سيريانىڭ باتىسىندا تاعى دا 100 مىڭ ادام ۇيلەرىن تاستاپ، بوسىپ كەتتى
سيريانىڭ باتىسىنداعى حاما پروۆينتسياسىندا سوعىستان 100 مىڭ ادام ۇيلەرىن تاستاپ كەتۋگە ءماجبۇر بولدى. وسىلاي دەپ بۇۇ قىزىل كرەست پەن جەرگىلىكتى بيلىكتىڭ اقپاراتىنا سۇيەنىپ حابارلادى.
حامانىڭ سولتۇستىگىندە كوتەرىلىسشىلەر يسلام-سودىرلارىنا قارسى سوعىسىپ جاتىر. وپپوزيتسيا كۇشتەرى بولسا حالفايا قالاسىن باسىپ الدى.
تۇركيا اقش-پەن بىرگە «يسلام مەملەكەتى» تەرروريستىك ۇيىمىنىڭ سودىرلارىن راككا قالاسىنان ىعىستىرۋ ءۇشىن سوعىسۋعا دايىن ەكەنىن بىلدىرگەن. وسىنداي ۇستانىمىن تۇركيا پرەزيدەنتى رەجەپ تايىپ ەردوعان قىتايدا وتكەن G20 ءسامميتى كەزىندە ايتتى.
سەيسەنبى كۇنى ەلدىڭ پرەزيدەنتى باشار اساد رەجيمىنىڭ اۆياتسياسى سيريانىڭ الەپپو قالاسىنا حلور قوسىلعان بومبا تاستاعان. 70-تان استام بەيبىت تۇرعىن قايتىس بولدى. ولاردىڭ ىشىندە ايەلدەر، بالالار بار. ءدال وسىنداي مالىمەتتەردى سيرياداعى ەرىكتى قۇتقارۋشىلار بەرىپ وتىر.
داماسك بولسا، ۋلاناتىن گاز قولدانعاندارىن جوققا شىعارادى. الەپپو قازىرگى ۋاقىتتا ەكىگە ءبولىنىپ وتىر: ءبىر بولىگىن اساد رەجيمى بيلەسە، ەكىنشى بولىگىن قارۋلى وپپوزيتسيا باقىلاپ وتىر.
اباي-اقپارات
