سوڭعى كەزدەرى ءدۇر سىلكىنگەندەي بولىپ، قوعامدىق، بۇقارالىق ورتانى كادىمگىدەي ەلەڭدەتىپ وتىرعان «قازاقفيلم» كينوستۋدياسىنىڭ جاڭاشىل جۇمىستارىنا تىلەۋلەس كوڭىلمەن ونداعى  قولعا الىنعان ءاربىر جوباعا، ءاربىر جاڭا تۋىندىعا ساتتىلىك تىلەپ، شىققان كينولاردىڭ ءبىرىن دە قالت جىبەرمەۋگە تىرىسامىن. ايتەۋىر، ءۇمىتىم الدامايدى. ىزدەنىسى مول، تالابى كۇشتى جاستار سەنىم ۇدەسىنەن شىعىپ جاتىر. قازاق كينوسىنىڭ ەرتەڭى بار دەگەن ءسوز عوي، بۇل!..

سوڭعى كەزدەرى ءدۇر سىلكىنگەندەي بولىپ، قوعامدىق، بۇقارالىق ورتانى كادىمگىدەي ەلەڭدەتىپ وتىرعان «قازاقفيلم» كينوستۋدياسىنىڭ جاڭاشىل جۇمىستارىنا تىلەۋلەس كوڭىلمەن ونداعى  قولعا الىنعان ءاربىر جوباعا، ءاربىر جاڭا تۋىندىعا ساتتىلىك تىلەپ، شىققان كينولاردىڭ ءبىرىن دە قالت جىبەرمەۋگە تىرىسامىن. ايتەۋىر، ءۇمىتىم الدامايدى. ىزدەنىسى مول، تالابى كۇشتى جاستار سەنىم ۇدەسىنەن شىعىپ جاتىر. قازاق كينوسىنىڭ ەرتەڭى بار دەگەن ءسوز عوي، بۇل!..

تاعى ءبىر تۋىندىنىڭ تۇساۋكەسەرى ءوتتى. تاعى دا كوڭىل تۇشىندى، تاعى دا ءبىر جاقسى كينونىڭ پروكاتقا جىبەرىلگەنىن تۇيسىندىك. يا، العاشقى اسەردەن تۇيگەن ويىم: «قازاقفيلمنىڭ» جاڭا تۋىندىسى - «قىزعىلت قويان تۋرالى اڭىز» اتتى كوركەم فيلم، شىن مانىندە دە، قازىرگى ءوزىمىزدىڭ ءومىر بولمىسىمىزدان اجىراتىپ العىسىزداي،  سونشالىقتى بىتە قايناسقان، سوندىقتان دا اۋىلدان كەلىپ، بولەك ورتا، باسقا جاعدايلارعا تاپ بولعان كەيىپكەردىڭ ۇزدىكسىز ءجۇرىپ جاتاتىن جان ارپالىسىمەن ءبىر قاتاردا قوعامدىق، الەۋمەتتىك ماسەلەلەر قاتپارىن، تىرلىك ءۇشىن كۇرەستىڭ كولەڭكەلى جاقتارىن ادەمى اشەكەرەلەي بىلگەن ناعىز زاماناۋي كارتينا ەكەن! مەن وتە جاقسى پىكىردەمىن. بۇگىنگى جاستار تۋرالى ەڭ ۇزدىك فيلم دەسەك تە بولادى. تەحنيكالىق جەتىستىكتەردى ۇتىمدى پايدالانۋ ارقىلى اسەرلىلىكتى، قوزعالىس ديناميكاسىن كۇشەيتۋدى ويلاعان قويۋشى رەجيسسەر فارحات ءشارىپوۆ وپەراتور جۇمىسى مەن مونتاجدا «گولليۆۋدتىق» ەركىن تاسىلدەر قولدانىپ، سايىپ كەلگەندە بەلگىلەگەن مەجەدەن تابىلىپتى. فيلم  جالىقتىرماي، ويىڭدى باسقاعا بۇرماي، قىزىقتىرا جەتەلەپ وتىرادى. بۇل جەردە كاسىبي شەبەرلىكتىڭ ماڭىزى زور. تىرناقالدى دۇنيەسىمەن-اق ءوز ءستيلىن، وزىندىك دارا كوزقاراسىن، دۇيەتانىمدىق ۇستانىمىن ايقىن اڭعارتقان فارحاتتىڭ اكتەرلەرمەن دۇرىس جۇمىس جۇرگىزە الاتىنىن دا اڭعاراسىڭ. ويتكەنى، تانىمال اكتەرلەر بولماسا دا فيلمگە تۇسكەندەردىڭ ءبارىنىڭ ويىنىندا جاساندىلىق، جاداعايلىق جوق، وقيعاعا جان بەرۋ، مىنەز قاقتىعىستارىن ايشىقتاۋ بار.

