وڭتۇستىك قازاقستان وبلىسىنىڭ اۋىل شارۋاشىلىعىنىڭ نەگىزگى كاپيتالىنا تارتىلعان ينۆەستيتسيالاردىڭ كولەمى 9,8 ملرد.تگ قۇرادى دەپ حابارلايدى اباي-اقپارات وقو اگروونەركاسىپتىك كەشەنىنىڭ الەۋمەتتىك-ەكونوميكالىق دامۋى تۋرالى جەلتوقسان ايىنداعى مالىمەتىنە سۇيەنە وتىرىپ.  بۇل بىلتىرعى جىلمەن سالىستىرعاندا، 2,3  ەسە ارتىق.  

بۇگىنگى تاڭدا شەتەلدىك ينۆەستورلاردىڭ قاتىسۋىمەن وقو-دا جالپى قۇنى 2 ملرد. اقش دوللارىنان استام 24 جوبا ىسكە اسقان كورىنەدى. 

وڭتۇستىك قازاقستان وبلىسى اكىمنىڭ ورىنباسارى ساپاربەك تۇياقباەۆتىڭ ايتۋىنشا، وبلىستا اۋىل شارۋاشىلىعىن دامىتۋ بويىنشا 2020 جىلعا دەيىنگى باعدارلاما ىسكە اسىرىلۋدا. ونىڭ نەگىزگى باعىتتارىنىڭ ءبىرى – عىلىم مەن جاڭا تەحنولوگيالاردى اۋىل شارۋاشىلىعىنا ەنگىزۋ، قولدانۋ. وسى سالالاردا يزرايل مەملەكەتىنىڭ تاجىريبەسى وتە جوعارى.

ال يزرايل مەملەكەتىنىڭ مەملەكەتىنىڭ قازاقستانداعى توتەنشە جانە وكىلەتتى ەلشىسى ميحاەل برودسكي
 وڭتۇستىك قازاقستان وبلىسىندا، اسىرەسە، اۋىل شارۋاشىلىعى ەرەكشە قىزىعۋشىلىق تۋدىرىپ وتىرعانىن ايتادى. بۇل قولايلى اۋا رايى مەن قۇنارلى جەرى جانە دامىعان ينفراقۇرىلىمنىڭ ناتيجەسى بولسا كەرەك. وسىنىڭ بارلىعى تۇپتەپ كەلگەندە اۋىل شارۋاشىلىعى سالاسىنداعى ءوزارا ىنتىماقتاستىقتىڭ الەۋەتىن ودان ارى نىعايتۋعا مۇمكىندىك بەرەدى، - دەيدى يزرايل ەلشىسى.

ايتا كەتەلىك، يزرايل جاڭا تەحنولوگيا قولدانۋدا الەمدەگى دامىعان ەلدەردىڭ قاتارىندا. قۇمدى القاپتى جاسىل جەلەككە اينالدىرعان شەتەلدىكتەردىڭ تامشىلاتىپ سۋارۋ ءادىسىن وسى كۇندەرى وڭتۇستىكتىڭ ديقاندارى ەگىس القاپتارىندا كەڭىنەن قولدانۋدا.