جەكسەنبى, 15 جەلتوقسان 2019
46 - ءسوز 2305 1 پىكىر 27 قاڭتار, 2017 ساعات 12:49

فەيسبۋك ىستەمەي قالعان كۇن

تۇستەنىپ الايىن دەپ ۇيگە كەلسەم، كىرەبەرىستە بىرىنەن ءبىرى وتكەن ءبىر توپ سۇلۋ قىز تۇر. ءبارى جاپاتارماعاي امانداستى. قىستىڭ سۋىعىنا قاراماي، كەيبىرەۋى جازدىڭ كيىمىمەن ءجۇر. انا ءبىر قىزدىڭ تىزەسى تۇگىلى سانى جارقىراپ كورىنەدى. ابىرجىپ قالدىم. ايتەۋىر، ءتىلىم امانداسۋعا ارەڭ كەلدى. 

- اعا، مەنىڭ دەنە ءمۇسىنىم سىزگە ۇناي ما؟ جاڭا عانا فيتنەستە بولدىم.

- پيتنەس دەگەنىڭ نە؟

- ترەناجەر عوي.

- ءسوي دەمەيسىڭ بە قازاقشا.

- سونىمەن سىزگە ۇناي ما، ۇناماي ما؟ مىنە، سۋرەتىمدى دە الا كەلدىم.

- ەندى بىلاي... جاقسى ەكەن. ترەناجاردە بولعانىڭ كورىنىپ تۇر. جاراعان اتتاي شيرىعىپ تۇرسىڭ. وي، ات ەمەس، قۇلىنداي ءمۇسىن ەكەن. ءار مۇشەڭ مەن مۇندالاپ تۇر.

- الاقاي! - دەدى دە، الگى قىز جۇگىرە باسىپ كەتىپ قالدى. قالعاندارى مەنى قورشاۋعا الدى. جەكپە-جەكتە ەش جىگىتتەن قايمىقپاعان باسىم مىنالاردىڭ الدىندا كادىمگىدەي ساسقالاقتاي باستادىم. 

بويى ۇزىن ءبىر قىز باسقالارىن كيە جارىپ، الدىما كەلىپ تۇرا قالدى. مەنىڭ بويىم كەۋدەسىنەن عانا كەلەدى ەكەن. توبەمنەن ءتونىپ تۇر. تۋرا الدىمداعى قوس انارىن ءتىس شۇقىعىشپەن ءتۇرتىپ قالساڭ جارىلايىن دەپ تۇر. 

- قالاي؟

- نە قالاي؟ - دەپپىن كۇمىلجىپ.

- ۇناي ما؟

- نە ۇناي ما؟

- ءسىز باعانادان بەرى كوز الماي تۇرعاندى ايتام.

- ە، الدىڭعى بامپەردى ايتاسىڭ با؟ - دەپپىن ساسقانىمنان. اۋىلداعى قازاقتىڭ اقباس سيىرىنىكىنەن ۇلكەن ەكەن. شاماسى ا/ش ءمينيسترى الىستان اكەلگەن گولشتينو-فريز تۇقىمىنان شىعار، - دەپ لاعىپ كەتتىم. لاقپاي قايتەيىن، مىناسىمەن ۇستىمە قۇلاي كەتسە، اۋا جەتپەي تۇنشىعىپ ولەتىن شىعارمىن.

- قىسقاسى، نراۆيتسيا يلي نە نراۆيتسيا؟ 

- نراۆيتستسا بوعاندا، بىلاي عوي ەندى... كولەمى 5,7 ەكەن. اناۋ 1,6 نەمەسە 2,0 بوپ جۇرگەن تاي-قۇناندار ساعان سوعىلىسسا، جاپىرايىپ قالار. ءبىز سەكىلدى كوپتى كورمەسە دە، ءبىرازدى كورگەن 3,5 كولەمدى جىگىتتەر تۋرا سوعىسپاي-اق، قاپتالداي ءجۇرىپ ۇزاققا شاباتىن شىعار، - دە-ە-ەپ مىڭگىرلەپ تۇرمىن. نە ايتىپ، نە قويعانىمدى ءوزىم دە بىلمەيمىن. 

ول دا تۇك تۇسىنبەي ماعان قاراپ تۇر. مەن دە كوزىم بۇلدىراپ، اپايتوسكە قاراپ تۇرمىن. وسىلاي تۇرا بەرەر مە ەدىك تاعى ءبىر قىز كەپ ءدال قۇلاقتىڭ تۇبىنەن ساڭق ەتپەگەندە.

- جاۋراپ كەتتىم، اعا، تەز بولىڭىزشى!!!

