سوڭعى ەكى اپتادا ەلىمىزدىڭ ىشكى ءام سىرتقى ساياساتىندا ءىرىلى-ۇساقتى وقيعالار بولدى. ەلباسى نۇرسۇلتان ءابىشۇلى پولشا مەن سەربياعا ساپارلاپ قايتتى. ول جەردە ەاەو تۋرالى توسىن پىكىرلەر ايتىلدى. وسى كەزدە ۇكىمەت باسشىسى دا قاراماعىنداعى مينيسترلەردى ەرتىپ ەلدى ارالادى. كيەلى تۇركىستان تورىندە ءتىل ماسەلەسى ءسوز بولدى. ال قىرعىزستان تاۋەلسىزدىك كۇنىن تويلادى. اتامباەۆ اعىنان جارىلدى. كەزىندە ءوزىن بيلىككە اكەلگەن ۋاقىتشا ۇكىمەتتى اشىق سىناپ، ەكس-پرەزيدەنت روزا وتىنباەۆانى ورتا جولدا قالدىردى. وزبەكستان پرەزيدەنتىنىڭ اۋرۋحاناعا تۇسكەنى دە ءمالىم بولدى.

مۇنىڭ ءبارى ءوز كەزەگىندە قازاقستاننىڭ ىشكى-سىرتقى ساياساتىنا ءوز ىقپالىن تيگىزەتىنى ءسوزسىز. ەلباسى مەن ۇكىمەت باسىنىڭ ساپارىنان قانداي قورىتىندى شىعارۋعا بولادى؟ كورشى ەلدەردەگى وسى وقيعالار توڭىرەگىندە ساياساتكەر ءامىرجان قوسانوۆ «Abai.kz» پورتالىنا سۇحبات بەرىپ، ءوز ويىن ورتاعا سالعان ەدى.

- وتكەن اپتادا ەلىمىزدىڭ ۇكىمەت باسشىسى «كابميندى» قاسىنا ەرتىپ، بىرقاتار وبلىستاردى ارالاپ شىقتى. كەزدەسۋلەرىنىڭ كوبى بىرسىدىرعى ستسەناري بويىنشا ءوتتى. حالىق الدىنا ءجيى شىعا بەرمەيتىن، ارا-تۇرا عانا بوي كورسەتىپ جۇرگەن پرەمەر-مينيستر «ەلمەن» كەزدەسكەندە ورىندى-ورىنسىز دۇنيەلەرگە ازىلدەپ، «قازاق ءتىلى»، «مەكتەپتەردەگى ءۇش تىلدىلىك» سەكىلدى قوعامنىڭ ەڭ وزەكتى ءام نازىك ماسەلەلەرىن قالجىڭ سوزبەن سۇيىلتىپ وتىرۋى قانشالىقتى ورىندى؟ جانە وسىنشاما جىل تاپجىلماي وتىرعان  كارىم قاجىمقانۇلىنىڭ كەنەتتەن ەلشىل، حالىقشىل وبرازعا ەنىپ، ەل ارالاپ، جەر ارالاپ كەتۋىنىڭ استارىندا نە جاتۋى مۇمكىن؟ 

- پرەمەردىڭ مۇنداي ۆوياجدارى ەلباسىنىڭ نە تاپسىرماسى، نە رۇقساتى بويىنشا بولاتىنى تۇسىنىكتى. سوندىقتان دا ەلباسى ءماسىموۆ مىرزانى ءبىر سىناپ كورەيىن دەگەن بولار: «ەلدى ارالاپ كورسىن، جۇرت نە دەر ەكەن؟» دەگەن ويى دا جوق ەمەس شىعار. جۇرتشىلىقتىڭ رەاكتسياسى تەرىس بولسا، ونى دا بەتىنە باسىپ ايتار.

