شەرۋگە شىققاندار رەسەي استاناسىنداعى پۋشكين الاڭىنا جينالىپ، ودان سوڭ ساحاروۆ داڭعىلى بويىمەن ءجۇرىپ ءوتتى. "بەلىي سچەتچيك" ۇيىمىنىڭ سوڭعى مالىمەتى بويىنشا، اكتسياعا 15 مىڭعا جۋىق ادام قاتىسقان.

مارش باستالار بۇرىن پارناس پارتياسىنىڭ توراعاسى ميحايل كاسيانوۆتىڭ ۇستىنە بىلگىسىز بىرەۋ جاسىل ءدارى قۇيىپ كەتكەن. "سوليدارنوست" قوزعالىسىنىڭ ديرەكتورى كونستانتين ەرشوۆ ۇستالدى. مارشتى ۇيىمداستىرۋشىلار شەرۋ باستالار قارساڭىندا بىرنەشە پالاتكانى، ۋكراينالىق جالاۋدى تارتىپ العانىن مالىمدەدى.

ەسكە الۋ اكتسياسىنىڭ ۇيىمداستىرۋ كوميتەتىنە "سوليدارنوست", "پارناس", پروگرەسس پارتياسى، "يابلوكو", "وتكرىتايا روسسيا", "پارتيا 5 دەكابريا", ليبەرتارياندىق پارتيا، "ۆىبور روسسي" جانە باسقا دا دەموكراتيالىق كۇشتەر ەندى.

وپپوزيتسيالىق ساياساتكەر بوريس نەمتسوۆتى 2015 جىلى 27 اقپاندا ماسكەۋ ورتالىعىنداعى ۇلكەن موسكۆورەتسك كوپىرىندە اتىپ كەتتى. تەرگەۋ مالىمەتى بويىنشا، قىلمىسقا تاپسىرىس بەرگەن "سەۆەر" باتالونىنىڭ بۇرىنعى وفيتسەرى رۋسلان مۋحۋدينوۆ. وعان سىرتتاي ايىپ تاعىلدى، ول 2015 جىلدىڭ قاراشاسىنان بەرى حالىقارالىق ىزدەۋدە ءجۇر.

اباي-اقپارات