سارسەنبى, 17 شىلدە 2019
ەكونوميكا 1472 0 پىكىر 6 قازان, 2016 ساعات 20:13

ەرعوجين نەگە وففلاينعا كەتىپ جاتىر؟

قارجى مينيسترلىگىنە قاراستى مەملەكەتتىك كىرىس كوميتەتىنىڭ توراعاسى داۋلەت ەرعوجين facebook  الەۋمەتتىك جەلىسىندەگى «كولەڭكەلى بيزنەسپەن كۇرەس» اشىق توبىندا «قۇرمەتتى دوستار! ءبىز بارلىق الەۋمەتتىك جەلىدەن وففلاينعا كەتىپ جاتىرمىز. جازباشا سۇراق-جاۋاپ تۇرىندە جۇمىس جاسايمىز. تۇسىنىستىك تانىتقاندارىڭىزعا راحمەت!» دەپ جازدى. بۇل نەنى بىلدىرەدى؟ سوڭعى كەزدەرى كولەڭكەلى بيزنەسپەن كۇرەستى كۇشەيتىپ، سالىق جۇيەسىنە جاڭا تەحنولوگيا ەنگىزىپ، ءاربىر تاۋاردىڭ شەكارادان وتكەننەن تۇتىنۋشى قولىنا جەتكەن دەيىنگى ارالىقتاعى ءجۇرىسىن باقىلاپ، سالىق تولەمىن قاتاڭ قاداعالايتىن جۇيەلەردى جۇرگىزىپ ءارى مەملەكەتتىك كىرىس كوميتەتىنىڭ قۇزىرىنا كىرەتىن جۇمىستاردىڭ دەنىن قوعامعا اشىقتىق جاعدايىندا جۇرگىزىلۋىنە بەلسەنە كىرىسىپ، بارلىق الەۋمەتتىك جەلىلەردە جۇمىس جۇرگىزىپ، ءوزى دە ءتۇرلى جيىندار مەن وتىرىستار وتكىزۋ ارقىلى كوپتەگەن ماسەلەلەردى ءتۇسىندىرىپ، ساراپشىلارمەن بىرلەسىپ، ورتاق تالقىعا سالىپ جۇرگەن ەرعوجيننىڭ ارەكەتى بىرەۋلەرگە ۇناماعان بولۋى كەرەك دەپ توپشىلاۋعا بولادى. بىراق، ەرعوجيننىڭ ءوزى جوعارىداعى سوزىنەن باسقا اشىپ ەشتەڭە ايتپاعان.

پرەزيدەنت ن.نازارباەۆ مەملەكەتتىك ورگانداردىڭ حالىقپەن تىعىز جۇمىس جاساۋىن، اشىقتىققا بەت بۇرۋىن ۇنەمى ايتىپ كەلەدى. پرەزيدەنتتىڭ ايتقانىن ورىنداعانداي جۇمىس ىستەي باستاعان مەملەكەتتىك كىرىس كوميتەتىنىڭ ارەكەتى كىمگە ۇناماي قالعانى تۇسىنىكسىز. قالاي بولعاندا دا، سالىقتان جالتارىپ، ميللياردتاعان قاراجات اينالىمىندا جۇرگەن كولەڭكەلى بيزنەستىڭ قولى ۇزىن كەلەتىنىنە ەشكىم كۇماندانا قويماس. دەگەنمەن، مەملەكەتتىك ورگان – مەملەكەتتىك كىرىس كوميتەتىنىڭ زاماناۋي كوممۋنيكاتسيالىق تەحنولوگيانى پايدالانىپ، حالىقپەن اشىق جۇمىسقا كوشكەنىنە كەدەرگى كەلتىرۋ، بۇل – پرەزيدەنتتىڭ مەملەكەت ورگانداردىڭ اشىقتىعىنا قاتىستى ايتقاندارىنا قارسىلىق ەكەنى ءسوزسىز...

نۇرا ماتاي

Abai.kz

0 پىكىر