ال ءماسىموۆتىڭ توبىنا قارسى كۇشتەردىڭ ەلباسىنىڭ وزىنە بارىپ: «كوردىڭىز بە، تىم بەلسەندى بوپ كەتتى، ءتىپتى سىزبەن جارىسقىسى كەلەدى!» دەپ قۇلاعىنا سىبىرلايتىنى تاعى بار ەكەنىن ۇمىتپايىق. ءبىر سوزبەن ايتقاندا، بۇل ساپارلار ماسىموۆكە ەكى جاعىنان دا ء«تيىپ» كەتۋى مۇمكىن. جانە دە ءدال وسى اسىعىس-ۇسىگىس ساپارلارى ونىڭ ەل الدىنداعى ابىرويىن ارتتىردى دەپ ايتا المايمىن.

كىم بىلەدى، مۇنداي، بۇرىن-سوڭدى بولىپ كورمەگەن ءىسساپارلار لەگى ءوزىنىڭ كۇنى تاقاعانىن سەزگەن پرەمەردىڭ تۇياعىن ءبىر سەرپىپ قالعىسى كەلۋىنەن دە تۋعان بولۋى كەرەك.

- ءيا، قازاقستاندىق ساياساتتانۋشىلاردىڭ كۇزدە پرەمەر-ءمينيستردىڭ وتستاۆكاعا كەتۋى مۇمكىن ەكەندىگىن ايتقانىن وقىپ قالىپ ەدىم. بۇل ازىرگە بولجام عوي. جالپى وسىنداي بولجامدار قانشالىقتى شىندىققا جاناسادى؟ ەگەر وتستاۆكاعا كەتەتىن بولسا، ول قانداي قىزمەتكە بارۋى مۇمكىن؟  الدە الگىندە ءوزى ارالاپ جۇرگەن ەلگە بارىپ، كوپتىڭ ءبىرى بولا ما؟

- بۇل ەندى ماعان ەمەس، ەلباسىنا تىكەلەي قويىلۋى ءتيىس سۇراق! ويتكەنى، پرەمەردىڭ تاعدىرى تەك سونىڭ قولىندا!

بىراق جاعداي سولاي ەكەن دەپ، جوعارى جاققا باس شۇلعىپ وتىرا بەرۋدىڭ دە كەرەگى جوق. قوعام ءوز پىكىرىن اشىق ايتۋى ءتيىس.

ەلدەگى ورىن العان الەۋمەتتىك-ەكونوميكالىق احۋالعا ۇكىمەت باسشىسى تىكەلەي جاۋاپ بەرەدى.

- ال ول جاعدايدىڭ قانشالىقتى مۇشكىل ەكەنىن ءبارىمىز بىلەمىز...

- راس ايتاسىڭ، جۇرتتىڭ ەڭسەسى تۇسكەن، ەكونوميكا بولسا، ءبىر داعدارىستان ەكىنشى داعدارىسقا دۋشار بوپ جاتىر، جىلدار بويىنا شەشىلمەي، قوردالانىپ قالعان پروبلەمالار شاشەتەكتەن.

وسى پرەمەردىڭ ءبىز بىلمەيتىن ءبىر سيقىرى بار سياقتى: باسقا ادامنىڭ تۇسىندا جاعداي وسىنداي بولسا، ول باياعىدا-اق، قۇيرىعىنا قوڭىراۋ بايلانىپ، وتستاۆكاعا جىبەرىلەر ەدى! ماسىموۆتەن دە وتكەن نەبىر مىقتى ازاماتتاردىڭ پرەمەرلىك جولدا قۇربان بوپ كەتكەنىن بىلەمىز عوي!

