اسپاننىڭ كەلبەتى اجارىنان كەتتى. كوك اسپان مەن جارىق كۇنگە ءزارۋ بوپ قالدىق. تاپ سول سەكىلدى جەردە دە تىنىشتىق جوق. جەردەگى تىرشىلىكتىڭ دە بەرەكەسى كەتكەلى قاشان. بۇكىلىنىڭ بىت-شىتىن شىعارىپ، جۇمىر جەردىڭ جاعاسىنان الىپ بىتكەن وسى – ساياسات.

الەمدە بولىپ جاتقان دۇربەلەڭگە كوز جۇما، «اللا سابىر بەرسىن» دەپ قانا وتىرعان ەل ەدىك. تىنىشتىقتا عانا كۇن كورىپ جاتقان جۇرتتى تۇلەن ءتۇرتتى. اياق استى اتىس-شابىس، ودان قالا بەردى جوعالسا ءتىرى قايتپايتىن بەيباقتار، نە كەرەك بىلىققا تولىپ كەتتى. تەگىندە تۇركيادا بولعان جاعدايعا الاڭداپ ەك، ەندى بىرەۋ ءۇشىن ەمەس ءوزىمىز ءۇشىن دە الاڭمەن ءومىر سۇرەتىن بولدىق. سىلتىدەي تىنىپ، ايرانداي ۇيىپ وتىرعان حالىقتىڭ شامىنا ءتيىپ تە، زارەسىن الىپ تا بولدىق. اركىم ءارتۇرلى بولجام ايتىپ، ەلدىڭ ەسىن شىعارىپ ءبىتتى. شەشىمى جوق، كۇرمەۋىنەن شەشىلمەيتىن جىپتەي، ابدىراپ قالدىق. ايدىڭ كۇنى اماندا «مىلتىقپەن» دە دوس بولىپ، سوعىستىڭ بەتىن اۋلاق قىلامىز با دەپ ءجۇرىپ، ىشتەي ىركىلىپ جاتىرمىز.

ادامزات ازعىنداپ كەتكەلى قاشان دەيمىز. ءيا، ارىسى پەرعاۋىننىڭ كەزىنەن باستاپ بەرىسى ماسسون، ودان قالا بەردى ەۋروپالىق گەي-پاراد قوسىلدى. ادامدىق كەلبەتتى، ادامدىق بولمىس پەن ار-ۇياتتى قۇرتۋ جولىنداعى يدەولوگيالار جاپپاي ءجۇرىپ جاتىر. ەڭ جامانى سول گەيلەر مەن بەيلەردى قولداپ، قورعاپ ازعىنداپ وتىرعانداردىڭ ماقساتى مۇسىلمانعا «اتاكا» جاساۋ. ولاي دەيتىنىمىز، سوڭعى كەزدەگى جاعدايلاردى الىپ قاراساق ءبارى مۇسىلماننىڭ كوزىن قۇرتۋعا، ولاردىڭ بەرەكەسىن قاشىرۋعا ارنايى دايىندالىپ جاسالعان ستسەناري سەكىلدى. ەكى جاعىنان ساراپتاما جاساپ كورەلىك.

