ارىس قالاسىنىڭ اكىمى ج.جاپپارقۇلدىڭ وتباسىندا بولدى. بۇل تۋرالى «Abai.kz» پورتالى وڭتۇستىك قازاقستان وبلىسى اكىمى ءباسپاسوز قىزمەتىنىڭ «فەيسبۋك» جەلىسىندەگى رەسمي پاراقشاسىنا سىلتەمە جاساي وتىرىپ حابارلايدى.

قالا اكىمى سەيىت مىرزاقۇلۇلى بارشا قازاق ەلىنە قۋانىش سىيلاعان كۇمىس قىزىمىزدىڭ اتا-اناسىنا العىس ءبىلدىرۋ ماقساتىندا زىلتەمىرشى جازيرانىڭ شاڭىراعىندا بولدى. 
باتىر قىزىمىزدىڭ بايراقتى باسەكەدە قازاق ەلىنىڭ اتىن تاعى ءبىر بيىك بەلەستەن كورسەتكەنى ءۇشىن اتا-اناسى مەن تۋىس-باۋىرلارىنا قالا حالقى مەن ءوز اتىنان شەكسىز العىسىن ءبىلدىردى.

سونىمەن قاتار 2020 جىلى توكيو قالاسىندا وتەتىن وليمپيادادا جازيرانىڭ توپ جارىپ، التىننان القا تاعىپ، ەلىمىزدىڭ اتىن كۇللى الەمگە تانىتۋىنا تىلەكتەسىگىن ءبىلدىردى.
ەسكە سالايىق، ريو-دە-جانەيرودا ءوتىپ جاتقان ءحححى جازعى وليمپيادا ويىندارىندا اۋىر اتلەتيكادان 69 كەلى سالماقتاعى ايەلدەر اراسىنداعى جارىس مارەسىنە جەتىپ، قازاقستاندىق اۋىر اتلەت، جەرلەسىمىز جازيرا جاپپارقۇل ەكىنشى ورىنعا تۇراقتاپ، كۇمىس مەدالدىڭ يەگەرى اتاندى.

ماقتانىشىمىز، قازاقستاننىڭ كوك بايراعىن كوكتە جەلبىرەتكەن جازيرا زىلتەمىر كوتەرۋدەن وليمپيادانىڭ كۇمىس جۇلدەگەرى اتانعان تۇڭعىش قازاق سپورتشىسى بولىپ وتىر.

دەرەككوزى: ارىس قالاسى اكىمىنىڭ ءباسپاسوز قىزمەتى

Abai.kz