- ءبىز جوعارىدا كارىم مىرزانىڭ كوشىنە «كابميندە» بىرگە ىلەسىپ جۇرگەنىن ايتتىق قوي. مىنە، سول جولى ۆيتسە-پرەمەر داريعا نۇرسۇلتانقىزى تۇركىستانعا ساپار كەزىندە تىلگە قاتىستى ەكىۇشتى پىكىر ايتتى. ءبىزدىڭ تۇيگەنىمىز: سوندا قازاقستانعا شەتەلدىك تۋريستەر كەلۋ ءۇشىن رەسەيدىڭ رەسمي ءتىلى مىندەتتى تۇردە ايتىلۋى ءھام جازىلۋى كەرەك پە؟! ۆيتسە-پرەمەر حانىمنىڭ ايتىپ وتىرعانىنان قورىتىندى شىعاراتىن بولساق، ءبىزدىڭ ءتۋريزمنىڭ پوتەنتسيالى رف اۋماعىنان ءارى اسا المايتىن بولعانى عوي؟ جالپى حالىقارالىق تۋريزم ءتىلى قانداي؟ قازاق ءتىلى مە، اعىلشىن ءتىلى مە، الدە ورىس ءتىلى مە؟

- تۇركىستان سەكىلدى كيەلى دە قاسيەتتى جەرگە بارعاندا ءسوز سويلەۋ دە ۇلكەن سىن ەكەن عوي. داريعا حانىم سول جەردە رۋحاني ومىرگە، ماڭگىلىك قۇندىلىقتارعا قاتىستى ادەمى وي ايتىپ، ۇكىمەتتىڭ الەۋمەتتىك سالاسىنا جاۋاپ بەرەتىن ۆيتسە-پرەمەر رەتىندە ەل كوزىنە ءبىر ءتۇسىپ قالۋىنا بولاتىن ەدى. ولاي بولمادى، بار اڭگىمە ءتىل تۋرالى داۋلى ماسەلەگە ۇلاسىپ كەتتى. شىنتۋايتىنا كەلگەندە، شەتەلدىك تۋريستەر كەلەتىن نىسانداردا باسقا تىلدەردە سويلەي الاتىن گيدتەر بولۋى، تۇسىندىرمە جازبالارى دا شەت تىلدەرىندە جازىلۋىندا ەش ابەستىك جوق. بىراق داريعا حانىم «ورىس ءتىلىنىڭ جاناشىرى رەتىندە» كوزگە ءتۇسىپ قالدى. ونى ءوز باسىم توسىننان بولعان پيار قاتەلىك دەپ ويلايمايمىن. وكىنىشكە وراي، ورىسشا ويلاپ، ورىسشا سويلەپ قانا قويماي، قازاق مۇددەسىنەن گورى رەسەيشىلدىككە ءبىر تابان جاقىن كادرلار بيلىك ىشىندە از ەمەس.

- وكىنىشكە وراي بيلىكتىڭ ىرگەسىندە جۇرگەن ازىن-اۋلاق توپتىڭ ىشىندە بوتەن ەلدىڭ مەملەكەتتىك تىلىنە ەرەكشە ىقىلاسپەن قارايتىندار بار. حوش، وتكەن اپتادا ەلباسىمىز پولشاعا بارىپ قايتتى. وندا دا قۇلاق تۇرەتىن جايتتار از بولمادى. ەندى سوعان توقتالايىقشى... پولياك كاسىپكەرلەرىمەن كەزدەسۋى كەزىندە مەملەكەت باسشىسى ەاەو تۋرالى ويىن ورتاعا سالىپ، پولشانى رەسەيمەن قارىم-قاتىناس ورناتۋعا شاقىردى. ەاەو-نىڭ ينيتسياتورى ءوزى ەكەنىن ايتتى...

- پولشا مەن رەسەي اراسىنداعى قارىم-قاتىناستىڭ قانشالىقتى قيىن جاعدايدا قالىپتاسقانىن، ەكى جاق وسى كۇنگە دەيىن كەلىسە الماي كەلە جاتقانىن بىلەسىز: ارادا نەبىر تراگەديالىق جايتتار مەن تاريحي رەنىشتەر بار. بالكىم، پولياكتاردىڭ ورتاسىندا ءجۇرىپ ەلباسى وسى ەكى ەلدى تابىستىرا ءتۇسۋ كەرەكتىگى تۋرالى ويلاعان بولار. سودان وسىنداي بىتىمگەرشىلىك سيپاتتاعى سوزدەر ايتىلىپ قالعان شىعار. بىراق ەۋرووداققا مۇشە بولىپ وتىرعان پولشا جەكە-دارا ەاەو-مەن قالاي جاقىنداسپاق، سول جاعى تۇسىنىكسىزدەۋ بوپ قالدى.