...ويران-توپىر وتىرماق، كوڭىل كوتەرۋ مەيرامىنان  كەيىن پاتشا سارايىنداي كەڭ ءۇيدىڭ ءار تۇسىندا بەي-بەرەكەت جايراپ جاتقان، سىلەلەپ ۇيقىعا باس قويعان جاستاردى كورسەتەتىن ءبىر ەپيزود ارقىلى ونىڭ الدىندا بولىپ وتكەن قىرعىن بي، داراقى كۇلكى، ادەپسىز ارەكەتتەردى عانا ەمەس، «جۇمىسى جوقتىق، تاماعى توقتىق - ازدىرار ادام بالاسىننىڭ» ناق كۋاسىندەي ازعىندىق پەن اقلاقتىڭ اراسىندا اداسقان جاستاردىڭ بۇكىل ءومىر سالتىن  باجايلاپ وتەسىڭ. بىتپەستەي كورىپ، قىزىق قۋعان، جەڭىل جولمەن تابىلار اقشا قۋعان بۇگىنگى زامان جاسىنىڭ قۇردىم قۇلقى قايدا جەتكىزبەك؟! تويىمسىز ءناپسى قالاۋىن تولىق وتەۋ مۇمكىن بە؟! استارى تەرەڭ ويعا باستايتىن وسى ءبىر كورىنىس اسەرىمەن باسى سايران، اياعى ويران ءومىر ءپالساپاسىن تاعى دا ويعا ورالتاسىڭ.

قالا بالاسىن «كوشە تاربيەلەيتىندىگى» تۋرالى قيسىنعا قايىرا كوز جەتكىزە وتىرىپ، جالپى اتا-انا تاربيەسىنەن مۇلدەم دەرلىك تىس قالعان، تيىم-توقتاۋسىز، تاكسىز، ءوز بەتىمەن لاعىپ بارا جاتقان بۇگىنگى ۇرپاقتىڭ بولاشاعىنا الاڭداماي قالا المايسىڭ. «قىزعىلت قويان تۋرالى اڭىز» كوركەم فيلمىندە باستى دەتال - قويان ماسكا-تۇلىبىنىڭ ءوزى الەۋمەتتىك-پسيحولوگيالىق اۋىر استاردى، قوعامداعى تاپتىق كەراعارلىقتاردى مەگزەيدى. كوبىنە سىرتى سۇلۋ دۇنيەنىڭ ءىشى تۇتىندەپ جاتاتىنى بار-اۋ، اتتەڭ!.. قىزعىلت قويان كەيپىندە ىلعي ىرجيىپ كۇلىپ جۇرەتىن، «ءتورت قۇبىلاسى تەڭ» باس كەيىپكەرىمىز تۇلىپتى تاستاعان كەزدەرىندە باستان كەشكەن وقيعالار تىزبەگىنە كۋا بولىپ، كورىپ شىققاننان كەيىن ونىڭ قان جىلاعان ىشكى دراماسىن جالپىعا ءتان جاعدايلارمەن قابىستىرا  ۇعىنىپ، «باس جارىلسا، بورىك ىشىندە، قول شىقسا، جەڭ ىشىندە» دەيتۇعىن كولگىر-تىرلىككە نالەت ايتىپ تا قالاسىڭ!..

