سەنبى, 19 ماۋسىم 2021
46 - ءسوز 3169 0 پىكىر 11 قاڭتار, 2017 ساعات 11:29

فەيسبۋك

ارالاساڭ فەيسبۋكتىڭ كوشەسىن،
تالاي-تالاي جايتتى باستان كەشەسىڭ.

جان-جاعىڭدا جارقىراعان سۋرەتتەر،
ءبىر-بىرىنە كورسەتىلگەن قۇرمەتتەر.

قايدا ءجۇرسىڭ؟ كونتسەرت، تويعا باردىڭ با؟
سۋرەت قايدا، ويباي، دەرەۋ سال مۇندا.

قۇرباندىققا اتالعان مال، و، توبا،
شالىنادى تۇسكەننەن سوڭ... فوتوعا.

جاعا جىرتىپ، ايتىساتىن تالايلار،
مۇندا-داعى بىتپەيتىن داۋ-داماي بار.

كەنەتتەن وي ايتا قالسا ءدۇدامال،
كىم بولسا دا وسى جەردە سىنالار.

اناۋ توپتا ءتۇرلى ويلار بار باعالى،
ساياساتتى شەمىشكەشە شاعادى...

اياقاستى تۇتاناتىن جانجالدار...
توسىن پىكىر، وقىس ويلار، بولجامدار...

اشىلۋى بەلگىسىز ءبىر جايتتاردىڭ...
جارناماسى گازەتتەر مەن سايتتاردىڭ...

تابيعاتتىڭ سۇلۋلىققا باي تۇسى...
ەركەكتەر مەن ايەلدەردىڭ ايتىسى...

«ايتقانىمدى ىستەتەم...» دەپ جەر تەپكەن،
دولى قاتىن، سولارعا ۇقساس ەركەكتەر...

...قاتىعى جوق، قۇرتقا شاپقان كوڭىلى،
اۋمەسەرلەۋ داڭعويلاردىڭ شەرۋى.

تالاي-تالاي اقتاڭداعى تاريحتىڭ،
ءبىر تۇلعانىڭ كىم بولعانىن جاڭا ۇقتىم...

سپورتشىسى جۇلدە العانى قاي ەلدىڭ...
ەتتى قالاي اساتىنى ايەلدىڭ...

ءبىر ەركەكتىڭ ساتىپ العان بۇيىمى،
ءبىر سۇلۋدىڭ جاڭا تىككەن كيىمى...

قۋانىشتى، قايعىنى دا بولىسەر...
رەنجىسەر، تاتۋلاسار، كەلىسەر...

...مىناۋ كوشە — اقىنداردىڭ كوشەسى،
كەزدەسەدى دارىنداردىڭ نەشەسى.

انا بالا — اتقا مىنگەن تالاپكەر،
تالاپكەرگە لايك باس تا، ماداق تەر...

كوكتەم جاققا كوپ اۋعان با كوڭىلى، 
بويجەتكەننىڭ ۇلبىرەيدى ەرىنى.

ءجا، بۇرىلدىق، وندا نەمىز بار ءبىزدىڭ،
تارتاتىنى راس ءيسى جالبىزدىڭ...

...سىرتىمىزدان ۇڭىلە الساق ءوزىمىز،
ءبارىمىز دە كوگەندەگى قوزىمىز.

شەتى-شەگىنە جەتە المايتىن بازار — بۇل،
مەن دە كوزىم جەتكەن جەردى جازا الدىم.

باۋىرجان باباجانۇلى

Facebook-تەگى پاراقشاسىنان

0 پىكىر