- ەلباسى وسى كەزدەسۋدە «جاۋ جانىڭنان تابىلادى، دوس الىستان كەلەدى» دەگەن پولياك ماقالىن ايتتى...

- ونى كىم ءبىلسىن... جالپى بۇل فيلوسوفيالىق تۇرعىدان ءجيى ايتىلىپ جۇرگەن وي ەمەس پە؟

- مۇمكىن...

- قازاقستاننان الىس جاتقان پولشامەن قارىم-قاتىناستى ودان سايىن نىعايتۋ تۇرعىسىندا دا ايتقان بولار...

گەوساياسي جاعىنان ەمەس، ىشكى ساياسات جاعىنان ايتساق، بۇگىنگى تاڭدا، ياعني تاق تالاس ماسەلەسى ۋشىعىپ بارا جاتقان تۇستا، ەلباسى ناعىز جاۋلارىن، پىكىرىن اشىق ايتىپ جۇرگەن ءبىزدىڭ ارامىزدان ەمەس، ءۇنسىز باس يزەپ، ىشتەي تىنىپ جۇرگەن اينالاسىنان ىزدەسە ءجون بولار ەدى.

مۇنداي كوزقاراس، اسىرەسە، قازىرگىدەي الاعاي دا بۇلاعاي كەزەڭدە اسا ماڭىزدى!

قاراڭىز، مىنا وزبەكستاندا كارىموۆ وسى كۇنگە دەيىن وزىنەن كەيىن "مەملەكەت باسقارۋ جۇيەسى قانداي بولماق، كىم باسقارا الادى، قوعام پىكىرى قالاي ەسكەرىلەدى؟" دەگەن وتكىر دە كوكەيكەستى ساۋالدارعا جاۋاپ بەرمەي، ۋاقىتتى تىم سوزىپ جىبەرىپ، سىرقاتتانىپ قالدى. ەندى ول وسيەتىن ايتا الا ما، ايتا الماي ما، بەلگىسىز...

سوندىقتان، ءبىزدىڭ بيلىك تە «پوستنازارباەۆ» كەزەڭىنە وسى باستان دايىندىق جۇرگىزىپ، نەندەي جوسپارى بار ەكەنىن حالىققا جەتكىزۋى ءتيىس. ايتپەسە، ەرتەڭ كەش بولۋى ابدەن مۇمكىن. ونداي جاعدايدا ءبىز بەرمۋد ءۇشبۇرىشىندا ءجۇزىپ كەلە جاتقان «تيتانيك» سەكىلدى بوپ قالامىز! ال الدا قانشاما ايسبەرگ، قانشاما ءبىز كۇتپەگەن باسقا دا سىندار تۇر!

جانە دە بولاشاق بيلىك فورماتى مەن ناقتى تۇلعالاردى تالقىلاعاندا تەك قانا ەلباسى مەن ونىڭ اينالاسىنىڭ عانا ەمەس، حالىقتىڭ دا پىكىرى ەسكەرىلۋى ءتيىس! سايلاۋ بولسا، وعان ەل ىشىنەن شىققان، قاراپايىم حالىقتىڭ سەنىمى مەن قولداۋىنا يە كۇشتەر مەن تۇلعالار قاتىسا الاتىن بولۋى ءتيىس! ايتپەسە، بولاشاق مۇراگەر لەگيتيمدى بولماۋى مۇمكىن. مۇنىڭ ءوزى ەل ىشىندە نارازىلىق تۋعىزىپ، تۇراقتىلىققا تەرىس اسەر ەتۋى ابدەن ىقتيمال!

