بۇگىن، ياعني كۇزدىڭ ەڭ العاشقى كۇنىندە مەكتەپتەردىڭ ەسىگى ميلليونداعان وقۋشىلار ءۇشىن ايقارا اشىلىپ، بىلىمگە قۇشتار مىڭداعان جۇرەكتەر ءبىلىم ورداسىنىڭ تابالدىرىعىن اتتايدى. ءبىرىنشى قىركۇيەكتى ء"بىلىم كۇنى" اتاپ، ءوز دارگەيىمىزدە مەرەكە رەتىندە تويلاپ كەلەمىز. بىراق، بۇل كۇننىڭ تاريحى بىلىمنەن گورى دىنگە اناعۇرلىم جاقىنىراق ەكەنىن كوپ ادامدار بىلە بەرمەيدى.  

ءىV عاسىردا، تۋراسىن ايتساق 325 جىلى ريم يمپەراتورى كونستانتين الەمدە تەڭدەسى جوق شىركەۋ سالعىزىپ، ءبىرىنشى قىركۇيەكتە  جاڭا جىل مەرەكەسىن تويلاۋ تۋرالى شەشىم شىعارادى.

ول داۋىردە شىركەۋلەر ءدىني بىلىممەن قاتار، زاماناۋي ءبىلىمدى دە ۇيرەتەتىن بولعان. وسىعان بايلانىستى وقۋ جىلى تىكەلەي كونستانتين ەنگىزگەن جارلىق نەگىزىندە ءبىرىنشى قىركۇيەكتە باستالاتىن بولىپ بەكىگەن. ونىڭ ۇستىنە ءار ساباق اياقتالعان سوڭ، ءۇزىلىس بەلگىسى رەتىندە شىركەۋدىڭ قوڭىراۋى سوعىلاتىنى تاعى بار. 

ارينە، قازىر زامان وزگەردى؟ ءبىلىم كۇنىنىڭ تاريحىنان كىنا ىزدەپ، "مۇنى وزگەرتۋ كەرەك" دەپ ماسەلە كوتەرۋدەن اۋلاقپىز. دەسە دە، كەيبىر ۇلتتىق تانىمىمىزعا جات دۇنيەلەردى بىرتە-بىرتە سانادان سىلىپ تاستاۋ قاجەت سەكىلدى. سەبەبى، ءبىز مەكتەپتەردى ءۇشتىلدى ەتۋ ارقىلى ۇرپاقتى ۇلتتىق بولمىستان ايىراتىن توتە جولعا ءتۇسىپ، دالاقتاپ شاۋىپ كەلەمىز. 

ءبىلىم مەرەكەمىز - شىركەۋ كۇنى. سوعىلاتىن قوڭىراۋ - جات دىندىكى. ءبىلىم بەرۋ جۇيەسى دە ۇلتتىق ساناعا نەگىزدەلمەگەن. نەگىزگى عىلىمي پاندەردى انا تىلدە وقىتپاۋدى قۇپ كورىپ وتىرمىز. "قوڭىراۋ سوعۋدى مۇلدەم توقتاتىپ، ورنىنا كۇي ويناپ تۇرسا" دەگەن يگى باستامانى (بۇل ماسەلەنى ونشاقتى جىلدان بەرى قازاق ءباسپاسوزى ۇزبەي كوتەرىپ كەلە جاتىر) قولداي المايتىن جۇرتپىز. 

ەندى نە ىستەمەك كەرەك؟

وسى سۇراققا جاۋاپ ىزدەگەن ءار ازاماتقا ء"بىلىم كۇنى قۇتتى بولسىن!" دەمەكپىز...

ءشارىپحان قايسار

Abai.kz