وڭتۇستىك قازاقستان وبلىسى ارىس اۋدانىنداعى «جاڭا اققالا اگروفيرماسى» جشس كوكونىس پەن جەمىس وڭدەۋدى قايتا قولعا الماق. بۇل كاسىپورىندى 2009 جىلى ەلباسى نۇرسۇلتان نازارباەۆتىڭ ءوزى كەلىپ ىسكە قوسقان ەدى. تومات پاستاسىن شىعارعان زاۋىت ءۇش جىلدان كەيىن-اق توقىراۋعا ۇشىراپ، جۇمىسىن توقتاتقان بولاتىن.

2014 جىلى قازىنادان قارجى قارالىپ، زاۋىت قايتا ءبىر جىل جۇمىسىن جالعاستىرادى. بىراق بىلتىر قايتا شىعىنعا باتىپ، جۇمىسىن باياۋلاتادى. وسىلايشا، ءبىر ىستەپ، ءبىر توقتاعان كاسىپورىننىڭ ناۋرىز ايىندا باسشىلىعى اۋىسىپ، ولار زاۋىتقا قايتا جان بىتىرەمىز دەپ وتىر.

بيىل زاۋىت قىزمەتكەرلەرى 300 گەكتار جەرگە تامشىلاتىپ سۋارۋ ادىسىمەن قىزاناق ەككەن. سونداي-اق، 120 گەكتار جەرگە وتىرعىزىلعان الما باقتان دا مول ءونىم الىپ، الما ەزبەسىن شىعارۋدى جوسپارلاپ وتىر. 

«بيىل ءار گەكتاردان 60 توننا قىزاناق الامىز دەپ وتىرمىز. جالپى بارلىعى 18 مىڭ توننا ءونىم الۋ جوسپاردا بار. تامىز ايىنىڭ سوڭىندا قىزاناق جيناۋ باستالادى. زاۋىت ارنايى يتالياندىق قۇرال-جابدىقتارمەن جابدىقتالعان. تاۋلىگىنە 600 توننا ءونىم وندىرۋگە قاۋقارلى»، - دەيدى اتقارۋشى ديرەكتورى قۋانىش وماروۆ.

بۇل زاۋىتتا 120 ادام تۇراقتى جۇمىسپەن قامتىلعان، ال ماۋسىمدىق جۇمىس كەزىندە 180 ادامعا دەيىن تارتىلادى. ەرالى بەيسەنوۆ ەرتە كوكتەمنەن باستاپ جۇمىسقا كىرىسكەنىن ايتادى.

«زاۋىتتىڭ توقتاپ قالماي جۇمىس ىستەگەنى جاقسى عوي. اۋىلداعى بوس جۇرگەن قانشاما جانعا ەكى قولعا ءبىر كۇرەك تابىلادى. ازىرگە جالاقىمىز تۇراقتى»، - دەيدى ول.

اباي-اقپارات