- اينالايىن جىلقى جاۋرايدى، ادام توڭادى. سوسىن نەنى بولۋىم كەرەك؟ - دەدىم ەسىمدى ءسال-ءپال جيىپ.

- جازعى كويلەكپەن تۇرمىن عوي!

- كۇپالنەكپەن كەلمەدىڭ بە؟ جازعى كويلەك كيسەڭ مەن تەز بولا سالادى دەپ ويلاپ پا ەدىڭ؟!

- تەز بولىڭىزشى! ۇنايدى دەي سالىڭىزشى مىنا دۇشپان قىزداردىڭ كوزىنشە تابالاماي...

- ۇنايدى، ال! ۇنايدى! 

قۇتىلعانشا اسىق بولدىم. كورشى-قولاڭ ءبىر ءۇيىر، وي ءبىر توپ قىز-قىرقىننىڭ ورتاسىندا تۇرعانىمدى كورسە، نە بەتىمدى ايتتىم!؟

ءسويتىپ، ودان قۇتىلدىم-اۋ دەگەندە تاعى ءبىر قىز مەنى سۇيۋگە ەنتەلەپ كەلەدى. 

- توقتا، اينالايىن، مىنا شىلدىر شۇمەككە قارا! - دەپ توقتاتتىم نەكە ساقيناسى تاعىلعان ساۋساعىمدى كورسەتىپ.

- ەرنىم ۇناي ما؟ - دەيدى باتشاعار شۇرتيگەن كىشكەنتاي ەرنىن ءدۇرديتىپ.

- نەعىپ دوبالداي بولىپ ءىسىپ كەتكەن؟ كىم ۇردى؟ - دەپپىن الاق-جۇلاق ەتىپ. ەسىكتى اشايىن دەسەم، مىنا قىزدار ەستى شىعارىپ، كودتى دا ۇمىتتىرىپ جىبەردى. كود ەمەس، الگى نەسىن... قىسقاسى، تورسىقتاي، تورسىق ەمەس-اۋ، كۇبىدەي، ءتىپتى ساباداي شابدالىسىن ارى-بەرى ويناتىپ تۇرسا، ميىڭداعى سان ەمەس، ساناڭ دا شاشىرايدى عوي.

- مۇنداي ەرىن جىگىتتەرگە ۇناۋشى ەدى عوي...

- ۇناسا ۇنايتىن شىعار. ماعان ۇنامايدى!

قۇدانىڭ قۇدىرەتى، ەسىكتى ىشتەن بىرەۋ اشىپ شىعا قالماسى بار ما. قايتا جابىلىپ قالماي تۇرعاندا، مەن دە زىپ بەرىپ كىرىپ كەتتىم. ليفتىمەن كوتەرىلىپ كەلە جاتىپ، ءوڭىم مەن ءتۇسىمدى ايىرۋ ءۇشىن بەتىمنەن سالىپ قالدىم. دىز ەتە ءتۇستى. ءوڭىم ەكەن. شايتان نە ەشكى، نە كەلىنشەك بولىپ كورىنەدى دەگەن. ء"پىسمىلدا" دەدىم الاستاۋ ءۇشىن. جوق، شىنىمەن دە ءوڭىم. پاتەرىمە دە جەتتىم-اۋ. 

- ءاي، قاتىن، تاماق بار ما!

ۇنسىزدىك. سىرت كيىمىمدى شەشىپ، اس ۇيگە بەتتەدىم. بايبىشە داستارحاندى جايناتىپ تاستاعان. تاماققا ءۇڭىلىپ وتىر. تىرپ ەتسەشى. الدىنا وتىرىپ جاتىپ، بەتىنە قاراسام، سول قالپى استان كوز الار ەمەس. قولىندا تەلەپون. مىناۋ بالكوننان قىزدارمەن تۇرعانىمدى كورىپ قويعان ەكەن. ەندى مەنىمەن ءۇش كۇن سويلەسپەيدى، دەپ ويلادىم ىشىمنەن.

- قاپ!

سەلك ەتە ءتۇستىم. ارى-بەرى شايناپ، ەندى جۇتا بەرگەن مايلى ەتتىڭ ءوزى تاماعىما تۇرىپ قالدى. قاقالعاندا قىسىق كوزىم شاراسىنان شىعىپ كەتە جازدادى. 

- قاپ! - دەپ قايتالادى بايبىشەم. مىنا تاماقتىڭ سۋرەتىن سالايىن دەپ ەدىم، باعانادان بەرى فەيسبۋك ىستەمەي تۇر! ابىسىندارىم "ۇنايدى" دەگەندى باسۋى كەرەك ەدى.
- ...

ايدوس جۇقانۇلى

Facebook-تەگى پاراقشاسىنان

1 پىكىر