جىل باسىنان بەرى ادەپ جونىندەگى كەڭەستە 50 ءىس قارالعان. بۇل تۋرالى «Abai.kz» پورتالى «otyrar.kz» سايتىنا سىلتەمە جاساي وتىرىپ حابارلايدى.

وڭتۇستىك قازاقستان وبلىسىندا شەنەۋنىكتەر جەر تەلىمدەرىن ءوز تۋىستارىنا بەرگەن. قىزمەتتەرىن اسىرا پايدالانعان ەكى لاۋازىمدى تۇلعا اكىمىشىلىك جاۋاپقا تارتىلدى. بۇل تۋرالى وبلىستىق مەملەكەتتىك قىزمەت ىستەرى جونىندەگى دەپارتامەنت باسشىسىنىڭ ورىنباسارى ابدۋللا ەسىمحانوۆ مىرزا تىلشىلەردىڭ قاتىسۋىمەن وتكەن بريفينگىدە ءمالىم ەتتى.

زاڭدى بەلشەسىنەن باسىپ، ەرەجەنى بۇزعانداردىڭ ءبىرى — وڭتۇستىك قازاقستان وبلىسىنا قاراستى سارىاعاش اۋدانى بىرتىلەك اۋىل وكرۋگىنە قاراستى اكىمشىلىك قىزمەتكەرى ەكەن. ول ءوزىنىڭ ۇلى مەن ىنىسىنە ءتيىستى قۇجاتتارعا قول قويىپ، جەر ۋچاسكەلەرىن جالعا بەرىپ وتىرعان. مۇنداي جاعداي ماقتاارال اۋدانىنىڭ جىلىسۋ اۋىلدىق وكرۋگىنە قاراستى اكىمشىلىكتە دە ورىن العان.

ايتا كەتەيىك، جىل باسىنان بەرى ادەپ جونىندەگى كەڭەستە 50 ماسەلە قارالعان. ونىڭ ىشىندە 42 ءىس - تارتىپتىك ءىس، ال قالعاندارى سىبايلاس جەمقورلىققا قاتىستى ماسەلەلەر بولىپتى. وقو ىشكى ىستەر دەپارتامەنتىنە كەلىپ تۇسكەن ۇسىنىستار بويىنشا لاۋازىمدى تۇلعالاردىڭ بارلىعى جاۋاپقا تارتىلعان.

Abai.kz