قر ورتالىق كوممۋنيكاتسيالار قىزمەتى   وڭىرلىك بولىمشەسىندە بولعان ءباسپاسوز ءماسليحاتىندا  الماتى قالالىق  تۋريزم جانە سىرتقى بايلانىستار باسقارماسىنىڭ باسشىسى تيمۋر دۇيسەنعاليەۆ ەلىمىزدەگى بەس ينستيتۋتسيونالدىق رەفورمانى جۇزەگە اسىرۋ جونىندەگى «100 ناقتى قادام» ۇلت جوسپارى، «نۇرلى جول» مەملەكەتتىك باعدار­لا­ماسى مەن ەل تاۋەلسىزدىگىنىڭ 25 جىلدىعى  اياسىندا اتقارىلىپ جاتقان جۇمىستاردى بايانداپ، جۋرناليستەردىڭ  ساۋالدارىنا جاۋاپ بەردى.

باسقارما باسشىسى تيمۋر دۇيسەنعا­ليەۆ شاھارىمىزداعى ءتۋريزمنىڭ دامۋىن­داعى نەگىزگى كورسەتكىشتەرگە توقتالىپ، بۇل سالانىڭ  ەل ەكونوميكاسىنىڭ باسىم سەكتو­رى ەكەنىن ەرەكشە ەسكەرتتى. تۋريزم شاھارىمىزدىڭ  دامۋىنا داڭعىل جول اشاتىنىن ايتقان باسقارما باسشىسى الماتىنى تانىمال، باسەكەگە قابىلەتتى، تۋريستىك تارتىمدى قالاعا اينالدىرۋ قاجەتتىگىنە ايرىقشا توقتالدى. وسىناۋ ستراتەگيالىق باعىتقا سۇيەنگەن تۋريزم جانە سىرتقى بايلانىستار باسقارماسىنىڭ قىزمەتى قالامىزدىڭ باسەكەگە قابىلەتىن تۋريزم تۇرعىسىندا، تۋريستىك يندۋستريانى قالىپتاستىرۋ باعىتىندا  باعىن سىناماق.

ءبىزدىڭ قالا – سىرتتان كەلۋشى شەتەلدىك تۋريستەردىڭ سانى بويىنشا ءابسوليۋتتى كوشباسشى. ءاربىر شەتەلدىك ەكىنشى ءتۋريستىڭ الماتىعا كەلەتىنى  ءمالىم بولدى. تۋريستىك كىرىستەردىڭ شيرەگىن، ياكي، 25,4 پايىزىن   قالامىز قالىپتاستىرىپ وتىر. ەلىمىز بويىنشا تۋريزمنەن تۇسكەن 73,1 ملرد. تەڭگەنىڭ 18,6 ملر. تەڭگەسى – الماتىنىڭ قوسقان سۇبەلى ۇلەسى.

قالامىزدىڭ جايعاستىرۋ ورىندارى قازاقستانعا كەلۋشىلەردىڭ جالپى سانىنىڭ 20 پايىزىن قامتيدى. جايعاستىرۋ ورىندارى كورسەتكەن قىزمەتتىڭ 15,2 پايىزى –  رەزيدەنتتەر (ىشكى تۋريستەر),  43,2 پايىزى –   رەزيدەنت ەمەستەر (سىرتتان كەلۋشى تۋريستەر), 24,7 پايىزى – كورسەتىلەتىن قىزمەتتىڭ  كولەمىنە تيەسىلى.

بۇگىندە 19 مەملەكەتتىڭ ازاماتتارى رەسپۋبليكامىزعا  ۆيزا رەسىمدەمەي-اق كەلە الادى. دەسەك تە، شەتەلدىكتەر ارنايى قۇجات­سىز  ەل اۋماعىندا 15 كۇننەن ارتىق بولا المايدى. ءارى ولاردىڭ ەڭبەك جانە   ميسسيونەرلىك قىزمەتپەن اينالىسۋىنا قۇقىعى بولمايدى. قر ۇكىمەتىنىڭ 2015 جىلعى 26 ماۋسىمداعى № 483 قاۋلىسىنا ساي، اۆستراليا، ۆەنگريا، يتاليا، موناكو، بەلگيا، يسپانيا، نيدەرلاندى، نورۆەگيا، شۆەتسيا، مالايزيا، بىرىككەن اراب امىرلىكتەرى، سينگاپۋر، ۇلىبريتانيا، اقش، گەرمانيا، فينليانديا، فرانتسيا، شۆەيتساريا مەن جاپونيا ازاماتتارى بىلتىرعى 16 شىلدەدەن باستاپ 2017 جىلدىڭ 31 جەلتوقسانىنا دەيىن قازاقستان رەسپۋب­ليكاسىنىڭ شەكاراسىن كەسىپ وتكەن ساتتەن باستاپ 15 كۇنتىزبەلىك كۇنگە دەيىنگى مەر­زىمدە ۆيزالىق تالاپتان بوساتىلادى. سونداي-اق قحر، يران، ءۇندىستان، تايلاند جانە ۆەتنام سەكىلدى ەلدەرمەن دە ۆيزالىق ءتارتىپتى جەڭىلدەتۋ جونىندە جۇمىس جۇرگىزىلۋدە.

