ءبىلىم بەرۋ بۇل جاستاردىڭ دۇنيەتانىمىن قالىپتاستىرۋداعى ماڭىزدى كەزەڭ. قازاقستاننىڭ ءبىلىم بەرۋ جۇيەسى ءدىن مەن ءدىني بىرلەستىكتەردەن بولىنگەن جانە زايىرلى سيپاتتا. بۇل جالپى ورتا ءبىلىم بەرۋ مەكەمەلەرىندە كوللەدج جانە جوعارى وقۋ ورىندارىندا ەشبىر ءدىندى تۋرا نەمەسە جاناما تۇردە ناسيحاتتاۋعا جول بەرىلمەيدى دەگەندى بىلدىرەدى.

بۇگىندە مەملەكەت ءبىلىم الۋ جۇيەسىنە ەرەكشە ءمان بەرۋدە. وزگە مەملەكەتتەر سياقتى قازاقستان دا ءبىلىم بەرۋ جۇيەسى ارقىلى بولاشاقتىڭ جارقىن، ءساتتى ءارى تۇتاس بولاتىنىنا سەنەدى. بۇل ءۇشىن مەكتەپ وقۋشىلارى، ءبىلىم بەرۋ مەكەمەسىنىڭ ستۋدەنتتەرى ونىڭ ىشىندە مەملەكەتتىڭ باقىلاۋى مەن قامقورلىعىنداعىلار ءدىني شەڭبەرلەردەن، تىيىمدار مەن شەكتەۋلەردەن ەركىن بولۋ كەرەك. ولار ءبىلىم الۋ اياسىن كەڭەيتۋ ءۇشىن وزگە مادەنيەت جانە ءدىن وكىلدەرىمەن قارىم-قاتىناسى بارىنشا جاقىن بولعانى دۇرىس. ءدىن وقۋشىنىڭ ساناسى جەتپەيتىن دۇنيەتانىمدىق، يدەولوگيالىق، ۇيىمداستىرۋشىلىق رەسۋرتارعا يە.

تاريحي تاجىريبە كورسەتكەندەي، زايىرلىلىق پەداگوگيكالىق جانە پسيحولوگيالىق كوزقاراس تۇرعىسىنان دا قازىرگى وسكەلەڭ ۇرپاقتىڭ گۋمانيتارلىق ءبىلىم بەرۋ تالاپتارىنا تولىق سايكەس كەلەدى.

سونىمەن قاتار، بالانىڭ بولاشاعى كوپتەگەن فاكتورلارمەن بايلانىستى، بىراق ونىڭ ىشىندە ەڭ باستىسى ءبىلىم الۋ ەكەنىن اتا-انالار ەسكەرۋى كەرەك. سوندىقتان قازىرگى ءبىلىم بەرۋ جۇيەسىندە ادامداردىڭ ءدىني قاتىستىلىعى مەن دىنگە قاتىناسى بالانىڭ دامۋىنا جانە ءبىلىم الۋىنا، قوعامنان وقشاۋلانۋىنا كەدەرگى بولماۋى كەرەك.

ەلىمىزدىڭ زايىرلىلىق ۇستانىمى ازاماتتاردىڭ دىنگە نەمەسە مادەني-الەۋمەتتىك الۋانتۇرلىلىگىنە قاراماستان ولاردىڭ بارلىعىنا بىردەي قارايتىنىن ەسكەرگەن ءجون. سوندىقتان، قۇزىرلى مەملەكەتتىك ورگاندار ەلىمىزدىڭ زاڭنامالارىنا زايىرلى ءبىلىم بەرۋ  مەكەمەلەرىندە ءدىندى ناسيحاتتاۋعا جول بەرمەيتىن تالاپتى ەنگىزۋدى قاراستىرعانى ءجون دەپ ەسەپتەيمىن.  

قابىلوۆا اينا ساعاتبەكقىزى، ل.ن.گۋميلەۆ ات.ەۇۋ ء«دىنتانۋ» كافەدراسىنىڭ پروفەسسورى

Abai.kz