«ەاەو ءوزىنىڭ پايدالى ءارى ناتيجەلى ەكەنىن كورسەتە المادى»

- قازاق ۇلتشىلدارى، بيلىكتىڭ قازىرگى وپپونەنتتەرى ەاەو-نىڭ بۇرىنعى كسرو-نىڭ جاڭا فورماتتاعى بالاماسى ەكەنىن ايتۋدا. مۇنى ءتىپتى ءپۋتيننىڭ باستى وپپونەنتى سانالعان رەسەيلىك ساياساتكەر مارقۇم بوريس نەمتسوۆ تا جۇرتقا اشىق جايىپ سالعان ەدى...  ال وسى وداققا قوسىلعالى بەرى ءبىزدىڭ ەاەو-دان ۇتقانىمىزدان ۇتىلعانىمىز كوپ بولدى. ونىڭ رەسمي ستاتيستيكا راستايدى. ول ەندى ءوز الدىنا بولەك اڭگىمە... ايتىڭىزشى، ءبىز وسى ەاەو-عا مۇشە بولۋعا قانشالىقتى مۇقتاجبىز؟

- ەشبىر ءتۇسىندىرۋسىز ەسىكتى تارس جاۋىپ، شىعىپ كەتۋ ءبىز سەكىلدى ىرگەلى مەملەكەتكە جاراسا قويماس. ەاەو تۋرالى كەلىسىم-شارتتا ول مەحانيزمدەر قاراستىرىلعان بولار، ياعني كەز كەلگەن مەملەكەت وداقتان ءوز ەركىمەن شىعا الادى.

بايقايسىز با، قازىردە ەل ىشىندە ءبىزدىڭ باستىقتار ەاەو تۋرالى بۇرىنعىداي ءجيى ايتا بەرمەيدى. ول دا تۇسىنىكتى: ول وداق ءوزىنىڭ پايدالى ءارى ناتيجەلى ەكەنىن كورسەتە المادى. ونىڭ ۇستىنە قازىرگى داعدارىس جاعدايىندا وداققا مۇشە ءاربىر ەل ءوز شارۋالارىمەن باسى قاتىپ، اۋرە. باسقاعا قارايتىن، قول ۇشىن بەرەتىن جايى دا، كوڭىلى دە، قاجەت دەسەڭىز، قارجىسى دا جوق.

ال قازاقستاننىڭ ەاەو سونشالىقتى «بەرىلىپ كەتۋىنىڭ» ءبىر سەبەبى مىنادا بولۋى مۇمكىن.

قازىر ەاەو قازاقستاننان گورى رەسەيگە، پوستسوۆەتتىك كەڭىستىكتە ماسكەۋ ىقپالىن قايتا جاڭعىرتۋ يدەياسىن ۇسىنعان پۋتين ءۇشىن كەرەك بولىپ تۇر. وسى باستامانى جان-جاقتى قولداۋدى ول ءوزىنىڭ بار ارىپتەستەرىنەن تالاپ ەتۋدە. ال ءبىزدىڭ بيلىك بولسا، بالكىم، بولاشاق اقوردا مۇراگەرىن باسقا مەملەكەتتەرمەن قاتار رەسەيدىڭ دە قولداعانىنا ءزارۋ. وسى ەكى مۇددە ءبىر جەردە، ياعني ەاەو-دا توعىسقان سياقتى.

ء«بارىن بيلىككە جاقىن ات توبەلىندەي توپ شەشەدى»

- جاڭا ءوزىڭىز باستاپ ايتىپ قالدىڭىز عوي. ەندى  وزبەكستان پرەزيدەنتىنىڭ تراگەدياسى تۋرالى ءسوز ەتسەك، يسلام كارىموۆتىڭ اۋرۋحاناعا تۇسۋىنە بايلانىستى، الىپ-قاشپا اڭگىمەلەر كوپ ايتىلۋدا...

- وزبەكستاننىڭ بيلىك جۇيەسىنىڭ تىنىس-تىرشىلىگى و باستان جابىق. سوندىقتان دا كارىموۆتىڭ جەكە باسىنا، سونىڭ ىشىندە، سىرقاتىنا قاتىستى اڭگىمەلەر دە ارقيلى بولىپ جاتىر، ويتكەنى رەسمي دەرەككوزدەرىنە سەنىم جوق.

