كەزەكتى ەڭبەك دەمالىسىنان ورالعان ارتيستەردىڭ جازدا قايدا بارىپ، قالاي دەمالعاندىعى تۋرالى اقپارات ەلدى ەلەڭ ەتكىزەرى ءسوزسىز. مۇندايدا ونەر ادامدارىنىڭ ءبىرى شەت ەل اسىپ، شەت جەردە تىنىققاندى ءجون كورسە، ەكىنشىسى تۋعان جەردىڭ توپىراعىنان ءنار الىپ، كوگىنە اۋناپ، كولىنە شومىلادى. ۋاقىتىن جان راحاتىنان گورى شىعارماشىلىق دامۋعا ارناپ، كينو، فيلمدەرگە تۇسەتىن، ءان جازىپ، بەينەكليپتەر تۇسىرەتىن ارتيستەر دە از ەمەس. بۇگىندە م.اۋەزوۆ تەاترىنىڭ اكتەرلەرى 91-ماۋسىمدا تۇساۋى كەسىلەتىن سپەكتاكلدىڭ پرەمەراسىنا دايىندىق جۇمىستارىن باستاپ كەتكەن. وسى ورايدا جاڭا ماۋسىمداعى قاربالاس جۇمىستىڭ الدىندا اكتەرلەردى سوزگە تارتىپ، ونەر سۇيەر قاۋىمدى جاڭالىقتارىمەن حاباردار ەتكەندى ءجون كوردىك.

شىنار اسقاروۆا، قازاقستان جاستار وداعى سىيلىعىنىڭ لاۋرەاتى:

مەن بيىل وتكەن جىلدارعا قاراعاندا الدەقايدا كوبىرەك دەمالىپ، تىنىعىپ قايتتىم. ولاي دەيتىنىم، جىل سايىن دەمالىسىم كينو سالاسىنان، تەلەباعدارلامالاردان تۇسكەن ۇسىنىستارمەن، بەلگىلى ءبىر جوبالارمەن جۇمىس ىستەۋمەن وتەتىن. سوندىقتان وسى جىلى الدىما قانداي ۇسىنىس بولسا دا، قانشا ۇلكەن قارجى تولەنسە دە، مەن بيىل اۋىلىما بارىپ دەمالۋىم كەرەك دەپ ماقسات قويدىم. سەبەبى، ومىردەن قايتقان ۇلكەن كىسىلەر تۇسىمە كىرە باستادى. اۋىلعا بارىپ ارۋاقتى اكە-شەشەلەرىمىزگە ارناپ اس بەرگىمىز كەلدى. ءسويتىپ، تۋعان جەرىم سەمەي وبلىسى اقسۋات اۋدانىنا باردىم. ءبىر تۇسىنگەنىم، اۋىل دەگەن - سەنىڭ كىندىك قامىڭ تامعان جەر، سول جەردەن عانا شىنايى قۋات الىپ قايتادى ەكەنسىڭ. ال اۋىلدان قايتىپ كەلگەننەن كەيىن كىشكەنتاي قىزىمنىڭ كوڭىلىن قيماي قىرعىزستانعا ىستىق كولگە بارىپ دەمالىپ قايتتىق. سول ەكى ورتادا تەلەفونىمدى ءسوندىرىم قويسام دا، مەنى تاۋىپ العاندىقتان "ۇيلەنگەندەر" تەلەحيكاياسىنا ەپيزودتىق كەيىپكەر بولىپ ءتۇستىم.

باۋىرجان مانجىگىتوۆ، اكتەر:

90-ماۋسىمنىڭ جابىلۋىنان كەيىن ەل قاتارلى دەمالىسقا شىعىپ، تۋىپ-وسكەن ەلىم وڭتۇستىك قازاقستان وبلىسى، ماقتاارال اۋدانى،  جەتىساي قالاسىنا جول تارتىپ كەتتىم. تۋعان جەردىڭ توپىراعى ىستىق بولادى ەكەن، جاقىن جەر بولماعان سوڭ ءبىر جىلدا ءبىر، ءتىپتى اراعا ەكى، ءۇش جىلداپ ۋاقىت سالىپ ات ءىزىن سالاتىندىقتان، وسى جولى ايەل، بالا-شاعىمدى الىپ باردىم. دەسە دە، تەاتر باسشىلىعى ترۋپپا مەڭگەرۋشىلىگى قىزمەتىن ۇسىنعانى سەبەپتى وزگە ارىپتەستەرىمە قاراعاندا جۇمىسقا ەرتە شىعۋىما تۋرا كەلدى.

گۇلنۇر شىڭعىسوۆا، اكتريسا:

91-ماۋسىمعا دەكرەتتىك دەمالىستان كەيىن اياق باستىم. وسى ۋاقىت ارالىعىندا تەاتردى، كيەلى ساحنانى، ويناعان رولدەرىمدى قاتتى ساعىندىم. شىنىمدى ايتسام، جولداسىم ەكەۋىمىزدىڭ دە انالارىمىز قايتىس بولعان، سوندىقتان بالانى ۇيگە تاستاپ، تەاترعا كەلۋ قيىنداۋ بولدى. الايدا، ورىن العان سەبەپتەرگە قاراماستان جۇمىسقا شىعۋعا بەل بۋدىم.  قازىر بالاما قايىن اتام مەن قايىن ءسىڭىلىم قاراپ وتىر. تۇسىنىستىك تانىتىپ، قولداۋ بىلدىرگەن سول كىسىلەرگە العىس ايتقىم كەلەدى. كۇيەۋىم داۋلەت ەرەكەشەۆ تە ونەر ادامى، بۇگىنگى كۇنى ەكەۋىمىز قۇرعان دۋەتىمىزدە جاڭا ءان جازىپ، بەينەبايان تۇسىرۋگە دايىندالىپ ءجۇرمىز.

جانات تينباەۆ، اكتەر:

90-ماۋسىمنىڭ جابىلۋىنا شامالى ۋاقىت قالعاندا قاراشاڭىراق تەاترداعى ەڭبەك جولىمدى جالعاستىرۋعا قايتا كەلدىم. جۇمىس باستالعاندا كينو مەن تەاتر سالاسىن بىرگە الىپ ءجۇرۋ اۋىرلاۋ. سوندىقتان بۇرىن تۇسكەن "ىڭكار جۇرەك" تەلەحيكاياسىنىڭ ەكىنشى ماۋسىمىنىڭ ءتۇسىرىلىم جۇمىستارىن جازعى دەمالىسقا تۋرالاپ قويعىزۋعا ءماجبۇر بولدىم. تۇسىرىلىممەن قازاقستاننىڭ ءبىراز وڭىرلەرىن ارالاپ شىقتىم. الايدا، جۇمىس بابىمەن جۇرگەندىكتەن دەمالا المادىم. دەسە دە، بۇل جۇمىسقا دەگەن قارقىن، ىنتا، تالپىنىسىمدى باسەڭدەتە المايدى. وعان قوسا "ساباقتى ينە ساتىمەن" دەگەندەي، 91-ماۋسىمدا تۇساۋى كەسىلەتىن م.وماروۆانىڭ «اقتاستاعى احيكو-سان» دراماسىنان 1-تەرگەۋشىنىڭ ءرولىن الدىم.  

دايىنداعان - ءمولدىر بەكجان

Abai.kz