دۇيسەنبى, 16 جەلتوقسان 2019
قوعام 3638 0 پىكىر 30 قاڭتار, 2017 ساعات 11:57

قازاقتى قىرعان تاران بەيىمبەتتەن اۋليە مە؟

تاۋەلسىزدىكتىڭ 25 جىلدىعى تۇسىندا قوستاناي قالاسىنىڭ قاق ورتاسىنداعى تاران كوشەسىنىڭ اتاۋى تاۋەلسىزدىك بولىپ وزگەرتىلەتىنىن ەستىپ، بوركىمىزدى اسپانعا اتتىق. ءبىر-بىرىمىزدەن ءسۇيىنشى سۇرادىق. ولاي ەتپەي شە؟

ورمانىنان ورىسى كوپ توبىل ولكەسىندە ەلدى مەكەن تۇگەل، كوشە اتاۋىن قازاقشالاۋ – كۇرەستىڭ كۇرەسى، قيامەتتىڭ قيامەتى. بۇگىندە كوميسسيانىڭ ءتيىستى شەشىمى ماقۇلداۋدان ءوتىپ جاتىر. بارەكەلدى دەلىك! بىراق، كوپ ۇزاماي لاۆرەنتيدىڭ اتاۋى قوستانايداعى باسقا كوشەگە اۋىسادى دەگەن «سۋىق» حابار جەتتى. سۋىق دەيتىن ءجونىم بار. لاۆرەنتي تاران – كەشەگى الاشتىڭ كوسەمدەرى، ۇلتىمىزدىڭ ماقتانىشى، تاۋەلسىزدىك ءۇشىن جاندارىن پيدا ەتكەن ءا. بوكەيحانۇلى، م. دۋلاتۇلى، ا. بايتۇرسىنۇلى سىندى ساڭلاقتارىمىزعا قارسى كۇرەستى ۇيىمداستىرعان قىزىل يمپەريانىڭ قولشوقپارى. ۇزەڭگىلەستەرىمەن بىرگە قوستاناي ۋەزىنىڭ وزەن-كولى بار شۇرايلى جەرلەرىنە بەكىنىس سالىپ، قارۋسىز جاتقان قازاقتى قانعا بوياعان كەلىمسەكتەر. كوپتى كورگەن كونەكوز قاريالاردىڭ ەستەلىگىندە «اق كولچاك كەلدى، مالىمىزدى الدى، قىزىل تاران كەلدى، جانىمىزدى الدى» دەپ زار يەلۋى كوپتى اڭعارتسا كەرەك.

ايتسە دە بۇگىن، سول تاراندى كوككە كوتەرىپ، ءتىپتى وعان بەيىمبەت مايلين تۋىپ-وسكەن اۋدانىنا اتاۋىن بەردىك. ال مايلين اتىنداعى كوشەنى قوستاناي مەن رۋدنىيدىڭ ادام كورسە ۇيالاتىنداي ەسكى اۋداندارىنان تابا الاسىز. وسى تۇستا توبىلدىڭ اتقا مىنەرلەرى جالتاقتىقتى قويىپ، باتىل شەشىمدەر قابىلداسا دەيمىن. بەيىمبەت كىم، تاران كىم ەكەنىن ەنتسيكلوپەديالار مەن گۋگلدان وقىپ بىلەر كەز جەتتى. ايتىلماعان ءسوز جەتىم. كوپتەن بەرى كوكەيدە جۇرگەن شەرىمدى قىسقاشا تارقاتاتىن كەز جەتىپتى. ەندى تاقىرىپقا تۇزدىق بەرەر جەرلەستەرىمنىڭ بۇعان نە دەيتىنىن كورگىم كەلەدى.

قۋانىش ەسقابىل

Abai.kz

0 پىكىر