30 ميليوننان استام حالقى، تەرەڭ تاريحى، ءبىر مەملەكەتكە جەتەر قازبا بايلىعى بار وزبەكستان ورتا ازياداعى بىرەگەي مەملەكەت.

- استانا مەن تاشكەنت وسى ايماقتاعى كوشباسشىلىق ءۇشىن ىشتەي باسەكەلەس بوپ كەلە جاتقانى دا راس ەمەس پە؟

- ول راس. سوندىقتان دا وزبەكستاننىڭ باس بيلىگىندە بولۋى ابدەن ىقتيمال وزگەرىستەر، ءسوزسىز، ورتالىق ازياداعى جاعدايعا اسەر ەتەدى. قازاقستان دا بۇل وزگەرىستەردەن تىس قالا المايدى...

- ەگەر وزبەكستاندا پرەزيدەنت اۋىساتىن بولسا، تاققا كىم وتىرۋى مۇمكىن؟. اركىم سيتۋاتسيانى ءار ءتۇرلى بولجاپ جاتىر. ءبىزدىڭ سۇراق: ەگەر وزبەكستاندا ءنومىرى ءبىرىنشى تۇلعا اۋىساتىن بولسا، بۇل وزگەرىس قازاق-وزبەك قارىم-قاتىناسىنا قالاي اسەر ەتۋى مۇمكىن؟

- باس بيلىككە قول جەتكىزۋدىڭ ەكى جولى بار. ءبىرى – اشىق تا ءادىل سايلاۋدىڭ ارقاسىندا. ەكىنشىسى – ساراي توڭكەرىسىنە نەگىزدەلگەن ستسەناري بويىنشا. مەملەكەتتى شيرەك عاسىر بويىنا جەكە-دارا باسقارىپ كەلگەن يسلام كارىموۆ تەك ءوزىنىڭ ايتقانى مەن پارمەنىن عانا زاڭ ءارى بۇيرىق رەتىندە قابىلدايتىن ينستيتۋتتار مەن توپتاردان تۇراتىن قۇبىجىق جۇيە قۇردى. دەموكراتيا دەگەن اتىمەن جوق، ونىمەن ساياسي باسەكەگە تۇسە الاتىن كورنەكتى تۇلعالار نە ومىردەن وتكەن، نە تۇرمەدە، نە شەتەل اسىپ كەتكەن.

سوندىقتان دا ءبارىن بيلىككە جاقىن ات توبەلىندەي توپ شەشەدى. ونىڭ ىشىندە كارىموۆتىڭ وتباسىنىڭ مۇشەلەرى، ۇكىمەت پەن ارنايى ورگاندار باسشىلارى بار. سىرتتان بولۋى مۇمكىن ىقپالدى دا جوققا شىعارۋعا بولمايدى، ويتكەنى گەوساياسي تۇرعىدان العاندا وزبەكستان سەكىلدى الەمنىڭ نەبىر الپاۋىتتارىنىڭ مۇددەسى جيناقتالىپ، توعىسقان ءتۇيىندى جەرگە كوز سالۋشىلار جەتىپ جاتىر...

- وزبەكستان بۇلىنسە، وا تىنىشتىعى ءبۇلىنۋى مۇمكىن دەگەن پىكىرلەر ايتىلۋدا. سوعان نە دەيسىز؟

- قاتار ءجۇزىپ كەلە جاتقان بىرنەشە كەمەنىڭ ىشىندەگى ءىرىسىنىڭ ءبىرى ءبىر نارسەگە ۇشىراپ جاتسا، جامان ايتپاي جاقسى جوق، باتىپ جاتسا، ول باسقالاردى دا وزىمەنەن بىرگە قۇردىمعا تارتىپ كەتۋى مۇمكىن عوي. بەتىن اۋلاق قىلسىن، وزبەك اعايىن امان بولسىن! بىراق وزبەكستان سەكىلدى ىشكى قاراما-قايشىلىعى جەتەرلىك ەلدە قيىن دا قاۋىپتى پروتسەستەر باستالىپ كەتسە، الىس-جاقىن كورشىلەرگە، سونىڭ ىشىندە ورتالىق ازيا وڭىرىنە وڭاي بولمايدى.

