جۇما, 29 ناۋرىز 2024
نە كورىپ ءجۇرسىز؟ 3527 0 پىكىر 5 تامىز, 2016 ساعات 10:44

اقسۋكەنتتەن بارعان اكبارالى سولتۇستىكتە 15 ادامدى جۇمىسپەن قامتىپ وتىر

العاش ەستىگەندە تاڭدانعانىمىز راس. ءتىپتى، تاڭدانۋدان بۇرىن اينالاسى جەتى-سەگىز ايدىڭ ىشىندە ءىسى ىلگەرى باسىپ، وسىنشا ادامعا جۇمىس تاۋىپ بەرە قوياتىنداي قاي كاسىپتىڭ قۇلاعىن ۇستادى ەكەن دەگەن كوڭىلدى كۇدىك بيلەگەنىن نەسىنە جاسىرامىز. ونىڭ ۇستىنە، سوناۋ سولتۇستىككە جۇمىس ىزدەپ بارىپ وتىرسا... سويتكەن كۇدىگىمىز بەكەر بولىپ شىقتى. 

جاستايىنان جەردىڭ قادىرىن ءبىلىپ وسكەن اكبارالى بەگاليەۆ سايرام اۋدانىنا قاراستى اقسۋكەنت اۋىلىنىڭ تۋماسى. 26 جاستاعى تەپسە تەمىر ۇزەتىن جىگىت بىلتىر ەلباسىنىڭ وڭتۇستىك ايماقتاردان سولتۇستىككە جۇمىس كۇشىن تارتۋ جونىندەگى باستاماسىن ەستىپ، ەندىگى تاعدىرىن سول جاقپەن بايلانىستىرۋعا شەشىم قابىلدايدى. ويى – سولتۇستىكتىڭ شۇرايلى جەرىن يگەرىپ، تابىس تابۋ. ويلانىپ جاتپاستان بىردەن سولتۇستىك قازاقستان وبلىسىنا بارۋعا تاڭداۋ جاسايدى. ءسوزدىڭ رەتى كەلگەندە ايتا كەتەيىك، قازاقستاننىڭ سولتۇستىك وبلىستارى ىشىندە ەڭ قۇنارلى جەر قىزىلجار وڭىرىندە. وندا وسىمدىكپەن بىرگە مال شارۋاشىلىعىن دامىتۋعا، اۋىل شارۋاشىلىعى ونىمدەرىن ۇقساتۋعا قولايلى جاعداي بار. قىزىلجار اۋدانىنىڭ سوكولوۆكا اۋىلىنا جايعاسقان اكبارالى الدىمەن بوس جاتقان جەردى جالعا الىپ، ونىڭ ءتورت گەكتارىن ەگىستىككە ىڭعايلادى.

- نەگىزى اقسۋكەنتتەگى تۇرمىسىمىز وزگەلەردەن كوش ىلگەرى بولماعانمەن، وزىمىزگە جەتەتىن تابىسىمىز بار-تىن. ءوزىڭىز بىلەسىز، وندا قازىر حالىق تىعىز ورنالاسقان. جەر بولسا، ول دا شەكتەۋلى. بۇل جاقتاعىداي جەردى گەكتارلاپ الىپ، كوسىلىپ ەڭبەك ەتۋگە مۇمكىندىك جوقتىڭ قاسى. قۇدايعا شۇكىر قازىر جاعدايىم جامان ەمەس. كوكتەم شىعا لاقاپقا ورامجاپىراقتىڭ جەتى ءتۇرىن، قىزاناق، ءسابىز، قيار سىندى كوكونىستىڭ تۇرلەرىن ەكتىم. ءونىم ساپالى بولۋى ءۇشىن ۇرىقتاردى گوللانديادان ارنايى تاپسىرىسپەن الدىردىم،- دەيدى باعبان. 

جۇمىسى العا باسقان اكبارالى جاقىندا اتا-اناسى مەن اعاسى ءومىرالىنى قارىنداسى نافيسانى وسىندا كوشىرىپ اكەلىپتى. ءبىر رەتتىك بەرىلەتىن دەمەۋ قارجىعا دا قول جەتكىزگەن. كۇنگەيدەن كەلگەندەر ازىرگە باسپانا جالداپ تۇرادى. ماۋسىمنىڭ ورتاسىنان باستاپ 2,5 توننا قيار جيناپ، تابيعي تازا ءونىمدى پەتروپاۆلداعى «يۋجنىي» بازارى مەن كورشىلەس اۋىلدارداعى دۇكەندەرگە كوتەرمە باعامەن وتكىزىپ ءجۇر. ماۋسىمدىق جۇمىسقا جەرگىلىكتى جەردەن 15 ادامدى جۇمىسقا تارتىپ، ولارعا كۇنىنە 1500 تەڭگەدەن اقى تولەيدى. 

- كوكتەم شىققالى بەرى وسىندامىن. ەگىستىڭ ارامشوپتەرىن جۇلىپ، جەردى قوپسىتۋمەن اينالىسامىن. جازدا كوكونىستەرگە كۇتىم جاساپ، ولاردى جيناۋعا اتسالىسىپ جاتىرمىن. ايىنا قىرىق مىڭ تەڭگە تولەيدى. كۇندەلىكتى الىپ تۇرامىن دەسەڭ دە بولادى. ۇيگە جاقىن ءارى ىڭعايلى، - دەيدى سوكولوۆكا اۋىلىنىڭ تۇرعىنى ۆالەنتينا كيلينا. 

ءسويتىپ، سايرامنان بارعان اكبارالى قاي جەردە بولسا دا ەڭبەك ەتىپ، تابىس تابۋعا بولاتىنىن ءوز ىسىمەن دالەلدەپ ءجۇر. كەلەشەكتە 30 باس سيىر الىپ، ءسۇت جانە ەت ساتۋمەن اينالىسۋدى دا جوسپارلاپ وتىر. 

جالپى، سولتۇستىك قازاقستان وبلىسىنىڭ قىزىلجار اۋدانىنا وڭىرىمىزدەن 16 وتباسى كوشىپ بارعان. بارلىعى دا باسپانامەن، ماماندىعىنا قاراي جۇمىسپەن قامتىلعان.

داۋلەت تۇرسىنۇلى

«وڭتۇستىك قازاقستان» گازەتى 

Abai.kz 

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1582
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2281
عيبىرات

قايسار رۋحتى عازيز جان

مۇحتار قۇل-مۇحاممەد 3616