كۇنى كەشە عانا ورتالىق كوممۋنيكاتسيالار قىزمەتىندە بريفينگ وتكىزگەن قر ەنەرگەتيكا ۆيتسە-ءمينيسترى باقىتجان جاقساليەۆ مىرزا اەس توڭىرەگىندە اڭگىمە وربىتكەن-ءتىن. ۆيتسە-مينيستر مىرزانىڭ سوزدەرى باق-تا جاريالاندى، قىزۋ تالقىلاندى. وسىعان بايلانىستى «Abai.kz» اقپاراتتىق پورتالى «اتومنان باس تارتقان ەلگە، اەس نەگە كەرەك؟» اتتى ماقالا جاريالادى. 

سايتىمىزدا جارىق كورگەن ماقالاعا قاتىستى قر ەنەرگەتيكا ءمينيسترىنىڭ كەڭەسشىسى اسقار جالدينوۆ مىرزا ارنايى «Abai.kz» پورتالىنا سۇحبات بەرىپ، ماسەلەنىڭ جاي-جاپسارىن ءتۇسىندىرىپ بەردى.

-اسەكە، ۆيتسە-مينيستر باقىتجان جاسقاليەۆ مىرزانىڭ اەس تۋرالى پىكىرىن قورىتىپ كورەيىكشى، ول كىسى «اەس كەرەك» دەدى. ءتىپتى كەيبىر اقپارات كوزدەرى ستانتسيانىڭ قۇرىلىسى باستالىپ كەتكەن دەگەن پىكىرلەر ايتۋدا. ءبىز الەم الدىندا اتومنان باس تارتتىق. اتومنان باس تارتقان ەلگە اەس نەگە كەرەك؟

-مەن سىزبەن كەلىسپەيمىن. ول كىسى اەس سالامىز دەگەن جوق. قءازىر وعان بىزدە سەبەپ تە جوق.

-سوندا قالاي؟ ءبىز بۇنى اسپاننان المادىق، جاقساليەۆ مىرزانىڭ ءسوزى. بۇقارالىق اقپارات قۇرالدارى ۆيتسە-ءمينيستردىڭ سوزدەرىن بۇرمالاعان با؟

-تۇسىنبەگەن بولار. باقىتجان جاقساليەۆ مىرزا اەس سالىنبايتىنىن ايتتى. ول كىسى قازىر اەس سالۋعا ەش قاجەتتىلىك جوق ەكەنىن ايتقان ەدى. راس، ءبىز قازىر ەلەكتر قۋاتىن مولشەردەن ارتىق ءوندىرىپ وتىرمىز. ءتىپتى، الىنعان ءونىمنىڭ 30 پايىزى تولىق كۇشىنە پايدالانىلىپ جاتقان جوق. اەس – ەلەكتر قۋاتى جەتىسپەي، جۇرت تاپشىلىق كورىپ وتىرعان جاعدايدا ايتىلسا ءبىر ءسارى. ال قازىر ونداي تاپشىلىق جوق. سوندىقتان، اەس سالۋ يا بولماسا سالماۋ ماسەلەسى ءسوز بولىپ وتىرعان جوق. ونىڭ ۇستىنە مينيستر قانات بوزىمباەۆ مىرزانىڭ ءوزى وتكەن جولى اەس سالىنبايتىنىن ۇكىمەت وتىرىسىندا اشىق ايتتى.

-سوندا ءسوز بولىپ وتىرعان نەنىڭ قۇرىلىسى؟

-مىنە، وسى جەردە شاتاسۋشىلىق بولۋى ابدەن مۇمكىن. ويتكەنى ۆيتسە-مينيستر مىرزا بالقاشتاعى ەلەكتر ستانتسياسىنىڭ قۇرىلىسى تۋرالى ءسوز ەتكەن. ال ونى كەيبىر باق وكىلدەرى اەس پەن شاتاستىرىپ السا كەرەك.

-بالقاش ەلەكتر ستانتسياسىنىڭ قۇرىلىسى توقتاپ تۇر عوي... شەتەلدەن شاقىرتقان ينۆەستورلار ات تونىن الا قاشقانى دا وتىرىك ەمەس...

-ءيا، ءدال قازىر ونىڭ قۇرىلىسى توقتاپ تۇر. سەبەبى، ينۆەستيتسيا سالىپ وتىرعان وڭتۇستىك كورەيانىڭ «ساۋسۋنگ» كومپانياسىمەن اراداعى كەلىسسوزدەر جۇرگىزىلۋدە. بۇل جەردە جالعىز «ساۋسۋنگ» كومپانياسى عانا ەمەس، قازاقستاندىق كومپانيالار دا ينۆەستورلىق ەتۋدە. كەلىسسوزدەر اياقتالعان سوڭ، قۇرىلىس جۇمىستارى قاشان جالعاساتىنى بەلگىلى بولادى.

-ءسىز وسى سالانىڭ مامانى رەتىندە ايتىڭىزشى، اەس تيىمدە مە، الدە گەس پە؟ سەبەبى، اتوم ەلەكتر ستانتسيالارىنا قاتىستى پىكىرلەر الۋان ءتۇرلى. ءبىرى دۇرىس دەيدى، ءبىرى كەرىسىنشە.

-نۇرەكە، بۇل جەردە مىنانى ءتۇسىنۋ كەرەك، اەس-ءتىڭ دە ءوز ارتىقشىلىعى بار. بىراق ءدال قازىر بىزگە اەس-ءتىڭ قاجەتتىلىگى شامالى. سەبەبى، بىزدە ەلەكتر قۋاتى بەلگىلەگەن مولشەردەن ارتىق وندىرىلگەن. ءالى ءبىراز جىل ءبىز اەس تۋرالى ايتپاساق تا بولادى (كۇلدى).

-ايتپاقشى، قر ەنەرگەتيكا ءمينيسترى قانات بوزىمباەۆ مىرزا بيىل ۋران ءوندىرىسى كولەمىن ازايتاتىنىن ايتتى. بۇل نەمەن بايلانىستى؟

-راس، ءبىز قازىر ۋران ءوندىرىسى جونىنىنەن الەمدە ءبىرىنشىمىز. وكىنىشكە وراي قازىر نارىقتاعى ۋران باعاسى ايتارلىقتاي قۇلدىرادى. سوندىقتان، ءبىز دە ءونىم كولەمىن ازايتۋ تۋرالى شەشىمگە كەلدىك. سەبەبى، نارىقتا سۇرانىس از.

-جاڭا ءبىر سوزىڭىزدە «قازىر قاجەتتىلىك جوق» دەپ قالدىڭىز. ايتىڭىزشى، سول قاجەتتىلىك قاشان تۋ مۇمكىن؟ اەس تۋرالى ءسوز تۇبىندە قايتا كوتەرىلەدى عوي...

-ءبىز قازىرگى قارقىنىمىزبەن ءالى ءبىراز جىل بۇل تاقىرىپقا جولامايتىن شىعارمىز. كەمىندە 2025 جىل.  

-جاقسى اسەكە، ۋاقىت ءبولىپ سۇحبات بەرگەنىڭىزگە راقمەت!

-سىزدەردىڭ دە جۇمىستارىڭىزعا ساتتىلىك تىلەيمىن!

نۇرگەلدى ابدىعانيۇلى

Abai.kz