ريو وليمپياداسىندا وتكەن اۋىر اتلەتتەر اراسىنداعى سىندا جەرلەسىمىز جازيرا جاپپارقۇل كۇمىستەن القا تاقتى. 

69 كەلىگە دەيىنگى سالماقتاعى زىلتەمىرشى قىزداردىڭ باسەكەسىندە ەل نامىسىن قورعاعان جازيرا سەرپە كوتەرۋدە الدىمەن 111, كەيىن 115 كەلىنى باعىندىردى. الايدا، ءۇشىنشى مۇمكىندىگىندە جازيراعا 117 كەلى باعىنعان جوق. ال جازيرانىڭ باستى قارسىلاسى قىتايلىق اتلەت 116 كەلىنى باعىندىردى.

سەرپە كوتەرۋدە جازيرا 140 كەلىنى ەكىنشى مۇمكىندىگىندە كوتەرىپ، سوڭعى مۇمكىندىگىندە 144 كەلىنى ەڭسەردى. وسىلايشا قازاق قىزى وليمپيادانىڭ كۇمىس جۇلدەگەرى اتاندى.

التىن مەدال جازيرادان ەكى كەلى ارتىق كوتەرگەن قىتايلىق قىزدىڭ ەنشىسىندە كەتسە، قولانى مىسىرلىق اتلەت يەلەندى.

ەسكە سالا كەتەيىك، قازاق قىزدارى بۇگىنگە دەيىن وليمپيادا تۇعىرىنا كوتەرىلگەن ەمەس.

جازيرا جاپپارقۇل 1993 جىلى وڭتۇستىك قازاقستان وبلىسى، ارىس قالاسىندا دۇنيەگە كەلگەن. 8 جاسىنان باستاپ اۋىر اتلەتيكامەن اينالىسا باستاعان. جاتتىقتىرۋشىسى - راشيت تولەگەنوۆ. ول جاسوسپىرىمدەر وليمپياداسىنىڭ چەمپيونى، الەم چەمپيوناتىنىڭ ەكى دۇركىن كۇمىس جۇلدەگەرى.

ايتا كەتەيىك، جازعى وليمپيادا ويىندارىنىڭ بەس كۇنىندە قازاقستان قورجىنىنا جەتى مەدال ءتۇستى. ەلىمىزدىڭ كوك تۋىن جەلبىرەتىپ، الاشتىڭ ايبىنىن اسقاقتاتقان ەكى التىندى نيدجات راگيموۆ (اۋىر اتلەتيكا) پەن دميتري بالاندين ء(جۇزۋ) السا، قوس كۇمىس ەلدوس سمەتوۆ (دزيۋدو) پەن جازيرا جاپپارقۇلدىڭ (اۋىر اتلەتيكا) ەنشىسىندە. ال ءۇش قولانى وتگونتسەتسەگ گالبادراح (دزيۋدو) پەن فارحاد حاركي جانە كارينا گوريچەۆا (ەكەۋى دە اۋىر اتلەتيكا) يەلەندى. 

Abai.kz