بۇل تۋرالى بۇگىن وقو ايماقتىق كوممۋنيكاتسيالار قىزمەتىندە وتكەن بريفينگتە وبلىستىق ءبىلىم باسقارماسىنىڭ ءبولىم باسشىسى ءا.كەنجەباەۆ پەن شىمكەنت قالالىق ءبىلىم ءبولىمىنىڭ باسشىسى ج.تاجيەۆا وڭىرىمىزدەگى ءبىلىم وشاقتارىنىڭ 2016-2017 جاڭا وقۋ جىلىنا دايىندىق بارىسى تۋرالى جۋرناليستەرمەن وتكىزگەن بريفينگىندە حابارلادى. جاڭا وقۋ جىلىن تىڭ جاڭالىقتارمەن قارسى الىپ، ءبىلىم سالاسىنداعى وزگەرىستەرگە توقتالعان جەتەكشىلەر 1 قىركۇيەك كۇنى مەكتەپ تابالدىرىعىن 73699 بالا اتتايتىنىن حابارلادى.

«2016 جىلعى قىركۇيەك ايىنان باستاپ، رەسپۋبليكاداعى جالپى ءبىلىم بەرەتىن مەكتەپتەردىڭ ءبىرىنشى سىنىپتارى 5 كۇندىك وقۋ اپتاسىنا كوشەدى. 5 كۇندىك وقۋ اپتاسىنا كوشۋ 2017-2018 جىلدارى كەزەڭ-كەزەڭىمەن جۇزەگە اسىرىلادى. 2017 جىلى 2, 5,7,9 –سىنىپ وقۋشىلارى 5 كۇندىك وقۋ اپتاسىنا كوشەدى. 2018 جىلدان باستاپ بارلىق باسقا سىنىپ وقۋشىلارى جاڭا وقۋ بارىسىنا كوشەدى. دامىعان ەلدەردە مەكتەپتەردە بەس كۇندىك وقۋ اپتاسى ەنگىزىلگەن. بۇل بالانىڭ قالپىنا كەلىپ، ال ۇستازدىڭ جاقسى دەمالىپ، ساباققا ساپالى دايىندالۋىنا مۇمكىندىك بەرەدى» - دەدى ءا.كەنجەباەۆ.

سونىمەن قاتار، ول جاڭا وقۋ جىلىندا جاڭارتىلعان ءبىلىم بەرۋ مازمۇنىنا كوشۋ ۇردىسىنە بايلانىستى وبلىستا 10 مىڭعا جۋىق مۇعالىم بىلىكتىلىكتى ارتتىرۋ كۋرستارىنان وتكەنىن حابارلادى. سونداي-اق، جاڭا وقۋ جىلىندا وڭىرىمىزدە ەل تاۋەلسىزدىگىنىڭ 25 جىلدىعىنا وراي، 25 مەكتەپ اشىلاتىنىن جەتكىزدى.  

ءباسپاسوز جيىنىندا ءسوز العان شىمكەنت قالاسى ءبىلىم ءبولىمىنىڭ باسشىسى ج.تاجيەۆا، اسىرەسە، وقۋلىق ماسەلەسىندە تاپشىلىق بولمايتىنىن باياندادى.

«2016 جىلى شىمكەنتتەگى ءۇش مەكتەپ پەن ءۇش بالاباقشادا كۇردەلى جوندەۋ جۇمىستارى جۇرگىزىلۋدە. بيىلعى قۇرىلىس جۇمىستارى جۇرگىزىلىپ جاتقان 2 جاڭا مەكتەپتىڭ (قاراتوبە ش.ا. – 600 ورىندىق، ىنتىماق ش.ا. – 900 ورىندىق) جانە وسپانوۆ كوشەسى، №61 عيماراتتىڭ بالاباقشا رەتىندە قايتا قۇرۋ جۇمىستارىن اياقتاپ، وسى جىلدىڭ 1 قىركۇيەگىندە پايدالانۋعا بەرۋ جوسپارلانۋدا. سونىمەن قاتار، 2016 جىلى № 91, 111 مەكتەپتەردىڭ 300 جانە №53 مەكتەپتىڭ 600 ورىندىق قۇرىلىستارى اياقتالىپ، 1 قىركۇيەككە وقۋشىلاردى قابىلداۋعا دايىن بولماق. №34 مەكتەپتىڭ 150 ورىندىق قوسىمشا قۇرىلىسىن پايدالانۋعا تاپسىرۋ اعىمداعى جىلدىڭ جەلتوقسان ايىنا جوسپارلانعان»، - دەدى شىمكەنت قالالىق ءبىلىم ءبولىمىنىڭ باسشىسى.

جيىندا مەكتەپتەردىڭ 100 پايىز تەلەفونداندىرىلىپ، 100 پايىز ينتەرنەت جەلىسىنە قوسىلعانى دا ايتىلدى.

ايتا كەتەيىك، وڭتۇستىك قازاقستان وبلىسىندا 1022 مەكتەپ بار.

وقو اكىمىنىڭ ءباسپاسوز قىزمەتى

اباي-اقپارات