قالامىزدا ەلىمىزدىڭ تۋريستىك كومپا­نيا­لارىنىڭ باسىم بولىگى شوعىرلانعان. الماتى نارىعىندا 569 تۋريستىك فيرما بار. سونىڭ 239-ى – تۋروپەراتور، 330-ى – تۋراگەنت. وسىلاردىڭ 90 پايىزدان استامى سىرتتان كەلۋشىلەر ءتۋريزمى سالاسىندا قىزمەت كورسەتەدى. اتاپ ايتارلىعى، سىرتتان كەلۋشىلەر جانە ىشكى تۋريزم سالاسىندا جۇمىس ىستەيتىن تۋروپەراتورلاردىڭ ءىرى ۇسى­نىستار پاكەتى بار.  بۇعان قالادا سەرۋەندەۋ، تابيعي رەكرەاتسيا  مەن ساياباقتارعا بارۋ جاتادى. سونداي-اق،  بەلسەندى دەمالىس پەن باسقا دا كوپتەگەن باعدارلامالار وسى ۇسىنىستار پاكەتىنە كىرەدى.

البەتتە، جايعاستىرۋ ورىندارى تۋريستىك ءونىمنىڭ ماڭىزدى قۇرامداس بولىگى سانالادى.  شاھارىمىزدا جايعاستىرۋ جەلىلەرى جاقسى  دامىعان. ستاتيستيكا دەپارتامەنتىنىڭ دەرەگىنە سۇيەنسەك، بۇگىندە  قالامىزدا 173 قوناق ءۇي بار، ولاردىڭ نومىرلىك قورى 7629 ءنومىردى قۇرايدى. بۇل كورسەتكىش – بۇرناعى جىلعىمەن سالىستىرعاندا، قوناق ۇيلەر سانىنىڭ 12 پايىزعا ارتقانىنىڭ ايعاعى. جايعاستىرۋ ورنى كورسەتەتىن قىزمەتتەر كولەمى (مەيرامحانالار قىزمەتىن قوسپا­عاندا) وتكەن جىلعى وسى كەزەڭمەن سالىس­تىرعاندا، 4,6 پايىزعا ارتقان. قوناق ۇيلەر­دەن وزگە،  حوستەلدەر دە تانىمال­دىلىققا يە.

شەت ەلدە دەمالىس ءۇشىن بارىنشا تانى­مال باعىتتار – تۇركيا، بولگاريا، قىتاي، تايلاند، مالايزيا، گرۋزيا، گرەكيا، مى­سىر، يسپانيا، يزرايل، ءۇندىستان، وڭتۇس­تىك كورەيا، قىرعىزستان (جازعى ماۋسىمدا ىستىقكول كولى), بالي ارالدارى، ءباا، رەسەي، ساۋد ارابياسى، سينگاپۋر، فران­تسيا، چەحيا، امەريكا، شۆەتسيا، شري-لانكا، شۆەيتساريا، جاپونيا. الماتى كومپانيالارىنىڭ سەرىكتەس جەلىلەرى جەر-جاھاندى قامتيتىنىن،   قالامىزدىڭ تۋريستىك ۇيىمدارى سۇرانىس بويىنشا تورتكۇل دۇنيەگە كەز-كەلگەن كۇردەلى  تۋردى ۇيىمداستىرۋعا قابىلەتتى.

شەتەلدىك جانە جەرگىلىكتى تۋريستەر اراسىندا تانىمال نەگىزگى باعىتتار: «شىم­بۇلاق» تاۋ شاڭعى كۋرورتى، ۇلكەن الماتى كولى، شارىن شاتقالى، كولساي كولى، «التىن ەمەل» ۇلتتىق پاركى (انشىقۇم، اقتاۋ تاۋلارى، بەسشاتىر قورعاندارى), «تاڭبالى تاس» پەتروگليفتەرى، تۇرگەن شاتقالى، ەسىك كولى، قايىڭدى كول. ىشكى تۋريزم بولىگىندە ەڭ تانىمال باعىت – شا­رىن شاتقالى (ماۋسىم –  تامىز ايلا­رىندا), كولساي كولى (ماۋسىم – تامىز ايلا­رىندا), تۇرگەن شاتقالى (ناۋرىز – قازان ايلارىندا), قاپشاعاي سۋ قويماسى (ماۋسىم – تامىز ايلارىندا). قىسقى ۋاقىتتا «شىمبۇلاق» تاۋ شاڭعى كۋرورتى مەن شونجى ىستىق باستاۋى ەداۋىر ۇلەسكە يە. كورسەتىلگەن تۋرلار ماۋسىمدىق سيپاتقا يە. ادەتتە، تۋروپەراتورلار،  تۋريستەردىڭ جەكەلەگەن تالاپتارىن ەسكەرىپ، تۋريستەردى بارىنشا تاڭقالدىرۋعا تىرىساتىنى ءوز الدىنا.

abai.kz