سوناۋ التىن وردا داۋىرىنەن باستاپ، ارىسى پايعامباردىڭ كەزى دەيىك، بۇكىل جەر بەتىنە بيلىك پەن ۇستەمدىك جۇرگىزىپ كەلە جاتقان مۇسىلمان. ولاي بولمايتىنداي سەبەپ جوق. ويتكەنى، اللانىڭ قۇلى – مۇسىلمان. ونىڭ اسىلى – يسلام ەمەس پە؟! كوكتەن توبە كورسەتپەسە دە بار ەكەنىن سەزدىرىپ جۇرگەن اللاعا قارسى شەرۋ مەن يدەولوگيالىق قارۋ پايدالانۋ ءبىر كەلسە قۇدايىن تانىمايتىنداردان كەلەدى. ەۋروپانىڭ ەسىن شىعارعان وسمان يمپەرياسىنان باستاپ، الەمگە ءامىرىن جۇرگىزگەن ساللاحاددين، بەيبارىس سۇلتانداردا بابالارىنىڭ كەگى قالعان كرەستەر مەن كرەسشىلەردىڭ ادەيى جاساپ وتىرعان، كەك الۋعا ۇمتىلعان ارەكەتى مە دەپ تە قاراۋعا بولادى. سەبەبى بۇگىن الەمدى بيلەپ وتىرعان سولاردىڭ ۇرپاقتارى. ەكىنشى جاعىنان، جەر بەتىندە ادامدىقتىڭ ەڭ بيىك ستاتۋسىن ۇستاپ وتىرعان مۇسىلماندار. سەبەبى ءدىنى ازعىنداۋعا جول بەرمەيدى. وسىنى كورە الماعان ازعىن ۇرپاق، ازدىرعىسى كەلەدى دە. بالكىم، تەگىندە اللاعا ساۋساعىن كورسەتىپ كەتكەن شايتاننىڭ سوزىندەگى ازدىرۋشىلار وسى بولار. شايتان «قۇلدارىڭنىڭ ءبارىن توزاققا سۇيرەيمىن» دەگەن جوق پا! اللا بولسا «جۇرەگىندەگى ىقىلاس وعان جەتكىزبەيدى» دەدى. ال سول ىقىلاستى «ىقىلاس» سۇرەسىنەن ىزدەپ جۇرگەنىمىز ايىپ ەمەس، قايتا دىنگە ءبىر تابان جاقىندىعىمىز. ءدال قازىرگى ساتتە الەمدە ءدىني قاقتىعىستار وزگە سوعىستان الدەقايدا قاسىرەتكە تولى بولىپ تۇر. وتان ءۇشىن نە ەل ءۇشىن نە ۇلت ءۇشىن ەمەس، «جيھاد» ءسوزى ءۇشىن عانا وزدەرىن جارىپ، ناقاقتان ناقاق قان توگۋى، زينا جاساۋدىڭ ءوزىن ءدىن جولىنداعى كەرەك دۇنيە دەپ ءتۇسىنىپ العان جانداردىڭ ارەكەتى، ءوز ءدىنىن سىيلاپ، وزگە ءدىندى جەك كورۋ سىندى قۇرمەتسىزدىك پەن استامشىلدىقتان ءبارى تۋىپ وتىر. وسىندايدا «ۋاعىز» تىڭداۋ ابزال دەيمىز. بىراق كىمدى، كىمنىڭ ۋاعىزىن تىڭدايمىز وعان جاۋاپ جوق. ۋاعىزدارى ۋاتىلىپ كەتكەن، ۋ سەكىلدى. ءبارى دەۋدەن اۋلاقپىز، بىراق ءبارى سول ۋدىڭ جەتەگىندە جۇرگەن جوق پا.
التى قۇرلىق التاۋىن الا قىلىپ، اۋىزداعىنى كەتىردى دە تورتەۋىن بىرىكتىرىپ توبەدەگىلەرىن كەلتىرە المادى. بۇل ەندىگى شەشىمى جوق دۇنيە سەكىلدى. جالعىز جاۋاپتى دىننەن ىزدەۋگە تۋرا كەلەدى. ويتكەنى، ادامدى ولتىرمەۋگە، اداممەن دوس بولۋعا، سىيلاۋعا شاقىراتىن جالعىز يمان. ال سول ىزدەپ جۇرگەن يماننىڭ وزىنەن «يۆان» جاساپ العان بولساق، حارامنان حالالعا ءوتۋدى پروبلەما كورسەك وندا شەشىم بىرەۋ عانا – اقىرزامان. اقىرزاماننىڭ بولارى حاق! وعان ءشۇبا كەلتىرۋدىڭ قاجەتى دە جوق. سول اقىرزامان بەلگىلى ءبىر ۇلكەن بەلگىلەردەن كەيىن عانا بولادى دەلىنگەن دىندە. بىراق كەيدە جەردىڭ بەتىن تازالاپ الۋعا وسى ءبىر زاماننىڭ اقىرى تەز كەلسە ەكەن دەپ تە تىلەيتىن بولدىق. اڭدىماي جازىپ اۋىرماي ولەتىن شىعارمىز، تىلەپ ءجۇرىپ تىلەۋىمىزدى دە اسىقتىرىپ الارمىز، بىراق اقىرزاماننىڭ ۋاقىتىسىنان بۇرىن قالاپ جۇرمەسەك تە سونى شاقىرۋعا ارەكەت جاساپ جۇرگەنىمىز تاعى وتىرىك ەمەس.