- 1991 جىلى كەڭەستەر وداعى قۇلاپ، ونىڭ قۇرامىندا بولعان ورتا ازيا ەلدەرى ەگەمەندىك الدى. سودان بەرى شيرەك عاسىر ءوتتى.  كوپ دۇنيە وزگەردى. ال كەشەلى بەرى قۇدايى كورشىمىز قىرعىزستان ەلى ەگەمەندىك كۇنىن تويلاۋدا. بۇگىن وزبەكستان بايراعىنىڭ بەيبىت اسپان تورىندە جەلبىرەگەنىنە 25 جىل تولادى.

كەشە المازبەك اتامباەۆ حالىق الدىندا بايانداما جاساپتى. وندا «تەكەلەردىڭ سوڭىنان ەرىپ كەتە بەرەتىندەي قىرعىز ەلى قوي ەمەس» دەپتى. مۇنداي تەكەلەر بىزدە دە از ەمەس. ال سوڭعى كەزدەرى قازاق جوعارعى لاۋازىمدى شەنەۋنىكتەردىڭ اراسىندا قىرعىزستاندى، اتامباەۆتى كەمسىتۋ، كەلەمەجدەۋ ادەتكە اينالىپ كەتكەندەي...

- كەزىندە ۋكراينادا يۋششەنكو دەگەن پرەزيدەنت دەموكراتيالىق ۇراندار ارقاسىندا بيلىككە كەلىپ، كەيىن، ءوز ۋادەلەرىنەن اينىپ، ءوزىنىڭ پرەزيدەنتتىك وكىلەتتىكتەرىن پارلامەنت پەن ۇكىمەتپەن بولىسۋگە قارسى بولىپ، ابىرويدان، كەيىن قىزمەتىنەن ايرىلىپ قالعان ەدى.

سوندىقتان سونداي جولمەن، بيلىكتىڭ ءوز مەرزىمىندە اۋىسىپ تۇرۋى  مەن ونى ەشكىم دە مەنشىكتەي الماۋى پرينتسيپتەرىن جالاۋ ەتكەن رەۆوليۋتسيا ارقاسىندا بيلىككە كەلگەن اتامباۆتىڭ كەشەگى ءوزىن بيلىككە اكەلگەن ارىپتەستەرىنە وسىلاي باعا بەرۋىن دۇرىس دەپ سانامايمىن.

اتامباەۆتى نازارباەۆپەن سالىستىرۋدىڭ ءوزى قيىنداۋ بولار. ونىڭ نازارباەۆتان جاسى كىشى، تاجىريبەسى مەن كورگەن-بىلگەنى از دەگەندەي.

دەسەك تە، اتامباەۆ باسەكەلى سايلاۋدىڭ ارقاسىندا پرەزيدەنت بولدى جانە دە ول "كونستيتۋتسيالىق مەرزىمى اياقتالعان سوڭ، ءوز ورنىنان كەتەمىن، اۋىلشارۋاشىلىعىمەن اينالىسامىن" دەدى. بۇل بىزگە دە كەرەك دەموكراتيالىق ءداستۇر. جانە دە اتامباەۆ كوپپارتيالىق قوعام، ءوزىنىڭ شىنايى قارسىلاستارى بار مەملەكەتتى باسقارىپ وتىر.

- بىزدە بولسا، جاعداي بولەك دەيسىز عوي... ءامىرجان اعا، ۋاقىت تاۋىپ سۇحبات بەرگەنىڭىزگە راقمەت!

- سىزدەرگە دە ۇلكەن راقمەت!

سۇحباتتاسقان نۇرگەلدى ابدىعانيۇلى

Abai.kz