورى اعايىن اراسىن جاقىنداستىرۋدى ويلاعانىمىز ءجون.