ءبىز جاساپ وتىرعان قوعام ءبىر قوراپ سىرىڭكە دەپ ويلايىقشى. بىرەۋ تەك ولاردىڭ جانىپ كەتپەۋىن قاداعالاپ وتىر. بىراق بۇگىنگى كۇنى بىرەۋدىڭ ءوزى شىرپىنىڭ شەتىن تۇتاتىپ الدى دا ەندى وشىرە الماي الەك بولىپ وتىر. شىرپى جانىپ كەلەدى، جانىپ كەلەدى. ونى توقتاتۋ مۇمكىن ەمەس ارينە. امالى بىرەۋ عانا. قاتار تۇرعان قالىڭ شىرپىعا وت تيگىزبەۋ ءۇشىن ىشىنەن بىرەۋ سۋىرىلىپ شىعىپ، باسىن تومەن ءتۇسىرۋ كەرەك. ياعني، وزگە شىرپىنىڭ ءومىرى ءۇشىن ءوزىن قۇربان ەتۋ ەمەس، قايتا تومەندەۋى جەتكىلىتكى. ال سول تومەندىكتى ۇلكەن قۇرمەت دەپ سانايتىن شىرپى كىم، اقش؟ قىتاي؟ رەسەي؟ ەۋروپا؟ بۇلار پاڭدىقتى سۇيەتىن ەلدەر عوي. ەندەشە ونى ىستەيتىن مۇسىلمان ەلى بولۋ كەرەك. ال مۇسىلماننىڭ باسىن تومەن تۇسىرگەنىن كۇتىپ وتىرعان وسىلار. تاپ بەرۋگە شاق. ەردوعاننىڭ دا «ەسىرىپ» وتىرعانى سول. ايتپەسە، ناتو-دا اسكەري كۇش جاعىنان ەكىنشى ورىندا تۇرعان تۇرىكتىڭ اسكەرلەرى ءوز ەلىنە ءوزى شابۋىل جاسار ما ەدى. ءتىپتى ەندى كەلىپ ەۋروپا ولاردى مويىناۋدان باس تارتقىسى كەلىپ وتىر. (ناتو). بۇل دەگەن تاعى دا ساياسات.

اينالىپ كەلگەندە بىزدەگى جانە وزگە ەلدەگى قازىر بولىپ جاتقان كەرى جاعدايلاردىڭ سيۋجەتى ءبىر. وشاق بىرەۋ. ال وشاقتى ءبارى مۇسىلماندار دەپ كىنالايدى. جوق! كىنالى كىنا ارتۋشىلاردىڭ وزدەرى. تەك ءبىز ولاردىڭ وزدەرى ەكەنىن بەتتەرىنە ايتۋعا، نە دالەلدەۋگە قاۋقارسىزبىز. كۇش بار، بىرلىك جوق.

زاماننىڭ اقىرى قۇدايدىڭ قالاۋىمەن عانا بولادى. اللانىڭ قالاۋىن اسىقتىرمايىق دەسەك، الاۋىزدىقتان اباي بولايىق. كوزبەن كورىپ تۇرىپ كوز جۇمۋ، ءبىلىپ تۇرىپ مىڭق ەتپەۋ، ءوزىڭ ءۇشىن قورقىپ ەلىڭدى ەڭىرەتۋ بارىپ تۇرعان – قورقاۋدىڭ ءىسى. جازانىڭ اۋىرى بولماق!

مارعۇلان اقان

Abai.kz