كەڭەس وداعى كەزىندە سايرام اۋدانىنداعى اۋىل شارۋاشىلىق ماشينالارىن جاسايتىن «مانكەنتسەلماش» زاۋىتى شەتەلدەرگە ايگىلى بولاتىن. ونداعى سۋ كوتەرگىشتەر، سۋ سورعىش ستانتسالار جانە باسقا دا اۋىل شارۋاشىلىعىنا قاجەتتى ماشينالار كاسىپورىننان بارلىق وداقتاس رەسپۋبليكالارعا جانە باسقا دا ازيا جانە افريكا ەلدەرىنە جىبەرىلىپ وتىرىلعان.

90-شى جىلدارى توقىراۋعا تۇسكەن بۇل زاۋىت كەيىننەن قاناتىن كەڭگە جايىپ، ەڭسەسىن كوتەرە باستادى. كۇن سايىن زاۋىت ونىمىنە تاپسىرىس ارتىپ، شەتەلدىكتەر قىزىعۋشىلىق تانىتۋدا. 2014 جىلى  تۇركمەنستانعا 250 دانا سۋ كوتەرگىشتەر جىبەرىلگەن.

تاپسىرىستاردىڭ سانى ارتقاندا، كادرلاردىڭ جەتىسپەۋشىلىگىن بايقاعان زاۋىت باسشىلىعى  ماماندار دايارلايتىن كوللەدج اشىپ، وزىنە قاجەتتى كادرلاردى دايارلاي باستادى. وقىتۋ جۇيەسى دۋالدى تۇردە، ياعني پارتادا كوپ وتىرعاننان گورى، ستۋدەنتتەردى وندىرىستە كوپ جۇرگىزۋ. ءبىلىم الۋشىلارعا بارلىق جاعدايى قاراستىرىلعان ارنايى جاتاقحانا اشىلدى. 2014 جىلى ءبىرىنشى بىتىرۋشىلەر بۇگىنگى تاڭدا مەتالل تەحنولوگياسىن يگەرىپ، رەسمي تۇردە زاۋىتتا ەڭبەك ەتىپ، جاڭا ماماندارمەن تاجىريبە الماسۋدا. وسى تۇرعىدا زاۋىت ۇجىمى جاسارۋدا. 2015 جىلى جۇمىسشىلاردىڭ ەڭبەك جالاقىسى دا كوتەرىلگەن.

2016 جىلدىڭ 6 ايىندا سايرام  اۋدانىنىڭ وڭدەۋ ونەركاسىبىنىڭ ءونىم كولەمى 7496,9 ملن.تەڭگەنى قۇراسا، ونىڭ ىشىندە ماشيناجاساۋ سالاسىندا ءونىم كولەمى 662,8 ملن.تەڭگە. بۇل 2015 جىلدىڭ ءونىم كولەمىمەن سالىستىرعاندا 3 ەسەگە ارتقان. بۇگىنگى تاڭدا وندىرىستە 180 ادام ەڭبەك ەتۋدە. بيۋدجەتكە تولەنگەن قارجى كولەمى 1,7 ملن.تەڭگەنى قۇراپ وتىر.

الداعى ۋاقىتتا زاۋىت باسەكەگە قابىلەتتىگىن ارتتىرۋ ءۇشىن  تاۋاردىڭ تۇرلەرىن كوبەيتىپ،  جاڭا تەحنولوگيالاردى ەندىرۋدى كوزدەپ وتىر.

Abai.kz