وڭتۇستىك قازاقستان وبلىسى قازىعۇرت اۋدانىنداعى «دايان» شارۋا قوجالىعىنىڭ جۇسىس ىچتەپ كەلە جاتقانىنا 10 جىلدي ۋاقىت بولدى. «دايان» شارۋا قوجالىعى 2008 جىلى قىزاناق پەن قيار ءوسىرۋ ءۇشىن 8 جىلىجاي سالعان.

العاشىندا شارۋا قوجالىقتىڭ جۇمىستارى جاقسى جۇرەدى. الايدا سوڭعى جىلدارى باسەكەلەستەر كوبەيىپ، كوكونىستەردى وتكىزۋ قيىنعا سوققان. وسىدان كەيىن شارۋا قوجالىقتىڭ جەتەكشىسى ليمون ءوسىرۋدى قولعا الىپتى. 

«بىردە وزبەكستانعا بارىپ، ليموندى قالاي ءوسىرۋ كەرەكتىگىن كوردىك. قايتاردا بىرنەشە كوشەتىن الىپ كەلىپ، ءوزىمىزدىڭ جىلىجايعا وتىرعىزدىق. اراعا ەكى جىل سالىپ، ول جەمىسىن بەرە باستادى. قازىر ورتا ەسەپپەن العاندا ءار اعاشتان 15 مىڭ كيلوگرامداي جەمىس الامىز. ءبىزدىڭ قازىعۇرتتىڭ ليموندارى شىمكەنت پەن الماتىدا جانە رەسەي قالالارىندا وتە جاقسى وتەدى. وعان سۇرانىس تا جىل سايىن ارتىپ كەلەدى.

بۇل تسيترۋستىك جەمىستى ءوسىرۋ ءۇشىن تاڭسىقباەۆتار (وتباسىلىق كاسىپ) ءتۇرلى ليمون وسىرەتىن تالىمباقتاردى ارالاپ، بارلىعىن ساناپ شىققان. «بۇل كاسىپتىڭ كىرىسىن دە، شىعىسىن دا ءبىز جان-جاقتى ويلاندىق. باسقا جەمىستەر سەكىلدى بۇعان دا كوپ كۇتىم كەرەك. بىراق ءبىر كۇنى ءبىر اعاشتان 135 كيلوگرامم ليمون تەرىپ العان ادامداردى ءوز كوزىمىزبەن كورگەندە قىزىعۋشىلىعىمىز ادان سايىن وياندى. ءسويتىپ، وتىز كۇن ويلانىپ، قىرىق كۇن تولعانىپ «مەيەر» دەپ اتالاتىن ليمون سورتىن ءوسىرۋدى قولعا الدىق»، - دەيدى «دايان» ديرەكتورى ءماناتالى تاڭسىقباەۆ.

«دايان» شارۋا قوجالىعى ءوز دەگەندەرىنە جەتتى. ەندى ولار ءوز تاجىريبەسىن وزگەلەرمەن ءبولىسۋدى ءجون كورىپ وتىر. قازىعۇرت اۋدانى كاسىپورىن يەلەرىن قابىلداۋ ورتالىعىنىڭ ديرەكتورى اسقار اۋباكىروۆ: «ليمون ءوسىرۋ – كەرەمەت باستامالاردىڭ ءبىرى. ول كوپ ۇزاماي ءبىزدىڭ اۋدانىمىزدىڭ برەندىنە اينالارى ءسوزسىز» دەيدى. قازىعۇرت اۋدانى گەوگرافيالىق ورنى جاعىنان وتە جاقسى جەردە ورنالاسقان. سوندىقتان جاقىندا بۇل جەرگە تاجىريبە رەتىندە بانان اعاشىنىڭ دا كوشەتتەرىن وتىرعىزىپ كوردى. شارۋا قوجالىعىنىڭ ديرەكتورى الداعى ۋاقىتتاردا ونى بولەك جىلىجايعا وسىرەتىنىن ايتتى. سەبەبى ليمون مەن بانان جەمىستەرىنىڭ تەمپەراتۋرالىق تارتىپتەرى سايكەس كەلمەيدى. بۇيىرسا «دايان» شارۋا قوجالىعى بانان جەمىسىن دە ءوسىرىپ، ساتىلىمعا قويادى. 

اباي-اقپارات