ۆاشينگتوندا “س5+1” توبىنىڭ كەزدەسۋىندە ورتالىق ازيا ماسەلەلەرى تالقىلانادى
بۇگىن اقش مەملەكەتتىك حاتشىسى دجون كەرري ۆاشينگتوندا تاجىكستان، قازاقستان، قىرعىزستان، تۇركىمەنستان جانە وزبەكستان سىرتقى ىستەر مينيسترلەرىمەن كەزدەسەدى. جۇزدەسۋ تاقىرىبى - ايماقتىق قاۋىپسىزدىك، ەكونوميكالىق بايلانىستار، ەكولوگيالىق ماسەلەلەر جانە كليماتتىڭ وزگەرۋى، سونداي-اق گۋمانيتارلىق ماسەلەلەر.
وسى كەزدەسۋدە “C5+1” فورماتىنىڭ بىلتىر قاراشادا وزبەكستاننىڭ سامارقاند قالاسىندا وتكەن العاشقى كەزدەسۋىندە قارالعان جوبالار تاعى دا پىسىقتالادى. اقش مەملەكەتتىك حاتشىسىنىڭ ورىنباسارى دەنيەل روزەنبليۋمنىڭ ايتۋىنشا، “س5+1” توبىنىڭ ماقساتى - وسى مەملەكەتتەر الدىنداعى قاۋىپ-قاتەرلەرگە قارسى بىرلەسكەن شارا قابىلداۋ.
اقش باسشىلىعى قاۋىپسىزدىك ماسەلەلەسىندە ورتالىق ازيا ەلدەرىمەن ارىپتەستىكتى نىعايتقىسى كەلەتىندىگىن جاسىرمايدى جانە بۇل ەلدەردىڭ ۇكىمەتتەرىنە اۋعانستان شەكاراسىنان تونگەن - تاليبان، يگيل، ەسىرتكى تاسىمالى، تەرروريزم جانە ەكسترەميزم قاۋىپتەرىنە قارسى كۇرەستە كومەك كولەمىن ۇلعايتۋعا ءازىر.
بيىل شىلدەدە اقش كونگرەسىنىڭ سىرتقى بايلانىستار جونىندەگى كوميتەتىنىڭ وتىرىسىندا سويلەگەن دانيەل روزەنبليۋم بيلىكتى وسى ەلدەرگە كومەك كولەمىن ۇلعايتۋعا شاقىردى. ونىڭ ايتۋىنشا، اقش ورتالىق ازيادا ۇلتتىق قاۋىپسىزدىكتىڭ ەكى ماقساتىن كوزدەيدى - كەڭەستىك ەلدەردىڭ مەملەكەتتىلىگىنە قولداۋ كورسەتۋ جانە سىرتقى كۇشتەردىڭ ىقپالدارىنا تۇسپەيتىن مىقتى ەگەمەندى مەملەكەتتەر قالىپتاستىرۋ.
اباي-اقپارات
