تۇركىستاندا ايالدامالار جاڭارتىلىپ جاتىر. بۇل تۋرالى «Abai.kz» پورتالى تۇركىستان قالاسى اكىمىنىڭ ءباسپاسوز قىزمەتىنە سىلتەمە جاساي وتىرىپ حابارلايدى.

تۇركىستان قالاسىنىڭ ورتالىعىنداعى ايالداماداردىڭ ءبىراز بولىگىن 2000 جىلدارى جەكە كاسىپكەرلەر جالعا الىپ، شاعىن ساۋدا دۇڭگىرشەكتەرىن اشقان بولاتىن. ءبىر وتباسىنىڭ تابىس كوزىنە اينالعان بۇل ورىندار جولاۋشىلار ءۇشىن دە ءتيىمدى ەدى.

دەسە دە قازىرگى كۇنى توزىعى جەتىپ، كونەرگەن بۇل ورىنداردى قايتا جاڭعىرتۋ ماقساتىندا جەرگىلىكتى بيلىك باستاما كوتەردى. وسى باعىتتا جالعا بەرىلگەن ايالداماداردى جاڭارتۋ ءۇشىن اتقارۋشى ورگان وكىلدەرى مەنشىك يەلەرىنە تۇسىندىرمە جۇمىستارىن جۇرگىزىپ، ۇسىنىس جاساعان.

ناتيجەسىندە يگى باستامانى قولداعان كاسىپكەرلەر وزدەرى سالعان ايالدامالاردى بۇزىپ، جولاۋشىلاردىڭ قوعامدىق كولىكتى كۇتۋ ورنىن مەملەكەتكە قايتارۋعا ءبىراۋىزدان ۇلەستەرىن قوسۋدا.

بۇگىنگى تاڭدا قالا ورتالىعىنداعى ساۋلەتى كەلىسكەن ايالدامالار جاڭادان ورناتىلۋدا. ەرەكشەلىگى سول، تۇنگى مەزگىلدە دە جارىق بەرىپ تۇراتىن بۇل ورىنداردا كوپشىلىك ءۇشىن ەل كولەمىندەگى باستى وقيعالار بەينەلەنگەن كورنەكى قۇرالدار ورناتىلعان.

ايتا كەتەيىك، تۇركىلەردىڭ ءتول مەكەنى – تۇركىستان!

ەلىمىزدىڭ رۋحاني استاناسى - ەجەلدەن مۇسىلمان اتاۋلى ءتاۋ ەتىپ بارىپ، زيارات قىلاتىن قۇتتى، قاسيەتتى مەكەنى.

وسى ەجەلگى قالادا قازاقتىڭ حاندارى مەملەكەتتىك ىستەردى جۇرگىزگەن. قوجا-احمەت ياسساۋي مۇراجايىندا ابىلاي، ەسىم حان، ابىلقايىر حاندار مەن حالقىمىزدىڭ باسقا دا ارداقتى ۇلدارى جەرلەنگەن كيەلى جەر.

ەكىنشى مەككە اتانعان قاسيەتتى تۇركىستانعا زيارات ەتۋشىلەردىڭ سانى كۇن ساناپ كوبەيىپ كەلەدى.

دەرەككوزى: تۇركىستان قالاسى اكىمىنىڭ ءباسپاسوز قىزمەتى 

Abai.kz