ارتىق-اۋىس پالساپاعا ۇرىنىپ، تاقىرىپتان اۋىتقىپ كەتسەم، عافۋ وتىنەمىن، كوكەيدەگى كوپ قيالعا قوزعاۋ سالعان استارلى، اسەرلى، ويلى فيلم وسىلاي ايتقىزباسقا قويمادى. ءوز تۇرعىلاستارى تۋرالى كوركەم شىندىقتى وزگە ەمەس ءوزى ايتۋعا تاۋەكەل ەتكەن جانە ونى وتە ءساتتى بايانداپ شىققان جاس رەجيسسەرگە ريزا كوڭىلمەن الداعى كەزدە دە شىعارماشىلىق تابىستارعا جەتە بەرۋىنە تىلەكتەستىك بىلدىرەمىن.

كەيبىر كىنامشىل كورەرمەندەر باياعى «الاۋلايمەن» قايسىبىر  ساحنالىق كورىنىستەردى دابىرايتا ايىپتاپ، «قوعام ءومىرىنىڭ كولەڭكەلى جاقتارىن كورسەتە بەرگەننەن نە ۇتامىز، ودان دا ونەردىڭ تەك ادەمىلىكتى اسپەتتەۋ ميسسياسىن قۋاتتاساق قايتەدى» دەپ بىتپەس داۋدى تاعى دا قوزداتىپ جاتسا، وعان ايتار مەنىڭ دە قارسى پىكىرىم  بار. ءبىز كوركەمدىك تالعام تۋرالى تالاسساق قۇبا-قۇپ; ال، دەرەكتىلىك پەن كوركەمدىكتىڭ، ءومىر شىندىعى مەن ونەر شىندىعى اراسىندا شاتاسىپ، ۇنەمى اسىرە تاربيەشىل، اۋىر دراماعا بارمايتىن، تەك ءتۇزۋ ءجۇرىپ، ءتۇزۋ تۇراتىن كورىنىستەرگە قۇرالعان كينونى تالاپ ەتۋدەن ەش ۇتپاسىمىز بەلگىلى. سوسىن، جاڭاعى ايتقان «كوركەم شىندىقتى» ءومىردىڭ كۇن تارتىبىندەگى وتكىر ماسەلەلەرىنەن بەتەر قىزبالانا تالقىلاپ، ءتىپتى ساياسات ارالاستىرىپ جىبەرۋدى قويۋ كەرەك، اعايىن! جاستارعا ءتان جاڭاشىل لەپكە، شۇعىل دا باتىل شەشىمدەرگە تۇسىنىستىكپەن قاراۋدىڭ ورنىنا شىدەرلەپ ۇستايمىز دەگەن ۇستانىم مۇلدەم ءجونسىز، جويداسىز.

شاكەن ايمانوۆ اتىنداعى «قازاقفيلم» باسشىلىعى تالانتتى جاس رەجيسسەرلەردىڭ «تۇساۋىن كەسىپ»، داڭعىل جولعا سالىپ جىبەرۋ ءۇردىسىن  بۇدان بۇرىنىراقتا باستاعان ەدى. ول ەندى داستۇرگە اينالىپ بارا جاتىر دەسە دە بولادى. سونىڭ ناتيجەسىندە، مىنە، العاشقى جەڭىستەر، ايتارلىقتاي تابىستار كورىنىس بەرۋدە!..  فارحات ءشارىپوۆتىڭ «قىزعىلت قويان تۋرالى اڭىزى» ءبىز كوپتەن كۇتىپ جۇرگەن فيلم دەسەم، ەش ارتىقتىعى جوق. ال، الدا-جالدا بۇل سوزىمە سەنبەسەڭىز، كينوتەاترعا قاراي بەتتەڭىز!

"اباي-اقپارات"