وڭتۇستىك قازاقستان وبلىسى جۇمىسپەن قامتاماسىز ەتۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى ءساتجان پولاتوۆتىڭ ايتۋىنشا «بىلتىر وڭتۇستىك قازاقستاندىق 70 وتباسى وبلىس اكىمدىكتەرىنىڭ ءوزارا كەلىسىمى بويىنشا سولتۇستىك قازاقستان مەن شىعىس قازاقستان وبلىستارىنا تەگىن كوشىرىلگەن. ول ازاماتتار اكىمدىكتەردىڭ دەمەۋىمەن جۇمىسقا تۇرىپ، باسپانالى بولعان».

بيىل دا جىل باسىنان بەرى وڭتۇستىك قازاقستان وبلىسىنىڭ ءبىر توپ شارۋالارى سولتۇستىك قازاقستان وبلىسىنا قونىس اۋدارىن، جەرمەن جۇمىس ىستەۋگە ىنتالى ەكەنىن بىلدىرگەن.

«بيىل «جۇمىسپەن قامتۋ – 2020» مەملەكەتتىك باعدارلاماسىنا جاڭا تارماق ەنگىزىلدى. ۇكىمەت وڭتۇستىك ايماقتاردى – حالقى كوشۋشى، سولتۇستىك ايماقتاردى – كوشتى قارسى الۋشى ايماقتار رەتىندە بەلگىلەپ بەردى»، – دەيدى ءساتجان پولاتوۆ. مامانداردىڭ سوزىنشە، ازاماتتاردى تۇستىكتەن تەرىسكەيگە كوشىرۋدىڭ دەموگرافيالىق سەبەبى دە بار. ءساتجان پولاتوۆ بۇل سوزىنە «وڭتۇستىك قازاقستان وبلىسىندا – 3 ميلليونعا جۋىق، ال سولتۇستىك قازاقستان وبلىسىندا 6 ءجۇز مىڭداي عانا تۇرعىن بار» دەگەن دەرەكتى ءۋاج ەتەدى. «سولتۇستىك قازاقستان وبلىسىنىڭ حالقى كورشى رەسەيگە جانە وبلىس ورتالىعى پەتروپاۆلعا كوشە باستاعان. اۋىلداردا ادام سانى ازايعاننان سوڭ مەكتەپ پەن بالا باقشالار جابىلىپ جاتىر. ول جاقتا جەر كەڭ، يگەرۋگە ادام جەتىسپەيدى. تۇپكى وي – دەموگرافيانى كوتەرۋ، جۇمىسسىزدىقتىڭ الدىن الۋ»، – دەيدى ءساتجان پولاتوۆ.

سولتۇستىك وڭىرگە جۇمىس كۇشى كوپ ايماقتاردان ازاماتتاردى كوشىرۋ ماسەلەسى بۇل وڭىردە «دەموگرافيالىق احۋال ناشارلاپ، حالىق سانىنىڭ ازايۋىنان تۋعانىن» سولتۇستىك قازاقستان وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باس مامانى الما ماحمەتوۆا دا راستايدى. «بىلتىر كوشىپ كەلگەن تۇرعىنداردىڭ 27-ءسى جۇمىسقا جارامدى، قازىر 21-ءى جۇمىسقا ورنالاستىرىلدى. بارلىق وتباسى باسپانامەن قامتاماسىز ەتىلدى. ولاردىڭ ىشىندە اۋىلشارۋاشىلىعى سالاسىنداعى جۇمىسشىلارعا قوسا، مۇعالىمدەر مەن دارىگەرلەر دە بار، – دەيدى باس مامان.

Abai.kz