كەشە وقو اكىمدىگىنىڭ «قوعامدىق كەلىسىم» كمم-دە «الەۋمەتتىك جەلىنىڭ ارتىقشىلىقتارى مەن كەمشىلىكتەرى. ونى ءتيىمدى پايدالانۋ جولدارى» تاقىرىبىندا سەمينار-ترەنينگ ۇيىمداستىرىلدى. سەمينارعا بارلىق اۋدان، قالالىق «جاستار رەسۋرستىق ورتالىعى» كمم-ءنىڭ باسشىلارى مەن الەۋمەتتىك جەلىگە جاۋاپتى ماماندارى مەن الەۋمەتتىك جەلى بەلسەندىلەرى قاتىستى. 

الەۋمەتتىك جەلىنىڭ جاستار اراسىندا كەڭىنەن تارالىپ، ماڭىزدى ءرول الۋىنا بايلانىستى مەملەكەتتىك مەكەمەلەردە جاڭالىقتار مەن حابارلاندىرۋلاردىڭ جەدەل جەتۋىن جانە اقپاراتتىق قاۋىپسىزدىكتى جەتىلدىرۋ، ارتىقشىلىقتارى مەن كەمشىلىكتەرىن ءتۇسىندىرۋ، ونى ءتيىمدى پايدالانۋ جولدارىن ناسيحاتتاۋدى ماقسات تۇتقان باسقوسۋدا اقپاراتتار اعىنى تاسقىنداعان زاماندا ءاربىر الەۋمەتتىك جەلىنى قولدانۋشى قوعام الدىنداعى جاۋاپكەرشىلىگىن سەزىنۋى كەرەكتىگى ايتىلدى.

ودان بولەك، «مەملەكەتتىك مەكەمەلەردىڭ الەۋمەتتىك جەلىدە اقپارات تاراتۋ بەلسەندىلىگىنىڭ رەيتينگىن قۇرۋ» تاقىرىبىندا جانە klout سايتى تۋرالى بەلگىلى بلوگەر، وقو جۋرناليستەر مەن بلوگەرلەر كلۋبىنىڭ مۇشەسى ا.شوتاەۆ ءسوز قوزعاپ، جەلىلەردە جازبالاردى قاي ۋاقىتتا جاريالاۋ كەرەكتىگى مەن پايدالانۋشىلاردى تارتۋ، ونى بولىسۋگە ىنتالاندىرۋ، كوپ «لايك» جيناۋ مەن پىكىر جازۋعا قىزىقتىرۋ سىندى ءتيىمدى تۇستارعا توقتالدى. 

ايتا كەتۋ كەرەك، جىل باسىنان بەرى، وبلىستىق «جاستار رەسۋرستىق ورتالىعى» كمم-ءسى 22 جوعارى جانە ورتا ارناۋلى وقۋ ورىندارى مەن 5 اۋدان، قالا ورتالىقتارىندا جاستارعا ارناپ «الەۋمەتتىك جەلىنىڭ ارتىقشىلىقتارى مەن كەمشىلىكتەرى. ونى ءتيىمدى پايدالانۋ جولدارى» تاقىرىبىندا سەمينار-ترەنينگتەر وتكىزدى. اتالمىش شارا الداعى ۋاقىتتا دا جالعاسىن تاباتىن بولادى.

دەرەككوزى : وقو اكىمىنىڭ ءباسپاسوز قىزمەتى

Abai.kz