استاناداعى جاڭا ۆوكزال قازاقستاندىق جيھازبەن جابدىقتالاتىن بولدى 

ەلوردادا قۇرىلىسى ءجۇرىپ جاتقان تەمىر جول ۆوكزالىنىڭ اۋماعىندا وتاندىق جيھاز شىعارۋشىلاردىڭ جوباعا قاتىسۋى ماسەلەسىنە قاتىستى جۇمىس كوميسسياسىنىڭ ەكىنشى وتىرىسى ءوتتى. «اتامەكەن» قر ۇلتتىق كاسىپكەرلەر پالاتاسى ساتىپ الۋلار جانە جەرگىلىكتى قۇرام دەپارتامەنتىنىڭ ديرەكتورى رۋسلان مولداعايىپوۆ اتاپ وتكەندەي، قازاقستاندىق وندىرۋشىلەردىڭ جاڭا تەمىر جول ۆوكزالىن، EXPO-2017 مەن ۋنيۆەرسيادانىڭ نىساندارىن سالۋ سياقتى ۇلتتىق جوبالارعا قاتىسۋ مۇمكىندىكتەرى تالقىلانعان.  

اتالعان شارالاردىڭ ناتيجەسىندە وسى جىلدىڭ شىلدە ايىنىڭ باسىندا ۆوكزال قۇرىلىسىنىڭ باس مەردىگەرى «Sembol» كومپانياسى مەن جيھاز جانە اعاش وڭدەۋ ونەركاسىپتەرى قاۋىمداستىعى اراسىندا ارىپتەستىك تۋرالى كەلىسىم جاسالىپ، جۇمىس كوميسسياسى قۇرىلدى. 

وتىرىستا تاپسىرىس بەرۋشى، ياعني «قتج» ۇك» اق ءىرى جوبالار ديرەكتسياسى قازاقستان جيھاز قاۋىمداستىعىنىڭ تانىستىرىلىمىن تىڭدادى.  تەحنيكالىق ەرەكشەلىكتەر، جيھازعا قويىلاتىن تالاپتار، شارتتار تالقىلاندى. 

اتالعان كەزەڭدە تاپسىرىس سوماسى جاريالانبادى، الايدا،  ديرەكتسيانىڭ باس ينجەنەرى ي.گايدۋكتىڭ ايتۋىنشا، بيۋدجەت شەكتەۋلى. قازىرگى تاڭدا تاپسىرىس بەرۋشى ۇسىنىستاردى قاراپ جاتىر. 

وسى ارالىقتا «قتج» ۇك» اق ءىرى جوبالار ديرەكتسياسى نارىقتى زەرتتەپ، قازاقستاندىق وندىرۋشىلەردىڭ باعاسى شەتەلدىكتەرگە قاراعاندا ءبىرشاما ارزان دەگەن قورىتىندىعا كەلدى. 

ء «بىزدىڭ كاسىپورىندارىمىز جيھاز ونىمدەرىن تىكەلەي جەتكىزە الاتىن كونسورتسيۋمعا بىرىككەن.  ودان بولەك، وتاندىق كومپانيالاردى تارتۋ ۇشىن ۆوكزال ماڭىنداعى اۋماقتى كوگالداندىرۋ ماسەلەسىن دە قاراۋدامىز»، – دەپ اتاپ وتتى مولداعايىپوۆ. 

جيھاز قاۋىمداستىعىنىڭ رەسمي وكىلى قانات ىبراەۆ: «شىندىعىن ايتۋ كەرەك، قىزىلكەڭىردەك بولىپ ايتىستىق، الايدا ولار ءبىزدىڭ دالەلدەرىمىزدى قابىلدادى.  كەلىسسوزدەر بارىسىندا باس مەردىگەرگە ونداعان كاسىپورىندارمەن جۇمىس ىستەگەن قيىنداۋ تيەدى دەگەن پىكىرگە كەلدىك، سوندىقتان قاۋىمداستىقتا جيھاز كاسىپورىندارىنىڭ كونسورتسيۋمىن قۇرۋ تۋرالى شەشىم قابىلداندى. كونسورتسيۋمعا استانا، الماتى، ورال، قاراعاندى، پاۆلوداردىڭ جيھاز كاسىپورىندارى كىردى، ياعني قامتيتىن اۋماعى وتە ۇلكەن. بۇل ەلباسى ايتىپ جۇرگەن شاعىن جانە ورتا بيزنەسكە كورسەتىلگەن كومەك»، – دەپ اتاپ ءوتتى. 

ىبراەۆ بۇل نىساندا جۇمىس ىستەۋ ءۇشىن قاراجاتتىڭ سونشالىقتى ماڭىزدى جايت ەمەس ەكەنىن دە ايتىپ ءوتتى.  

«بۇل – ۇلتتىق جوبا، ەلوردامىزدىڭ قاقپاسى.  مۇنداي عيماراتتار 50-100 جىلدا ءبىر رەت سالىنادى.ء بىزدىڭ كاسىپورىندارىمىز ءۇشىن بۇل جوباعا قاتىسۋ – زور مارتەبە!»، – دەپ مالىمدەدى ول. 

Abai.kz