قازىعۇرت اۋدانىندا بيىل بىرقاتار ىشكى كوشەلەر جاڭارتىلىپ، قالىپقا كەلتىرىلىپ جاتىر،-دەپ جازادى وقو اكىمىنىڭ ءباسپاسوز قىزمەتى.

بۇگىنگى تاڭدا اۋداننىڭ قازىعۇرت اۋىلىنداعى 13 جولعا ورتا جوندەۋ جۇرگىزىلىپ، ۇزىندىعى 9 شاقىرىمعا جۋىق كوشەنىڭ جۇمىستارى اياقتالۋ ۇستىندە. اتاپ ايتقاندا، تاياۋ كۇندەرى ەلدى مەكەندەگى ا.جۇبانوۆ، فاحرۋددينوۆ، د.نۇرپەيىسوۆا، گاگارين، ع.مۇراتباەۆ، ەدىلوۆ، جامبىل، بۇعىباەۆ، س.مۇقانوۆ، جانكەلدين، م.ماقاتاەۆ، ب.مومىشۇلى جانە س.سەيفۋللين كوشەلەرى اسفالتتالىپ، جاڭا كەيىپكە ەنەتىن بولادى.

ورتا جوندەۋ جۇمىستارى شاربۇلاق اۋىلىندا دا جۇرگىزىلۋدە. اسفالت توسەلىپ جاتقان ءاشىروۆ پەن تولەەۆ كوشەلەرىنىڭ جالپى ۇزىندىعى 4 شاقىرىمدى قۇرايدى. 

جولداردى رەتتەۋ جۇمىستارى جىل سوڭىنا دەيىن جالعاسا بەرمەك. ماسەلەن، الداعى قازان-قاراشا ايلارىندا اۋداننىڭ 1 مامىر – اققۇم ەلدى مەكەندەرىن جالعايتىن 10,1 شاقىرىم جول مەن «اقبۋرا» بۇلاق كوزىنە باراتىن 4,9 شاقىرىم جانە امانكەلدى ەلدى مەكەنىنە باراتىن 16,4 شاقىرىم جولدارعا قايتا قۇرۋ، كۇردەلى جانە ورتا جوندەۋ جۇمىستارى باستالعالى تۇر. «جۇمىسپەن قامتۋ 2020» جول كارتاسى باعدارلاماسىنىڭ اياسىندا جاسالاتىن جۇمىستاردىڭ ىشىندە 31,4 شاقىرىم اياقجول، 16,2 شاقىرىم ىشكى شارۋاشىلىق كوشەلەردى ورتا جوندەۋ جۇمىستارى دا بار. 

ايتا كەتكەن ءجون، 2012-2015 جىلدار ارالىعىندا قازىعۇرتتا وبلىستىق، اۋداندىق ماڭىزى بار اۆتوموبيل جولدارىنىڭ 153,1 شاقىرىمى جوندەلدى. 

اۋدان اۋماعىنداعى جالپى جولدار 664,1 شاقىرىمدى قۇراسا، ونىڭ ىشىندە رەسپۋبليكالىق ماڭىزى بار جولدار 49 شاقىرىمدى، وبلىستىق ماڭىزى بار جولدار 278 شاقىرىمدى، اۋداندىق ماڭىزى بار جولدار 337,1 شاقىرىمدى قۇرايدى.

Abai.kz