"سوت كوزلوۆتى مەرزىمىنەن بۇرىن شارتتى تۇردە بوساتۋ تۋرالى شەشىم شىعاردى. سوت شەشىمى 15 كۇننەن سوڭ كۇشىنە ەنەدى" دەپ جازدى جوۆتيس.

كوزلوۆ ءوزىن مەرزىمىنەن بۇرىن شارتتى تۇردە بوساتۋ تۋرالى ءوتىنىشتى 16 ماۋسىمدا بەرىپ، ونى قاپشاعاي قالالىق سوتى قاراعان.

بۇعان دەيىن ادۆوكات ايمان وماروۆا كوزلوۆتىڭ 2 تامىزدا الماتى وبلىسى زارەچنىي كەنتىندەگى لا155/14 تۇزەۋ مەكەمەسىندە "تۇرمە ىشىندەگى تۇرمە" - قاتاڭ جاعدايداعى اباقتىدان جالپى رەجيمدەگى اباقتىعا اۋىستىرىلعانىن حابارلاعان.

ۆلاديمير كوزلوۆ قاتاڭ جاعدايداعى اباقتىدا ءبىر جىلدان استام ۋاقىت بولعان. ونى 2015 جىلدىڭ 27 شىلدەسىندە 10 كۇن تۇرمە كارتسەرىندە ۇستاعاننان كەيىن قاتاڭ جاعدايداعى اباقتىعا جاپقان. بيىل كوكتەمدە تۇرمە كوميسسياسى كوزلوۆتىڭ ءتارتىبىن "نولدىك دەڭگەيدە" (تەرىس، يا وڭ ەمەس) دەپ باعالاعانىمەن، ونى قاتاڭ تارتىپتەگى اباقتىدا قالدىرعان.

قازاقستاندا سوت شەشىمىمەن قىزمەتىنە تىيىم سالىنعان وپپوزيتسيالىق "العا" پارتياسىنىڭ بۇرىنعى باسشىسى ۆلاديمير كوزلوۆ جاڭاوزەن وقيعاسىنا قاتىستى "الەۋمەتتىك الاۋىزدىقتى ورشىتكەن" دەگەن ايىپپەن 2012 جىلى جەتى جارىم جىلعا سوتتالعان. ۆلاديمير كوزلوۆ پەن جاقتاستارى بيلىك تاققان ايىپتاردىڭ ساياسي استارى بار دەپ بىلەدى.

Aباي-اقپارات