«قازاقستاننىڭ دامۋ بانكى» اق باسقارما توراعاسى بولات جامىشەۆ بىرىڭعاي جيناقتاۋشى زەينەتاقى قورىنداعى قاراجات قايدا جۇمسالاتىنىن ايتىپ بەردى دەپ حابارلايدى «قازاقپارات» پورتالى.

تىلشىلەرگە ءتىل قاتقان توراعا بولات جامىشەۆ 15 ميلليارد تەڭگەنىڭ 15 جىلدا قايتارىلاتىنىن ايتىپتى.

«MEGA Silk Way ساۋدا ورتالىعىنىڭ قۇرىلىسىنا «بايتەرەك» حولينگىنە بولىنگەن بجزق قاراجاتى 15 جىلعا بەرىلدى. نەسيە سوماسى 15 ملرد تەڭگە. وعان «بايتەرەك دەۆەلوپمەنت» ەسەپشوتىنداعى قاراجاتتار كەپىلدىك بولادى. بۇل ەڭ سەنىمدى كەپىلدىك بولىپ تابىلادى. ستاۆكاسىنا كەلەتىن بولساق، ءبىز بجزق-دان 15 پايىزبەن الدىق، اتالمىش جوباعا 16,5 پايىزبەن بەردىك»، – دەيدى جامىشەۆ مىرزا.

ەستەرىڭىزگە سالا كەتەيىك، وسىنىڭ الدىندا قازاقستاندىقتاردىڭ بىرىڭعاي زەينەتاقى قورىنان 15 ميلليارد تەڭگە ەكسپو-2017 اۋماعىنداعى قۇرىلىس نىساندارىنا بەرىلەتىنىن جازعان بولاتىنبىز.

وسىدان كەيىن باق-قا سۇحبات بەرگەن كەي شەنەۋنىك بۇل اقپاراتتاردىڭ شىندىققا جاناسپايتىنىن ايتقان-تىن. ەندى مىنە، بانك باسشىسىنىڭ ءوزى  ەكسپو-2017 اۋماعىندا «مەگا» ساۋدا ورتالىعىنىڭ سالىناتىنىن مالىمدەدى.

«بىرىڭعاي جيناقتاۋشى زەينەتاقى قورىنىڭ قاراجاتى وتە قىمبات، سوندىقتان ءبىز ول قاراجاتتاردى جوبالارعا بولگەن كەزدە ءوزىمىزدىڭ قاراجاتتارمەن، ۇلتتىق قور مەن بيۋدجەتتىك قاراجاتتارمەن قوسامىز. مىسالى، ءبىز ۇدەمەلى يندۋستريالدىق-يننوۆاتسيالىق دامۋ باعدارلاماسىنىڭ ەكىنشى كەزەڭىندە قولعا الىناتىن جوبالارعا 225 ملرد تەڭگە قاراستىردىق. ونىڭ تەك 65 ملرد تەڭگەسى عانا – بجزق قاراجاتى. زەينەتاقى قورىنىڭ 15 ملرد تەڭگەسىن MEGA Silk Way ساۋدا ورتالىعىنا، 17,5 ملرد تەڭگەنى جۇك ۆاگوندارىنىڭ قۇرىلىسىنا جانە 30 ملرد تەڭگە ەكسپورتتىق جانە ەكسپورت الدىنداعى قارجىلاندىرۋدى قولداۋعا ءبولىنىپ وتىر. بۇل – بيىل ءبىزدىڭ بجزق-دان العان قاراجاتتار»، – دەدى بانك باسشىسى.

ەستەرىڭىزگە سالا كەتەيىك، جاقىندا قازاقستاننىڭ دامۋ بانكى قازاقستاندىقتاردىڭ زەينەتاقى قورىنان 15 ميلليارد تەڭگەگە جۋىق قارجىنى «ەكسپو-2017» قۇرىلىسىنا جۇمسايتىنىن مالىمدەگەن بولاتىن.

كەيىن «استانا ەكسپو-2017» ۇك-نىڭ قوعاممەن بايلانىس دەپارتامەنتىنىڭ ديرەكتورى سەرگەي كۋيانوۆ بولىنەتىن قارجىنىڭ ويىن-ساۋىق كەشەندەرىنە ەمەس، ناقتى ەكسپو جوباسى اياسىندا سالىناتىن عيماراتتار قۇرىلىسىنا جۇمسالاتىنىن مالىمدەگەن. ال جەكەلەگەن جوبالاردىڭ حالىقارالىق كورمەگە ەش قاتىسى جوق ەكەندىگىن ايتقان. مۇنداي جەكەلەگەن ينۆەستيتسيالىق جوبالاردىڭ ىشىندە نۇرلان سماعۇلوۆتىڭ مەگا ساۋدا ويىن-ساۋىق كەشەنى دە بار ەكەن.

نۇرگەلدى ابدىعانيۇلى

Abai.kz