جۇما, 19 شىلدە 2019
كاسىپ-ءتۇبى ءناسىپ 2496 0 پىكىر 12 تامىز, 2016 ساعات 10:26

شاردارادا ەكى بالىق زاۋىتى ىسكە قوسىلماق

وڭتۇستىك قازاقستان وبلىسىنىڭ شاردارا اۋدانىندا ءبىراز جىلدان بەرى توقتاپ تۇرعان بالىق ءوسىرۋ تالىمباعى بيىلدان باستاپ قايتا ىسكە قوسىلدى، دەپ حابارلايدى BNews.kz. 

اۋداندا بالىق شارۋاشىلىعىن دامىتۋ ماقساتىندا اشىلعان «شاردارا بالىق پيتومنيگى» جشس-ىندە بيىلعى جىلدىڭ ءساۋىر ايىنان باستاپ شاباقتار جىبەرىلە باستادى. 

دالىرەك ايتاتىن بولساق، بۇگىندە جالپى اۋماعى 68,2 گەكتاردى قۇرايتىن توعان ىسكە قوسىلىپ، 15,7 ملن دانا بالىق بالاڭقۇرتتارى (ليچينكا) وسىرىلۋدە. 

بۇدان بولەك، اۋدانداعى «تۇران» شارۋا قوجالىعى ارنايى بالىق وسىرەتىن ورىننىڭ قۇرىلىسىن دايىنداۋ ۇستىندە. قازىرگى تاڭدا وندا ورىنداردى قازۋ، قۇرال-جابدىقتاردى ورناتۋ جۇمىستارى جۇرگىزىلۋدە.سونىمەن بىرگە، اۋداننان جەكە كاسىپكەرلەردىڭ ۇيىمداستىرۋىمەن پيلوتتىق جوبا رەتىندە شاردارا سۋ قويماسى اۋماعىنان بالىقتى تورلى شارباقتا ءوسىرۋ شارۋاشىلىعىن قولعا الۋ جۇمىستارى دا جۇرگىزىلىپ جاتىر. 2014 جىلى وسىناۋ تورلى شارباقتا سىناق رەتىندە 15 توننا بالىق وسىرىلسە، بىلتىرعى جىلى جىل 300 توننا شاباق ءوسىرىلدى. سۋ قويماسىنداعى تورلى شارباقتا كەلەشەكتە 3000-4000 توننا كولەمىندە بالىق ءوندىرۋ جوسپارلانىپ وتىر. 

ايتا كەتۋ كەرەك، بۇگىنگى تاڭدا شاردارا اۋدانىندا ەكى بالىق وڭدەۋ زاۋىتى جۇمىس ىستەپ كەلەدى. سونىڭ ءبىرى – جىلىنا 2500 توننا بالىق وڭدەۋمەن اينالىساتىن «حاميت» ستك بالىق وڭدەۋ زاۋىتى. اتالمىش كاسىپورىن بازاسىندا فيلە، كەپتىرىلگەن، تۇزدالعان بالىقتى وڭدەۋ جانە دايىنداۋ، قالدىقسىز ءوندىرىستى قولعا الۋ ماقساتىندا بالىق سۇيەگىنەن ۇنتاقتالعان جەم دايىنداۋ تسەحتارى جۇمىس جاساۋدا. 
جىلىنا 1000 توننا مۇزداتىلعان جانە ىستالعان بالىق، فيلە ونىمدەرىن شىعاراتىن «شاردارا – بالىق-1» بالىق وڭدەۋ زاۋىتىندا 70 ادام جۇمىس ىستەيدى.

مۇنان بولەك، اۋدان اكىمى ءباسپاسوز قىزمەتىنىڭ مالىمەتىنشە، جىل سوڭىنا دەيىن شاردارادا تاعى دا ەكى بالىق زاۋىتى ىسكە قوسىلماق.  «ۇدەمەلى يندۋستريالدى-يننوۆاتسيالىق دامۋ باعدارلاماسى» اياسىندا سالىنىپ جاتقان جەكە كاسىپكەر «جالعاسباەۆ ت» جانە «ساودات» جشس جىلىنا ارقايسىسى 600 توننا بالىق ونىمدەرىن ءوندىرۋدى جوسپارلاپ وتىر.

Abai.kz

0 پىكىر