قالامى قارىمدى بەلگىلى جۋرناليست ەرىك راحىم oinet.kz اقپاراتتىق-ساراپتامالىق سايتىنا باس رەداكتور بولىپ تاعايىندالدى. ارىپتەسىمىزدى قۇتتىقتاي وتىرىپ، از-كەم اڭگىمەگە تارتقان ەدىك.

- ەرىك، oinet.kz اقپاراتتىق-ساراپتامالىق سايتىنا باس رەداكتور بولىپ بارىپ جاتىر ەكەنسىڭ. قۇتتى بولسىن! اۋەلى وسى oinet.kz اقپاراتتىق-ساراپتامالىق سايتى جايلى ايتىپ وتسەڭ. قاشان قۇرىلعان، مازمۇنى قانداي؟

- راحمەت، ءومىرجان! Oinet.kz سايتى اقپاراتتىق اگەنتتىك رەتىندەگى كۋالىكتى 2014 جىلى العان. تىركەلگەن جەرى – الماتى قالاسى. اقپاراتتىق-ساراپتامالىق دەپ اتاۋى ايتىپ تۇرعانداي، نەگىزىنەن وسى ەكى باعىتتا جۇمىس ىستەيدى. قازاق جانە ورىس تىلدەرىندە شىعادى. قۇرىلتايشىلارى دا ء«وز اۋىلىمىزدا» جۇرگەن ۇلتجاندى ازاماتتار. جۋرناليستيكانىڭ نە ەكەنىن مەنەن ارتىق بىلمەسە، كەم بىلمەيدى.

تىركەلگەنىنە ەكى جىلدان ەندى اسسا دا، سايتىمىزدىڭ ءتاپ-ءتاۋىر تانىمالدىعى بار. بىرقاتار بەلگىلى پورتالدار Oinet.kz-دە جاريالانعان ماتەريالداردى كوشىرىپ باسادى. ونى ءوز مىسالىمنان بىلەمىن. باس رەداكتور بولىپ كەلمەي تۇرعاندا-اق وينەتكە ماقالالارىم جاريالانىپ تۇراتىن. كەيبىر جۋرناليستەر جەكە وزىمە حابارلاسىپ، سايتتا جاريالانعان ماقالامدى ءوز سايتتارىنا كوشىرىپ باسۋدى سۇرايتىن. ەندىگى مەنىڭ موينىما ارتىلعان مىندەت – سول تانىمالدىقتى ودان ءارى ارتتىرۋ.

- ءوزىڭدى قالىڭ وقىرمان «جاس الاش» گازەتى ارقىلى بىلەدى. ينتەرنەت جۋرناليستيكانىڭ ارتىقشىلىعى، كەمشىلىگى نەدە؟

- ينتەرنەت جۋرناليستيكانىڭ ارتىقشىلىعى ونىڭ وپەراتيۆتىلىگىندە. گازەت بىلاي تۇرسىن، ينتەرنەت جۋرناليستيكا قازىر تەلەارنانىڭ دا الدىن وراپ كەتتى.

كوپشىلىك سايتتار «اقپاراتتىق-ساراپتامالىق» دەپ اتالعانىمەن، قۇرعاق اقپاراتتى جارىسا تاراتۋدان ارىگە اسا الماي ءجۇر. ساراپتاما جوقتىڭ قاسى. ازىرگە مەن كورگەن كەمشىلىك وسى.

 - باس رەداكتور رەتىندە oinet.kz-كە قانداي وزگەرىستەر جاساۋ ويدا بار؟ جوسپارىڭ قانداي؟

- بازارعا كەلگەن ادام ەڭ الدىمەن ادەمى نارسەگە كوز توقتاتىپ قارايدى. ودان كەيىن ساپاسىن تەكسەرەدى. ۇناتسا، ساتىپ الادى. ۇناماسا، باسقاسىن ىزدەيدى. بۇقارالىق اقپارات قۇرالى دا – تاۋار. سوندىقتان، ەڭ الدىمەن سايتتىڭ ءتۇر-كەلبەتىنە، ودان كەيىن جاريالاناتىن ماتەريالداردىڭ مازمۇنىنا باسا كوڭىل بولەمىز.   

- وسى قازاق سايتتارىنىڭ ءجيى سىنعا ۇشىراپ، مازمۇن جاعىنان اقساپ جاتۋىنىڭ سەبەبى نەدە دەپ ويلايسىڭ؟

- كور-جەردىڭ ءبارىن جازا بەرمەي، جاريالاناتىن دۇنيەلەرگە تالعاممەن قاراسا جەتكىلىكتى.

-  oinet.kz وزگە اقپاراتتىق سايتتاردان نەسىمەن ەرەكشەلەنەدى؟ سايتتىڭ ءوز جولىن تابۋدا قانداي قادامدار جاسالادى؟

- ساراپتاما مەن جۋرناليستىك زەرتتەۋگە كوبىرەك كوڭىل بولسەك دەيمىز. بەلگىلى ساراپشىلار مەن جۋرناليستەردى اۆتور رەتىندە تارتۋ ويدا بار.

- ۋاقىت تاۋىپ، اڭگىمەلەسكەنىڭە راحمەت!

ءومىرجان ابدىحالىقۇلى

Abai.kz